ស្រ្តីដែលអះអាងថាឈ្មោះ ធីតា ហាក់មានរឿងលាក់ទុកក្នុងចិត្ត្ត ដែលជាទង្វើអយុត្តិធម៌ ទាក់ទងនឹងតុលាការ​សាលាដំបូងរាជធានីភ្នំពេញ។ អ្នកស្រី ធីតា បានឈប់ម៉ូតូ ហើយបង្ហើរវាចារ ទាំងភាសាអង់គ្លេស និងខ្មែរថា៖ «ឯណាទៅយុត្តិធម៌ ឯណាទៅភាពទទួលខុសត្រូវ អ្នកណាជាអ្នកឈ្នះ អ្នកណាជាអ្នកចាញ់»។ (សូមទស្សនា និងស្ដាប់ការថ្លែងជាច្រើនទៀត របស់ស្ត្រីម្នាក់នេះ នៅក្នុងវីដេអូខាងក្រោម)

សម្តីទាំងអស់នេះ បានធ្វើឲ្យអ្នកនៅជុំវិញ ក្នុងសកម្មភាពតវ៉ាមួយ នៅមុខសាលាដំបូងរាជធានីភ្នំពេញ ងាក​មក​ផ្តោតអារម្មណ៍ពិចារណា។ បុរសម្នាក់ ចេញដើរពីក្នុងចំនោមនុស្សជាច្រើន ចូលទៅឃាត់អ្នកស្រី ធីតា ដោយ​និយាយថា៖ «សរសៃប្រសាទឬ បានជាមកឈប់និយាយចឹង?»។ អ្នកស្រីតបថា៖ «ខ្ញុំគ្មានសសៃប្រសាទអីទេ តែខ្ញុំចង់បញ្ចេញមតិ»។

សម្រាប់អ្នកនៅក្នងព្រឹត្តិការណ៍នេះ ដោយផ្ទាល់បាននិយាយគ្នាតិចៗថា ស្រ្តីនេះមិនមែនមានបញ្ហា សរសៃ​ប្រសាទទេ តែហាក់មានអ្វីចូលរូបគាត់។ បន្ទាប់ពីគិតមួយសន្ទុះ ក្រុមអ្នកឃើញកាយវិការ បានពិចារណា​ទៀត​ថា បើគាត់ចូលរូបមែន ហេតុអ្វីនិយាយភាអង់គ្លេសបាន។

ក្រុមប្រជាពលរដ្ឋជាច្រើន ដែលកំពុងតវ៉ា នៅមុខសាលាដំបូងរាជធានីភ្នំពេញ បានឲ្យដឹងថា ទំនងស្រ្តីខាងលើ ធ្លាប់មានបញ្ហាអ្វីធ្ងន់ធ្ងរ ជាមួយតុលាកានេះ បានជាគាត់មកបញ្ចេញកំហឹង យ៉ាងខ្លាំងក្លាបែបនេះ។ អ្នកទាំង​នោះ​បន្តទៀតថា ការនិយាយរបស់គាត់ មិនមែនជារឿងខុសទេ គឺជាការពិត ព្រោះមានរឿងមួយចំនួន មិនទាន់​ដឹងខុសត្រូវពិតប្រាកដទេ ក៏ស្រាប់តែត្រូវជាប់គុកច្រវ៉ាក់ជាដើម។

ដោយឡែក អ្នកសារព័ត៌មាន មិនអាចជួបសួរនាំបន្ត ពីអ្នកស្រី ធីតា បានទេ ព្រោះអ្នកស្រីបានធ្វើដំណើរ​ចេញ​ទៅបាត់ ក្រោយពីការដេញចេញ របស់បុរសម្នាក់ខាងលើ៕