ផៃ ស៊ីផាន៖ បណ្ដឹង​​ចោទ​​​នៅ ICC ជា​​ការ​​បង្កាច់​​បង្ខូច​​នៃ​​ក្រុម​​«អ្នក​​ថា​​មិន​​ដែល​​ធ្វើ»

បណ្ដឹងចោទប្រកាន់មន្ត្រីរដ្ឋាភិបាល និងបរិហាពីនយោបាយ របស់រដ្ឋាភិបាលកម្ពុជា នៅសាលាក្ដីព្រហ្មទណ្ឌអន្តរជាតិ បានជំរុញឲ្យមន្ត្រីរដ្ឋាភិបាល លោក ផៃ ស៊ីផាន ធ្វើប្រតិកម្ម។ លោកបានវាយបកវិញថា នោះ គ្រាន់តែជាការ បង្កាច់បង្កូច នៃក្រុមអ្នក«ថា» មិនដែល«ធ្វើ»ប៉ុណ្ណោះ។
Loading...
  • ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី០៨ តុលា ២០១៤
  • កែប្រែចុងក្រោយ: October 08, 2014
  • ប្រធានបទ: ដីធ្លី
  • អត្ថបទ: មានបញ្ហា?
  • មតិ-យោបល់

ការលើកឡើងរបស់ តុលាការ​ព្រហ្មទណ្ឌ​អន្តរជាតិ (ICC) ក្នុង​រឿង​វិវាទ​ដីធ្លី គ្រាន់​តែ​ជា​ការ​បង្កាច់​បង្កូច នៃ​ក្រុម​អ្នក​«ថា» មិន​ដែល​«ធ្វើ»​ប៉ុណ្ណោះ។ នេះ​ការ​លើក​ឡើង​របស់ មន្ត្រី​អ្នក​នាំ​ពាក្យ​ទីស្ដីការ​គណៈ​រដ្ឋមន្ត្រី លោក ផៃ ស៊ីផាន តប​ទៅ​នឹង​ពាក្យ​បណ្ដឹង​ចោទ​ប្រកាន់​មួយ ដែល​ដាក់​នៅ​ចំពោះ​លោកស្រី អន្តរ​រដ្ឋអាជ្ញា នៃ​សាលា​ក្ដី​ព្រហ្មទណ្ឌ​អន្តរជាតិ ប្ដឹង​មន្ត្រី​រដ្ឋាភិបាលកម្ពុជា និងបរិហាពីនយោបាយ ដែល​ពោរ​ពេញ​ដោយ​ការ​រំលោភ​សិទ្ធិ​មនុស្ស នៅ​ក្នុង​សំនុំ​រឿង​ដីធ្លី​ដ៏​រ៉ារ៉ៃ។

នៅ​លើ​គណនី​ហ្វេសប៊ុក​របស់​លោក មន្ត្រី​ជាន់​ខ្ពស់​រូប​នេះ បាន​សរសេរ​ថា៖ «យើង​ឃើញ​មាន​ពួក​ក្រុម​អ្នក​ថា ច្រើន​ជាង​ធ្វើ និង​បង្ខូច​បង្កាច់ កំពុង​ធ្វើ​ចលនា នៅ​តុលាការ​ព្រហ្មទណ្ឌ​អន្តរជាតិ (ICC) ដើម្បី​ចាប់​កំហុស​រដ្ឋាភិបាល និង​វាយ​ប្រហារ​សម្តេច​តេជោ ដែល​គ្មាន​ធាតុ​ផ្សំ​ក្នុង​ការ​ចោទ​ប្រកាន់ នៃ​សមត្ថកិច្ច​តុលាការ​ព្រហ្មទណ្ឌ​អន្តរជាតិ​នេះ»។

បុគ្គលដែល«បង្កហេតុ និងល្មើសច្បាប់»

ពាក្យ​បណ្ដឹងមួយ ត្រូវបានដាក់កាលពី​​ថ្ងៃ​​ទី​៧ ខែ​​តុលា នៅ​ចំពោះ​មុខ​លោកស្រី ហ្វាទូ ប៊េនស៊ូដា (Fatou Bensouda) អន្តររដ្ឋអាជ្ញា​នៃ​សាលា​ក្ដី​ព្រហ្មទណ្ឌ​អន្តរជាតិ ក្នុង​ទីក្រុង ឡាអេ ប្រទេស​ហូឡង់ ហៅ​កាត់​តាម​ភាសា​បារាំង CPI និង​ភាសា​អង់គ្លេស ICC ប្ដឹងបរិហា​ពី​នយោបាយ​រឹប​អូស​ដី​ធ្លី និង​បណ្ដេញ​មនុស្ស ចេញ​ពី​ភូមិ​ស្រុក​ផ្ទះ​សម្បែង នៅ​ក្នុង​ប្រទេស​កម្ពុជា ក្រោម​របប​ដឹកនាំ​បច្ចុប្បន្ន ដែល​មាន​លោក ហ៊ុន សែន ជា​នាយក​​រដ្ឋ​មន្ត្រី។ មេធាវីអន្តរជាតិដើមបណ្ដឹង លោក រីឆាដ រ៉ូជ័រ (Richard Rogers) បានសរសេរនៅក្នុង​សេចក្ដី​​ប្រកាស​ព័ត៌មានមួយថា៖ «ក្រុមអ្នកមាន​អំណាច បាន​​បង្កើត​ឲ្យមានឧក្រិដ្ឋកម្មយ៉ាងធ្ងន់ធ្ងរ នៅ​ក្នុង​ប្រតិបត្តិការ​ជា​​ប្រព័ន្ធ​មួយ ប្រឆាំង​នឹង​ប្រជាជន​ស៊ីវិល។ (...) ទង្វើទាំងនេះ មានចរិកជា​ឧក្រិដ្ឋកម្ម​ប្រឆាំង​​មនុស្ស​​ជាតិ។»

ប៉ុន្តែ លោក ផៃ ស៊ីផាន បានការពាររដ្ឋាភិបាល ដែលមានរូបលោកជាសមាជិកថា ក្រោមការដឹកនាំរបស់​លោក​នាយករដ្ឋមន្រ្តី ហ៊ុន សែន រដ្ឋាភិបាលបាននឹងកំពុងចាត់ការ ដោះស្រាយទៅតាមនីតិវិធី និងតាម​ជំនាញ​​ពាក់​ព័ន្ធ​ជាបន្តបន្ទាប់។ លោកថែមទាំងបានចាត់ទុក សកម្មភាពនៃអ្នកតវ៉ា អ្នកចង់បានសិទ្ធិ និង​ការ​រស់នៅ​​សមរម្យ​ទាំងនោះ ថាជាបុគ្គលដែល«បង្កហេតុ និងល្មើសច្បាប់»។

អ្នកនាំពាក្យដ៏ល្បីឈ្មោះ បានសរសេចាត់ទុកចលនាទាំងនេះ ថាជាការបង្កើតចលាចលនៅក្នុងសង្គម និង​ជា​ប្រព័ន្ធ ដែលរួមមាន «ទាំងមេខ្យល់ ទាំងអង្គការក្រៅរដ្ឋាភិបាលអសមានចិត្តមួយចំនួន ទាំងថ្នាក់ជាតិ និង​អន្តរជាតិ ជាមួយនឹងប្រព័ន្ធផ្សព្វផ្សាយសាធារណៈជាខេមរភាសា ក៏ដូចជាប្រព័ន្ធព័ត៌មានសង្គម»។

ទាក់ទងនឹងបញ្ហាជម្លោះដីធ្លីនេះ ត្រូវបានមន្រ្តីរាជការម្នាក់ ក្នុងល័ក្ខខ័ណ្ឌសុំមិនបញ្ចេញឈ្មោះ បានលើក​ឡើង​​ថា រាល់ទង្វើ និងសកម្មភាពពាក់ព័ន្ថរឿងព្រៃឈើ ដីធ្លីជាដើម វាកើតឡើង តាមប្រព័ន្ធ និងនិយម​បក្ខពួក។ បើទីតាំងដី ឬតំបន់ណាមួយដែលពួកគេចង់បាន មិនថាលំនៅដ្ឋាន ដីស្រែ ដីចំការ បឹងបួរ ឬដីព្រៃ​ឈើ​ឡើយ ពួកគេត្រូវតែធ្វើ និងកាន់កាប់ភាគច្រើនទៅតាមលក្ខណៈ«ធ្វើនំឥតម្សៅ»។ ជាពិសេស ការទុក​ឲ្យ​​ដំបៅ​ក្លាយ​ជា​ជំងឺ​មហារីក របស់រដ្ឋាភិបាល ហើយមិនឆាប់ដោះស្រាយ ឬក៏មានដំណោះស្រាយគ្មានគតិយុត្តិ និង​គ្មាន​តម្លាភាព។ល។នោះហើយ ដេលធ្វើឲ្យវិបត្តិនេះនៅជាប់គាំងដោះស្រាយមិនបាន ជំរុញឲ្យជនរង​គ្រោះ​ប្ដឹង​ទៅ​ស្ថាប័ន​អន្តរជាតិ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...