ស្រ្តីរងគ្រោះ ដោយការតវ៉ារឿងដីធ្លី ចំនួន១០រូប ត្រូវបានដោះលែង ឲ្យមានសេរីភាព ដូចមនុស្សធម្មតាហើយ នៅ​ម៉ោង​ប្រមាណ ៣​កន្លះ​រសៀល​ថ្ងៃ​ទី​១១ ខែ​មេសា ក្រោមការទទួលស្វាគមន៍ ដល់ពន្ធនាគារព្រៃស ដោយ​អ្នក​នយោបាយ ​នៃ​គណបក្ស​ប្រឆាំង អ្នក​គាំទ្រ​គណបក្ស​នេះ និង​សកម្មជន​ការពារ​ដីធ្លី​ក្នុង​តំបន់​បឹងកក់ ប្រមាណ ១០០​នាក់។

ការ​ដោះ​លែង​អ្នក​ជាប់​ឃុំ ១០​នាក់​នេះ ធ្វើ​ឡើង​ភ្លាមៗ​បន្ទាប់​ពី​ព្រះមហាក្សត្រ​ បាន​ឡាយព្រះហស្តលេខា ​លើ​ពាក្យ​ស្នើសុំ​ព្រះរាជទាន​លើក​លែង​ទោស​ពួក​គេ កាល​ពី​ព្រឹក​ថ្ងៃ​ទី​១១ ខែ​មេសានេះ។ ចំពោះលោកមេធាវី ជូង ជូងី វិញ បានថ្លែង​កាល​ពីមួយថ្ងៃមុនថា ការដោះលែងនេះ ដោយមានបញ្ជាក់ ពីភាពគ្មានទោសអ្វីទាំងអស់ សម្រាប់ស្ត្រី​សកម្មជន​ទាំង​នោះ។

ក្នុងកិច្ចសម្ភាស ជាមួយអ្នកសារព័ត៌មាន នាវិមានរដ្ឋសភា កាលពីព្រឹកថ្ងៃទី១០ ខែមេសា ឆ្នាំ២០១៥នេះ លោក ជូង ជូងី បានពន្យល់ថា ការដោះលែងនេះ ត្រូវបានធ្វើឡើង បន្ទាប់ពីមានជំនួប រវាងថ្នាក់ដឹកនាំកំពូល នៃគណបក្សទាំងពីរ នា​វិមាន​រដ្ឋសភា កាលពីថ្ងៃទី៩ ខែមេសាកន្លងមក។ ជាមួយនឹងការបញ្ចប់បញ្ហា ក្នុងការបង្កើតសមាជិក គ.ជ.ប ថ្មីទាំង៩ ព្រម​ជា​មួយ នឹងការផ្តល់សេចក្តីទុកចិត្ត ដោយតំណាងរាស្រ្តភាគច្រើន នៃគណបក្សទាំងពីរ។ ការផ្តល់សុពលភាព ដោយ​អង្គ​ព្រះ​មហាក្សត្រ និងស្របពេលដែល គ.ជ.ប ថ្មី ត្រូវបានចាប់កំណើត ចូលកាន់តំណែង និងការងាររបស់ខ្លួនរួចរាល់។

លោក ជូង ជូងី បានបញ្ជាក់ដូច្នេះថា៖ «ខ្ញុំបានរៀបចំឯកសារ រួចរាល់ហើយ ដាក់ទៅកាន់តុលាការ ស្នើឲ្យមានការ​ដោះ​លែង ស្រ្តីបឹងកក់ទាំង១១នាក់ ព្រះសង្ឃបីអង្គ និងសកម្មជនគណបក្សសង្គ្រោះជាតិ៥នាក់។ (...) គ្រាន់តែដោះស្រាយ អ្នក​ដែលនៅជាប់ឃុំសិនតែប៉ុណ្ណោះ។»

ប៉ុន្តែការដោះលែងនេះ មានសភាពលឿនជាង ការអះអាងរបស់លោកមេធាវី ដែលនិយាយថា នឹងធ្វើនៅថ្ងៃចន្ទ​ខាង​មុខ។​ យ៉ាងណា លោក ជូង ជូងី បានបង្ហាញថា នីតិវិធីនេះ អាចអនុវត្តទៅបាន ក៏ព្រោះតែស្រ្តីបឹងកក់ទាំង១១នាក់ មាន​សាលក្រមទទួលទោសរួចទៅហើយ។ ហើយ តែដោយសារពួកគាត់ប្តឹងសាទុក្ខ ទៅកំពូល ទើបសាលក្រមនោះ នៅមិន​ទាន់ចូលជាស្ថាពរ។ លោកបន្តថា មកទល់ពេលនេះ ស្រីបឹងកក់ទាំង១១នាក់នោះ បានព្រមផ្តិតមេដៃ ដកពាក្យបណ្តឹង​រួច​រាល់ហើយ។

សូមរំលឹកថាស្ត្រីសហគមន៍បឹងកក់ និងបុរីកីឡាទាំង១០នាក់ ត្រូវបានអាជ្ញាធរកម្ពុជា ចាប់ខ្លួនកាលពីថ្ងៃទី១០ និងទី១១ ខែ​វិច្ឆិកា ដោយចោទប្រកាន់ ពីបទប្រឆាំងនឹងមន្ត្រីរាជការសាធារណៈ និងបង្កការកកស្ទះចរាចរណ៍ សាធារណៈ។ ក្នុង​នោះ តុលាការសាលាដំបូងរាជធានីភ្នំពេញ បានធ្វើការពិន័យជាប្រាក់ ក្នុងម្នាក់ៗ ពីរលានរៀល និងដាក់ឲ្យជាប់​ពន្ធនាគារ​ម្នាក់ៗ មួយឆ្នាំ។ ទោសដែលស្រ្តីទាំង១០ បានទទួលនេះ ព្រោះតែពួកគាត់បានទាមទារ ឲ្យមានការដោះ​ស្រាយ​រឿង​ទឹក​លិច​ភូមិ និងផ្ទះសំបែងមិនអាចរស់នៅបាន៕