បើទោះជាកម្ពុជា មិនមាន​បវរកញ្ញា​ផ្លូវការ ប្រចាំ​ឲ្យ​ប្រទេស​ខ្លួន​ក៏​ដោយ ក៏​គង់​មាន​នារី​ខ្មែរ ដែល​មាន​រូប​សម្ផស្ស​សា្អតៗ នៅ​ត្រូវ​បាន​ពិភពលោក​ទទួល​ស្គាល់​ដែរ។ ពី​ក្នុង​ចំណោម​នោះ មាន​កញ្ញា នូ ទឹមស្រីនៀត ម្នាក់ ដែល​ទើប​នឹង​ទទួល​បាន​ជ័យ​លាភី ជា​បវរកញ្ញា«មាន​ប្រជាប្រិយ​បំផុត​នៅ​ក្នុង​ការ​បោះ​ឆ្នោត (Miss Popular Vote Award)» នៅ​ក្នុង​ការ​ប្រលង​ជ្រើសរើស Miss Grand International 2014 កាល​​ពី​​យប់​ថ្ងៃ​ទី៧ ខែតុលា ក្នុង​រាជធានី​បាងកក ប្រទេស​ថៃ។

មានអាយុ១៩ និងមានកំពស់ ១.៧៣ម៉ែត្រ យុវតី ស្រីនៀត ត្រូវ​បាន​ប្រកាស​ឲ្យ​ចេញ​មក​ទទួល​ពាន​រង្វាន់ ដោយ​​ភាព​ញញឹម​ប្រិមប្រិយ ក្រោយ​ពី​នាង​ទទួូល​បាន​ពិន្ទុ​នៃ​ការ​បោះ​ឆ្នោតដល់​ទៅ ២៧,១៩% នៃ​ការ​បោះឆ្នោត​ទាំង​អស់ ដែល​ធ្វើ​នៅ​តាម​បណ្ដាញ​អ៊ិនធើណែត ទៅ​លើ​បេក្ខនារី​​៨៥​នាក់ មក​ពី​គ្រប់​ទិសទី​ក្នុង​ពិភពលោក។ មាន​ដើម​កំណើត​ពី​ខេត្ត​កណ្ដាល កញ្ញា ស្រីនៀត ជា​និស្សិត​​មួយ​​រូប ដែល​កំពុង​ត្រៀម​សម្រេច ក្ដី​ស្រម័យ​របស់​នាង ដើម្បី​ក្លាយ​ជា​«មេធាវី»​ដ៏​ល្បី ក្នុងពេលអនាគត។

ចំណែកឯបវរកញ្ញា ដែលជាប់ជាម្ចាស់ជ័យលាភី Miss Grand International 2014 បានទៅលើកញ្ញា មក​ពី​ប្រទេស គុយបា។ ចំណែកជ័យលាភីផ្សេងទៀត ដូចជា បវរកញ្ញា Best Evening gown ត្រូវបាន​ជាប់​ទៅលើ​កញ្ញា មក​ពីប្រទេស ឥណ្ឌូនេស៊ី - បវរកញ្ញា Best Social media បានទៅលើកញ្ញា មកពីប្រទេស ជប៉ុន - បវរកញ្ញា Best National Costume បានទៅលើកញ្ញា មកពីប្រទេសវៀតណាម និងបវរកញ្ញា Best Swimsuit បាន​ទៅ​​លើ​​កញ្ញា មកពីប្រទេស ថៃ (ម្ចាស់ផ្ទះ)៕

សូមទស្សនាការប្រកួតបវរកញ្ញានេះឡើងវិញ ក្នុងខ្សែវីដេអូខាងក្រោម៖