សង្ឃព្រះនាម ជា វណ្ណដា ព្រះជន្ម ៣០ព្រះវស្សា ដែលត្រូវបានសមត្ថកិច្ចចាប់ឃាត់ខ្លូន នៅវត្តអង្គតាម៉ិញ កាល​ពីពេលកន្លងទៅ ត្រូវបានលោកឪពុក ជាខ្មែកម្ពុជាក្រោមដែរនោះ បញ្ជាក់ថា កូនប្រុសរបស់លោក ត្រូវគេចោទ​ប្រកាន់ដោយគ្មានកំហុស។ ការចាប់ខ្លូននេះ ធ្វើឡើងដោយគ្មានភស្តុតាង ពិតប្រាកដនោះឡើយ។

ព្រះសង្ឃខ្មែរក្រោម ទាំងពីរព្រះអង្គ ព្រះនាម ដាវ ទេព្យ និង ជា វណ្ណដា គង់នៅវត្តអង្គតាមិញ ហើយត្រូវបាន​អាជ្ញាធរខណ្ឌ ចាប់ផ្សឹក​កាលពី​ថ្ងៃទី១ ខែសីហា បន្ទាប់ពីក្រុមអាជ្ញាធរអះអាងថា បានរកឃើញនូសម្ភារៈ ដែល​ជាភស្តុតាងមួយចំនួន ស្ថិតក្នុងកុដិ រួមមាន អាវុធ និងគ្រឿងញៀន លិខិតសម្គាល់(ខ្លួន)សង្ឃ ក្លែងក្លាយជា​ដើម។ ព្រះសង្ឃទាំងពីរអង្គ ត្រូវបានអាជ្ញាធរ​ខណ្ឌពោរសែនជ័យ ចាប់ផ្សឹក និងដាក់ឃុំ នៅក្នុងថ្ងៃដដែលនោះ។ មកទល់ម៉ោង ជិត១២ព្រឹក ថ្ងៃទី១៩ ខែសីហា កន្លងមកនេះ បន្ទាប់ពីការសាកសួរ របស់លោក អ៊ី ថាវរៈ ចៅក្រម​ស៊ើបសួរ​រួច ព្រះ​តេជគុណទាំងពីរអង្គ ត្រូវបានបញ្ជូនទៅឃុំខ្លួនបន្ត នៅពន្ធនាគារព្រៃស ក្រោមបទចោទចំនួនបី ដែលរួមមាន បទគំរាមសម្លាប់, បទរក្សាទុកគ្រឿងញៀន, និងប្រើប្រាស់​លិខិត​ក្លែងក្លាយ។

ប៉ុន្តែឪពុករបស់សង្ឃព្រះនាម ជា វណ្ណដា បានប្រកែកជំនួសលោកកូន (ពាក្យសង្ឃ) ទៅនឹងការចោទប្រកាន់​នោះថា៖ «ចាប់កូនខ្ញុំដោយគ្មានភស្តុតាង កូនខ្ញុំមិនដែលមានប្រព្រឹត្តរឿង ដូចគេចោទនេះទេ ខ្ញុំជឿជាក់ ហ៊ាន​យកជីវិតមកធានា»។

លោកបានបញ្ជាក់ថា នៅពេលដែលចាប់ខ្លូន មានទាំងកូនសិស្សលោកម្នាក់ បានបញ្ជាក់ថា ស្រោមអនាម័យ និង(ខោលីអូស្រី) ដែលរកឃើញនៅក្នុងកុដនោះ ជារបស់ខ្លូន (កូនសិស្ស) ក៏គ្មានអាជ្ញាធរណាជឿដែរ។ លោក​បានថ្លែងទាំងបង្ហូរទឹកភ្នែកថា៖ «លោកទៅបិណ្ឌបាត្រ ត្រឡប់មកវិញ ស្រាប់តែឃើញ គេចោទអញ្ចឹងទៅ​ហើយ»។

ការចាប់ផ្សឹក និងការចាប់ខ្លួន របស់អាជ្ញាធរទៅលើព្រះសង្ឃទាំងពីរអង្គ ត្រូវបានក្រុមអង្គការសង្គមស៊ីវិល ដែល​ធ្វើការឃ្លាំមើលការគោរពសិទ្ធិមនុស្ស ចាត់ទុកថា ជាសកម្មភាពដែលមានចរឹកនយោបាយ ដើម្បីរឹងបន្តឹង​សម្លេង របស់​ព្រះ​សង្ឃខ្មែរក្រោម ខណៈព្រះសង្ឃទាំងនោះ មានសកម្មភាពខ្លាំងក្លា ក្នុងការប្រឆាំងនឹងផល​ប្រយោជន៍​វៀតណាម ក៏ដូចជាបញ្ហាដែលទាក់ទងនឹងព្រំដែន កាលពីពេលថ្មីៗនេះ។

តាមប្រសាសន៍របស់លោក អំ សំអាត មន្រ្តីស៊ើបអង្កេតជាន់ខ្ពស់ របស់អង្គការលីកាដូរ បានលើកឡើងថា៖ «ខ្ញុំ​ឃើញថារឿងនេះ វាមានភាពមិនប្រក្រតីតាំងពីដំបូង ពីព្រោះនៅពេលដែលឆែកឆេរ ត្រូវតែមានដីកា និងសាក្សី​ត្រឹមត្រូវ មិនមែនចូល ទៅយកភស្តុតាងមកបង្ហាញ ហើយចាប់ខ្លូននោះទេ។ ខ្ញុំគិតថា វានៅតែមិនប្រក្រតី ហាក់​បីដូចជាមានការៀបចំ ទុកជាមុន»។ មន្រ្តីស៊ើបអង្កេតរូបនេះ បានបញ្ជាក់ទៀតថា ការពិតទៅថ្ងៃនោះ គឺមន្រ្តី​សមត្ថកិច្ច​ចូលឆែកឆេរ តាមរកព្រះសង្ឃខ្មែរក្រោម ព្រះនាម សឺន ហៃ ដែលសង្ស័យថា ស្នាក់នៅវត្ត​អង្គតាម៉ិញ ប៉ុន្តែពេលសមត្ថកិច្ចទៅដល់ពុំឃើញ ដូចដែលសង្ស័យ ក៏ចាប់ផ្តើមឆែកឆេរកុដិព្រះសង្ឃពីរអង្គ រហូតឈាន​ដល់ ការចាប់ខ្លូនតែម្តង។

លោក អំ សំអាត បានបញ្ជាក់បន្ថែមថាសង្ឃទាំងពីរអង្គ បានចូលរួមសកម្មភាពមួយចុងក្រោយ កាលពីថ្ងែទី ១៩ ខែកក្កដាកន្លងទៅ ដោយចុះត្រួតពិនិត្យបង្គោលព្រំដែន ជាមួយក្រុមតំណាងរាស្រ្ត គណៈបក្សសង្គ្រោះ​ជាតិ នៅ​ខេត្តស្វាយរៀង ជាមួយប្រជាជនប្រមាណ ជាង២០០០នាក់។ ការចាប់ខ្លួននេះ អាចជាហេតុផលមួយ ដើម្បី​ឈាន​ទៅ​បង្ក្រាប​សកម្មភាពឈឺឆ្អាល លើបញ្ហាព្រំដែនកម្ពុជា-វៀតណាម។

មិនអាចស្នើសុំឲ្យមានការបកស្រាយ ពីចៅក្រមស៊ើបសួរ លោក  អ៊ី​ ថាវរៈ បានទេនៅពេលនេះ។ ប៉ុន្តែបន្ទាប់​ពី​ការចាប់ខ្លូន​នោះ គ្រូចៅអធិការវត្តអង្គតាម៉ិញ បានសង្ឃដីកា ប្រាប់ទស្សនាវដ្ដីមនោរម្យ.អាំងហ្វូថា សង្ឃទាំង​ពីរ​អង្គនេះ គ្មាន​ព្រះ​ឆាយា​ល័ក្ខ (លិខិតសម្គាល់សង្ឃ) ​ត្រឹមត្រូវទេ៕