របបកុម្មុយនីស - ឧក្រិដ្ឋកម្មដែលបានប្រព្រឹត្តិដោយ របបក្រុមព្យុងយ៉ាង ប្រទេសកូរ៉េខាងជើង មានលក្ខណៈ​ប្រៀប​បានទៅទៅ ឧក្រិដ្ឋកម្មប្រព្រឹត្តិដោយពួក ណាហ្សី ហ៊ីត្លែ និងរបបប្រកាន់ពូជសាសន៍ពណ៌សម្បុរ និង​របប​ប្រល័យ​​ពូជសាសន៍ប៉ុលពត។ នេះជាសេចក្ដីសន្និដ្ឋាយ៉ាងម៉ឺងម៉ាត់ របស់លោក ម៉ៃឃើល គៀប៊ី (Michael Kirby) នាយក​គណកម្មាធិការស៊ើបអង្កេតមួយ របស់អង្គការសហប្រជាជាតិ (អ.ស.ប)។

លោក ម៉ៃឃើល គៀប៊ី បានថ្លែងនៅមុខក្រុមប្រឹក្សាសិទ្ធមនុស្ស របស់ អ.ស.ប យ៉ាងច្បាស់ៗថា «ប្រយុទ្ធ​ប្រឆាំង នឹង​អំពើយង់ឃ្នង របស់ពួកណាហ្សីនិយម ប្រកាន់ពណ៌សម្បុរ និងដូចពួកខ្មែរក្រហម ទាមទារឲ្យមាន​ភាព​​ខិតខំ​ប្រឹងប្រែង ពីសំណាក់ប្រទេសមហាអំណាចធំៗក្នុងលោក»។ លោកបានបន្ថែមថា វាគឺជាកតព្វកិច្ច​របស់​មនុស្សទាំងអស់គ្នា ក្នុង​ការប្រយុទ្ធប្រឆាំង នឹងការរំលោភសិទ្ធិមនុស្ស និងឧក្រិដ្ឋកម្មប្រឆាំង​នឹង​មនុស្ស​ជាតិ នៅក្នុងសាធារណរដ្ឋ​ប្រជាមានិត​កូរ៉េ (ឈ្មោះជាផ្លូវការ របស់ប្រទេសកូរ៉េខាងជើង)។

លោកបានថ្លែងបរិហាយ៉ាងធ្ងន់ៗទៀតថា «ថ្ងៃនេះ យើងបានចូលមកដល់សតវត្សទី២១ហើយ តែយើងនៅ​តែ​ប្រឈមមុខទៅនឹង អំពើយង់ឃ្នងដ៏គួរឲ្យខ្មាសអៀន ដែលបានប៉ះពាល់យ៉ាងធ្ងន់ធ្ងរដោយពិភពលោក។ យើង​មិន​​អាច​​ឈរអោបដៃ មើលដោយភ្នែកទទេ បានតទៅទៀតនោះទេ។»

ប្រទេសកូរ៉េខាងជើង រងការចោទប្រកាន់ថា បានប្រព្រឹត្តិ«ឧក្រិដ្ឋកម្មប្រឆាំងនឹងមនុស្សជាតិ»

អ្នកច្បាប់ទាំងនេះដែលទទួលសិទ្ធិអំណាចពី អ.ស.ប បានបង្កើតឲ្យមានជាលើកទីមួយ នូវសំនុំរឿងមួយ ផ្សាយ​កាល​ពីថ្ងៃទី១៧ ខែមីនាកន្លងមកនេះ ដែលមានលក្ខណៈចោទប្រកាន់ និងមានហេតុផល​ច្បាស់លាស់ ដាក់​បន្ទុក​​​លើ​របបកូរ៉េខាងជើង ដោយបានចោទរបបនេះ ពីបទឧក្រិដ្ឋប្រឆាំងមនុស្សជាតិ ដ៏ធំធេងហួស​ពីការ​ស្មាន។

របាយការណ៍នោះសរសេរថា «គណកម្មាធិការស៊ើបអង្កេត បានបញ្ជាក់ថា ការរំលោភដែលមានលក្ខណៈ​ជាប្រព័ន្ធ លាតសន្ធឹង និងគ្រោតគ្រាត ទៅនឹងសិទ្ធិមនុស្ស ត្រូវបានបង្កើតឡើងដាកឲ្យអនុវត្តន៍ ដោយ​សាធារណ​រដ្ឋ​​ប្រជា​មានិត​កូរ៉េ ហើយនៅករណីជាច្រើន ការរំលោភទាំងនេះ បានបង្កឲ្យ​មាន​ឧក្រិដ្ឋ​កម្ម​ប្រឆាំង​នឹង​មនុស្សជាតិ»។

កាលពីខែមុន អតីតទាហានមួយរូបរបស់របបនេះ បានរត់ភៀសខ្លួនចេញពីប្រទេសរបស់ខ្លួន ហើយបានថ្លែង​រៀបរាប់ នូវហេតុការណ៍ជាច្រើន ដ៏មហារន្ធត់ ជាពិសេសទាក់ទងនឹងករណីមួយ ដែលកងទាហានបាន​បណ្ដោយ​​ឲ្យហ្វូង​ឆ្កែ​ ខាំស៊ីកុមារជាច្រើននាក់ នៅពេលដែលកុមារទាំងនោះ ចេញពីសាលារៀន៕