មន្រ្តីអ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បានលើកឡើងថារដ្ឋាភិបាល ឬសភារបស់ប្រទេសអូស្រ្តាលី មិនមែនជាចៅហ្វាយនាយ របស់ប្រទេសកម្ពុជាទេ ហើយកម្ពុជា ក៏មិនមែនជាកូនចៅរបស់អូស្រ្តាលីដែរ។ តែផ្ទុយ​ទៅវិញភាគីទាំងពីរ គឺជាដៃគូរល្អ ឈរលើគោលការណ៍ កិច្ចសហប្រតិបត្តិការភាពជាដៃគូ និងស្មើភាព។

លោក សម រង្ស៊ី នៅពេលជួបជាមួយលោក ព្រឹទ្ធសមាជិកអូស្ត្រាលី លោក ឌីម ស្មីត (Dean Smith) នៅថ្ងៃទី១៩ ខែមីនា ឆ្នាំ២០១៤។ (រូបថត ហ្វេសប៊ុក)

នយោបាយកម្ពុជា - ការលើកឡើងរបស់លោក ផៃ ស៊ីផាន គឺបន្ទាប់ពី ប្រធានគណបក្សសង្រ្គោះជាតិ ជាគណបក្ស​ជំទាស់ លោក សម រង្ស៊ី ដែលកំពុងធ្វើទស្សនកិច្ចទៅប្រទេសអូស្រ្តាលី បានជំរុញឲ្យសមាជិក​ព្រឹទ្ធសភាអូស្រ្តាលី​មួយរូប ជួយជំរុញរដ្ឋាភិបាលអូស្ត្រាលី ឲ្យដាក់គំនាបលើរដ្ឋាភិបាលគណបក្សប្រជាជនកម្ពុជា ឲ្យបង្កើតគណៈកម្មការ​ឯករាជ្យស៊ើបអង្កេត អំពីភាពមិនប្រក្រតីនៃការបោះឆ្នោតកន្លងមក។

ទន្ទឹមនឹងនេះ លោក សម រង្ស៊ី ក្នុងកិច្ចសម្ភាស ជាមួយវិទ្យុអូស្ត្រាលី នៅថ្ងៃទី១៨ មីនា បានបញ្ជាក់ថា៖ «យើងត្រូវតែ​ផ្ញើសារមួយច្បាស់លាស់ទៅកាន់ អតីតអ្នកដឹកនាំបក្សកុម្មុយនីស្ត។ យើងត្រូវតែប្រាប់ពួកគេថា នៅសប្ដាហ៍ក្រោយ​នេះ ប្រសិនបើ (ការចរចា) មិនអាចរកឃើញផលប្រយោជន៍សំខាន់ណាមួយទេ យើងនឹងចាប់ផ្ដើមធ្វើបាតុកម្ម ហើយ​ប្រកាសបរិហារជាឱឡារិក ចំពោះបក្សកាន់អំណាចដែលមិនមានឆន្ទៈពិតប្រាកដ»។

ចំពោះគោលជំហររបស់លោក សម រង្ស៊ី ត្រូវបានលោកផៃ ស៊ីផាន អ្នកនាំពាក្យរដ្ឋាភិបាលកម្ពុជា បានអត្ថាធិប្បាយ​ប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី១៩ ខែមីនានេះថា លោកសម រង្ស៊ី មានសិទ្ធិសម្រេចតាម​ការយល់ឃើញ​របស់ខ្លួន និងគណបក្សរបស់ខ្លួន តែសម្រាប់ទំនាក់ទំនងរវាងប្រទេសអូស្រា្តលី និងប្រទេសកម្ពុជាគឺជារឿង​ដោយ​ឡែក ដែលមិនអាចប្រទេសណាមួយ លូកលាន់ចូលកិច្ចការផ្ទៃក្នុងរបស់ប្រទេសណាមួយបានទេ។

អ្នកនាំពាក្យរដ្ឋាភិបាលកម្ពុជារូបនេះបន្ថែមទៀតថា បញ្ហាការបោះឆ្នោតត្រូវបានដោះស្រាយជាបន្តបន្ទាប់ ក្រោយការ​បង្ហាញឆន្ទៈ របស់ប្រជាពលរដ្ឋតាមរយៈការបោះឆ្នោតរបស់ប្រជាពលរដ្ឋកម្ពុជា កាលពីខែកក្កដា ឆ្នាំ២០១៣។ លោក​ផៃ ស៊ីផាន បញ្ជាក់ថា៖ «លោក សម រង្ស៊ី កំពុងហៅបរទេស ឲ្យមកកកូរកកាយកិច្ចការផ្ទៃក្នុងរបស់កម្ពុជា(...)។ កម្ពុជា​មិនមែជាប្រទេស"ខ្ញុំ"របស់អូស្រ្តាលីទេ ហើយអូស្រ្តាលីក៏មិនមែនជាចៅហ្វាយរបស់កម្ពុជាដែរ។ កម្ពុជាមានឯករាជ្យ អធិបតេយ្យ និងអព្យាក្រិត្យគ្រប់គ្រាន់។»

រហូតមកដល់ពេលនេះ ប្រទេសអូស្រ្តាលី សហរដ្ឋអាមេរិក និងប្រទេសក្នុងសហគមន៍អ៊ឺរ៉ុប ដែលជាបណ្តា​ប្រទេស​ផ្តល់ជំនួយ ច្រើនសន្ធឹកសន្ធាប់ដល់កម្ពុជា មិនទាន់ទទួលស្គាល់ជាផ្លូវការ ចំពោះលទ្ធផលបោះឆ្នោត ដ៏ចម្រូងចម្រាស នៅកម្ពុជាកាលពីខែកក្កដា ឆ្នាំ២០១៣នៅឡើយទេ តែប្រទេសទាំងនោះបានជំរុញឲ្យគណបក្សប្រជាជនកម្ពុជា និង​គណបក្សសង្រ្គោះជាតិ គម្បីដោះស្រាយបញ្ហាបោះឆ្នោត ដោយសន្តិវិធី រវាងភាគីខ្មែរ និងខ្មែរ៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៩ មីនា ២០១៤