ប្រជាពលរដ្ឋជនជាតិដើមភាគតិច គ្រឹង ប្រមាណ៦៧ គ្រួសារ ក្នុងភូមិភូមិម៉ាស ឃុំប៉ូយ ស្រុកអូរជុំ ខេត្តរតនគីរី ប្រមាណ៣០នាក់ រួមជាមួយប្រធានភូមិ អនុភូមិ បានចុះទៅបញ្ឈប់ការកាប់រុករានទន្ទានដីចំការវិលជុំ និងដីបម្រុង​ទុករបស់របស់ពួកគាត់ ពីសំណាក់កម្មករមួយចំនួន ដែលជួលដោយអ្នកស្រីលី សុខងីម។ នេះបើតាមការបញ្ជាក់​របស់លោកទួង ពេញ អនុប្រធានភូមិ ភូមិម៉ាស់។

ប្រជាពលរដ្ឋជនជាតិដើមភាគតិច គ្រឹង នៅលើដីរបស់ពួកគាត់។ (រូបថត សុធន)

ដីធ្លី - លោកអនុភូមិម៉ាសរូបនេះបានបន្តរថា ដីចំនួន៤០០ ហិកតា ជាដីចំការវិលជុំ ដីបំរុងទុក ដីព្រៃកេរ្តិ៍ សុទ្ធតែជាដី​របស់ប្រជាសហគម ត្រូវបានគេមកកាប់ទន្ទ្រាន រុករានរំលោភយក ជាមូលហេតុមួយប៉ះពាល់យ៉ាងធ្ងន់ធ្ងរ ដែលផ្តល់​ជាប្រយោជន៍សហគម។

យោងតាមញ្ញត្តិបដិសេធ របស់ប្រជាសហគមន៍ចុះថ្ងៃទី១៩ ខែកុម្ភៈ ឆ្នាំ២០១៣ វិញបានលើកឡើងថា ក្នុងឆ្នាំ២០០៧ ឈ្មោះ សេង វិសិទ្ធិ និងប្រពន្ធ បានមកទិញដី៤០០ហិកតា ក្នុងភូមិឃុំខាងលើពីប្រជាពលរដ្ឋ ដោយមានការ​ផ្តិតមេ​ដៃ​ ក្នុងការប្រគល់សិទ្ធិគ្រប់គ្រង។ តែរហូតមកទល់នឹងពេលនេះ ប្រជាពលរដ្ឋទាំងអស់​នៅមិនទាន់បានទទួល​បាន​លុយថ្លៃដីនៅឡើយ។

ញ្ញត្តិបដិសេធនោះបានសរសេរបន្តរថា ជាមួយនឹងការទិញដីនេះឈ្មោះ សេង វិសិទ្ធិ ក៏បាន​សន្យាធ្វើផ្លូវ ធ្វើស្ពាន ធ្វើ​សាលារៀន ធ្វើសាលាភូមិ ដោយដោះដូរជាមួយនឹងដី៤០០ហិកតានោះ តែរាល់ការសន្យា​ទាំងនោះ ពុំបានអនុវត្ត​ឡើយ។ «ឈ្មោះ សេង វិសិទ្ធិ និងប្រពន្ធ សេក សុភ័ក្រម៉ូនា យកអចលនទ្រព្យ​ដីចំការ ៤០០ ហិកតា ស្ថិតនៅភូមិម៉ាស ឃុំប៉ូយ ស្រុកអូរជុំ ខេត្តរតនគីរី ពុំមែនជាកម្មសិទ្ធិរបស់ខ្លួនពិតប្រាកដ ដាក់បញ្ចូលក្នុង​ក្រុមហ៊ុន VKM ដែលមាន​លោក សេង វិសិទ្ធិ ជាប្រធានក្រុមប្រឹក្សាភិបាល និងលោកស្រី លី សុខងីម ជាអភិបាល​កាលពីអំឡុងថ្ងៃទី០១ ខែ​វិច្ឆិការ ឆ្នាំ២០១១ រហូតដល់ពេលនេះ ទើបពលរដ្ឋក្នុងសហគមន៍ភូមិម៉ាស​យើងខ្ញុំបាន​ដឹង។»

លោក ឆាយ ធី មន្រ្តីសម្របសម្រួលសមាគមអាដហុក ប្រចាំខេត្តរតនគីរីបានបញ្ជាក់ថា ករណីវិវាទនេះ ដំបូង​កើត​ចេញពីលោក សេង វិសិទ្ធិ ដែលបានសន្យាជាមួយប្រជាសហគមន៍ ក្នុងការកសាងហេដ្ឋារចនាសម្ពន័នានាក្នុងភូមិ ជាមួយនិងទឹកប្រាក់បន្ថែម ចំនួន២ម៉ឺនដុល្លាអាមេរិក។ លោកបន្តរថាពេលនោះលោក សេង វិសិទ្ធិ បានឲ្យប្រជា​សហគមន៍​ផ្តិតមេដៃ​ លើក្រដាស«ស»មួយ ដោយអះអាងថានឹងរៀបចំឯកសារ និងចែកមកឲ្យប្រជាពលរដ្ឋវិញ​ តែមិនបានធ្វើតាមការសន្យានោះទេ។

តំណាងអង្គការអាដហុករូមនេះបន្តរថា ក្រោយការស្រាវជ្រាវរកឃើញថា មានឈ្មោះអ្នកស្រី លី សុខងីម ដែលបាន​ជួលកម្មករមកកាប់ឆ្កាដីព្រៃទាំងនោះ ហើយត្រូវបានតំណាងប្រជាសហគមន៍ធ្វើការហាមឃាត់។ លោកបាន​បញ្ជាក់​ដូច្នេះថា «លោកស្រី លី សុខងីម បានទទួលការសម្រេចក្តីពីតុលាការ ដោយកាត់ពីកូនបំណុល​ក្នុងដី៤០០ហិកតា​នោះ។ កូនបំណុលនោះគឺលោក សេង វិសិទ្ធិ។ (...) ដីនេះនៅមិនទាន់ដឹងថាជាកម្មសិទ្ធិភាគីណាមួយ ពិតប្រាកដ​នោះទេ តែតុលាការបែរជាបានសម្រេចទៅឲ្យភាគីទីបីលោកស្រី លី សុខងីម ទៅវិញ។»

ទស្សនាវដ្តីមនោរម្យ.អាំងហ្វូ មិនអាចសំការបញ្ជាក់ពីលោកសួស ឡា ចៅក្រមតុលាការខេត្តរតនគីរី ពីបញ្ហាដីទំនាស់ ៤០០ហិកតានោះបានទេ។ តែបើយើងតាមដីការសម្រេចចុះថ្ងៃទី២៧ ខែកុម្ភៈ ឆ្នាំ២០១៤ នេះ ត្រង់ចំណុច “ង” បាន​បញ្ជាក់ថា «ដីចំការចំនួន៤០០ហិកតា នៅភូមិម៉ាស ឃុំប៉ូយ ស្រុកអូរជុំ ខេត្តរតនគីរី ទុកប្រគល់ទៅឲ្យម្ចាស់បំណុល នៃ​ការអនុវត្តដើម្បីចាត់ចែងតាមការព្រមព្រៀង។»

ចំណែកលោក សេង វិសិទ្ធិ និងអ្នកស្រី សេក សុភក័្រសឿម៉ូនា ជាប្រពន្ធ រួមទាងអ្នកស្រី លី សុខងីម នៅមិនទាន់អាច​ទំនាក់ទំនងសុំការបង្ហាញពីករណីខាងលើទេ។ លោក ឆាយ ធី តំណាងអង្គការអាដហុក ខេត្តរតនគីរីបានបញ្ជាក់ថា ក្រុមការងាររបស់លោក នឹងបន្តរធ្វើការសិក្សាតាមផ្លូវច្បាប់ ស្រាវជ្រាវ និងស៊ើបអង្កេតក្នុងករណីនេះ ដើម្បីប្តឹងទាស់​ទៅ​សាលាឧទ្ធរណ៍ នឹងដីកាសម្រេចរបស់រតុលាការខេត្តរតនគីរីនេះ។

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១២ ខែមីនា ឆ្នាំ២០១៤