ដំណើរការនៃការកំណែទម្រង់ ការបោះឆ្នោតរវាងគណបក្សទាំងពីរ នៅតែមានភាពរអាក់រអួល ដែលបញ្ហានេះ​ខាង​សង្គមស៊ីវិល ស្នើអោយបន្ថែមមាត្រានៅក្នុងរដ្ឋធម្មនុញស្តីពី បញ្ហាគណកម្មាជាតិរៀបចំការបោះឆ្នោត ដើម្បីអោយ​ស្ថាប័នមួយនេះស្ថិតក្នុងភាពឯករាជ្យ។

វ៉ាគ្មិននៅក្នុងសន្និសីទរបស់សម្ព័ន្ធកំណែទម្រង់ការបោះឆ្នោត ថ្ងៃទី១២​ ខែមីនា ឆ្នាំ២០១៤។ (រូបថត MONOROOM.info/ Tith)

នយោបាយកម្ពុជា - បន្ទាប់ពីជំនួបរវាងគណបក្សជាប់ឆ្នោតទាំងពីរ មិនទទួលបានលទ្ធផលជាដុំកំភួន ជុំវិញ​កំណែ​ទម្រង់​ការបោះឆ្នោត សម្ព័ន្ធកំណែទម្រង់ការបោះឆ្នោត ហៅកាត់ថា ERA  បាន​រៀបចំសន្និសីទមួយនៅថ្ងៃទីទី១២ ខែ​មិនា ឆ្នាំ២០១៤នេះ ដើម្បីជាអនុសាសន៍សំរាប់គណបក្សនយោបាយទាំងពីរ ក្នុងការឈានទៅបញ្ចប់ភាពជាប់គាំង​ផ្នែកនយោបាយ និងការបង្កើតអោយមាន គ.ជ.ប មួយឯករាជ្យ។

ក្នុងឱកាសនោះ លោក គល់ បញ្ញា នាយកប្រតិបត្តនៃអង្គកាខមហ្រ្វែលបានថ្លែងថា រឿង​សំខាន់នៅពេលនេះ គឺថា​ធ្វើយ៉ាងអោយគណបក្សពីរសំខាន់ៗ ទុកចិត្តលើគ.ជ.ប។ ដើម្បីអោយមានការទុកចិត្តលើ គ.ជ.ប គណបក្សសំខាន់ៗ នៅក្នុងរដ្ឋសភាហ្នឹង ត្រូវតែនាំគ្នាស្រុះស្រួលរកចំណុចឯកឆន្ទមួយ ទៅលើនិតិវិធីនៃការជ្រើសរើស គ.ជ.ប និង​សមាសភាព គ.ជ.ប។

លោកបន្តថា ដើម្បីអោយមានការស្រុះស្រួលគ្នាបាន វាទាល់តែមានលទ្ធភាព ក្នុងការធ្វើការសម្រេចចិត្តរួមគ្នា។ រីឯ​ការសម្រេចរួមគ្នា គឺត្រូវការសម្លេង២ភាគ៣នៅក្នុងសភា។ លោកបន្ថែមទៀតថា «បើសិនជាយកការសម្រេច​តែ៥០%​បូកមួយ គឺគណបក្សមួយនៅតែមានប្រៀបលើគណបក្សមួយ អញ្ចឹងសម្លេងពីភាគបីនេះ ជួយអោយការស្រុះស្រួលគ្នា មានការទុកចិត្តទៅលើគ.ជ.ប ហើយក៏ធ្វើអោយគ.ជ.ប មានទំនុកចិត្តទៅលើការងាររបស់ខ្លួនដែរ។ បើបានសម្លេង​ពីរភាគបី លុះត្រាគណបក្សសង្រ្គោះជាតិ ត្រូវតែចូលប្រជុំក្នុងសភា។»

សម្ព័ន្ធកំណែទម្រង់ការបោះឆ្នោត (ERA) ក៏ជំរុញឲ្យគណបក្សប្រជាជនកម្ពុជា និងគណបក្សសង្គ្រោះជាតិ ធ្វើកំណែ​ទម្រង់ គ.ជ.ប តាមរយៈការធ្វើស្ថាប័ននោះ ទៅជាស្ថាប័នធម្មនុញ្ញ ដើម្បីធានាភាពឯករាជ្យរបស់ខ្លួន។ កណីនេះ នាយក​ប្រតិបត្ត​នៃអង្គកាខមហ្រ្វែល បានលើកឡើងយ៉ាងដូច្នេះថា «យើងឃើញថា រដ្ឋធម្មនុញ្ញបច្ចុប្បន្ននេះ អត់ទាន់​មាន​និយាយទាក់ទិនទៅនឹងស្ថាប័នគ.ជ.ប ទេ អញ្ចឹងហើយត្រូវតែបន្ថែមមាត្រា នៅក្នុងរដ្ឋធម្មនុញ្ញដែលចែងអំពី​ស្ថាប័ន​នេះ។ ដើម្បីអនុម័តរដ្ឋធម្មនុញ្ញបាន ត្រូវការសម្លេងលើសពី៨២សម្លេង ដូច្នេះគឺត្រូវការគណបក្សសង្រ្គោះជាតិ​នៅ​ក្នុងសភា៕»

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) -​ ភ្នំពេញ ថ្ងៃទី ១២ មិនា ២០១៤