កងកម្លាំងចម្រុះយ៉ាងហោច ជាង២ពាន់នាក់នៅរសៀលថ្ងៃទី០៦ ខែមីនា នេះ ត្រូវបានរដ្ឋាភិបាលគ្រប់គ្រង​ដោយ​គណបក្ស​ប្រជាជន​កម្ពុជា ដាក់ពង្រាយឲ្យធ្វើសមយុទ្ធបង្រ្កាបបាតុកម្ម នៅពហុកីឡាដ្ឋានជាតិអូឡាំពិក។ ការធ្វើ​សមយុទ្ធនេះ គឺស្រប​ពេលដែលសហជីពយ៉ាងតិច១៨ និងសកម្មជនសិទ្ធិមនុស្សមួយចំនួនទៀត បានប្ដេជ្ញាថា នឹងធ្វើ​វេទិការសាធារណៈ និងបាតុកម្ម នៅថ្ងៃទី០៨ និងទី១២ មីនា តាមការគ្រោងទុក បើទោះមិនមានការអនុញ្ញាត​ពី​អាជ្ញាធរ​ក៏ដោយ។

កងកម្លាំងប្រមូលគ្នាធ្វើសមយុទ្ធកណ្ដាលក្រុង ថ្ងៃទី០៦ ខែមីនា ឆ្នាំ២០១៤។ (រូបថត ហ្វេសប៊ុក)

សុវត្ថិភាព - មន្រ្តីអ្នកនាំពាក្យកងរាជអាវុធហត្ថជាតិ លោក ខេង ទីតូ បានថ្លែងប្រាប់ទស្សនាវដ្តីមនោរម្យ.អាំងហ្វូ នៅ​ថ្ងៃទី០៦ មីនា នេះថា ប្រជាពលរដ្ឋ និងមជ្ឈដ្ឋានទូទៅ មិនគួរមានការភ្ញាក់ផ្អើលនឹងវត្តមានកងកម្លាំងចម្រុះ ដែលត្រូវ​ដាក់ពង្រាយនៅពហុកីឡាដ្ឋានជាតិ អូឡាំពិកនោះទេ ព្រោះវាគ្រាន់តែជាការហ្វឹកហាត់ ជាធម្មតារបស់កង​កម្លាំង​សមត្ថកិច្ចតែប៉ុណ្ណោះ។

លោក ខេង ទីតូ ពន្យល់ថា៖ «សកម្មភាពនេះ គ្នានបំណងអ្វីទេ កម្លាំងប្រដាប់អាវុធ តែងហ្វឹកហាត់ជាប្រចាំអញ្ចឹង ដើម្បីពង្រឹងស្មារតី និងយុទ្ធសាស្រ្ត។ វាជាសមយុទ្ធ ការងារជំនាញ ព្រោះនៅពេលដែលយើងត្រូវការប្រើប្រាស់ យើង​ច្បាស់នឹងការងារតែម្តង ដើម្បីកុំឲ្យមានការឆ្គាំឆ្គង។»។

សមយុទ្ធដែលមានកម្លាំងចូលរួមប្រហែលជាង២ពាន់នាក់នេះ ត្រូវបានគេកត់សម្គាល់ឃើញថា មានកម្លាំង​ចូលរួម​មកពីខណ្ឌទាំង៩ និងការិយាល័យចំណុះឱ្យស្នងការដ្ឋាននគរបាលរាជធានីភ្នំពេញ ក្រោមការដឹកនាំបញ្ជាផ្ទាល់ពី​លោក ជួន សុវណ្ណ ជាស្នងការនគរបាលរាជធានីភ្នំពេញ និងសមត្ថកិច្ចពាក់ព័ន្ធផ្សេងទៀត ។

ក្នុងសមយុទ្ធបែបកំញើញនេះ គេក៏ឃើញមាន ការតាំងលម្អដោយ រថយន្តពន្លត់អគ្គិភ័យ និងរថយន្តសង្គ្រោះ​ជាច្រើន​ទៀត ពិសេសរថយន្តបំពាក់ដោយរបាំងការពារ សម្រាប់រុញច្រានក្រុមបាតុករ ក្នុងករណីប្រឈម ដែលទើប​តែ​នាំ​ចូល​ពីបរទេសកាលពីពេលថ្មីៗនេះ។ លោក ជួន សុវណ្ណ បានព្រលយឲ្យអ្នកសារព័ត៌មានដឹងថា សមយុទ្ធនាពេលនេះ ធ្វើ​ឡើងដើម្បីត្រៀមការពារ ការធ្វើបាតុកម្មនៅថ្ងៃទី០៨ និង១២មីនា ខាងមុខនេះ។

នៅថ្ងៃទី០៨ និងថ្ងៃទី១២ ខែមីនា គឺជាថ្ងៃដែលសហជីពយ៉ាងតិច១៨ និងសកម្មជនសិទ្ធិមនុស្ស មួយចំនួនទៀត បាន​ប្ដេជ្ញាថា នឹងដឹកនាំធ្វើវេទិការសាធារណៈ និងធ្វើបាតុកម្ម នៅទីលានប្រជាធិបតេយ្យ ជាកំហិត បើទោះសាលារាជធានី​ភ្នំពេញ និងក្រសួងមហាផ្ទៃបានបដិសេធគោលជំហររបស់ពួកគេក៏ដោយ។ ក្រុមសហជីពទាំងនោះបានអះអាងថា គោលបំណងនៃកម្មវិធីរបស់ពួកគេ គឺទាមទារដំឡើងប្រាក់ឈ្នួលគោលដល់កម្មករ១៦០ដុល្លារ និងទាមទារឲ្យ​ដោះ​លែងជន២១ នាក់ ដែលត្រូវសមត្ថកិច្ចចាប់ខ្លួន កាលពីពេលធ្វើបាតុកម្មកន្លងមក។

យោងលើមន្រ្តីសិទ្ធិមនុស្ស និងអ្នកច្បាប់ បានឲ្យដឹងថា បើយោងលើច្បាប់ស្តីពីការធ្វើបាតុកម្ម បាតុករ ឬអ្នករៀបចំ​ដឹកនាំបាតុកម្ម មិនតម្រូវឲ្យសុំច្បាប់អនុញ្ញាតនោះទេ តែចាំបាច់ត្រូវជូនដំណឹងទៅអាជ្ញាធរ ឬសមត្ថកិច្ចពាក់ព័ន្ធ ជា​ការស្រេច។ តែសម្រាប់មន្រ្តីអ្នកនាំពាក្យកងរាជអាវុធហត្ថជាតិ លោក ខេង ទីតូ បានបញ្ជាក់ថា៖ «បើរដ្ឋអំណាច ឬ​អាជ្ញាធរគេមិនឲ្យធ្វើ ហើយបាតុករនៅតែរឹងធ្វើ អាហ្នឹងដល់ពេលមានបទបញ្ជា មិនដឹងធ្វើមិចទេ មានតែអនុវត្តតាម​ផ្លូវ​ច្បាប់ហ្នឹងហើយ»។

«ផ្លូវច្បាប់» របស់អ្នកនាំពាក្យកងរាជអាវុធហត្ថជាតិ ដែលរហូតមកដល់ម៉ោងនេះ អ្នកសារព័ត៌មានរក​មិនឃើញ​ថា​មានចែងនៅមាត្រាណា និង​ដោយនរណា​នោះ​ឡើយ៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី០៦ មីនា ២០១៤