«ទាំងចៅក្រមកាត់សេចក្តីលំអៀង យ៉ាងធ្ងន់ធ្ងរ ទៅលើដើមបណ្តឹងរដ្ឋប្បវេណី បានកាត់នូវការសួរដេញដោលរបស់​មេធាវីជាច្រើន នៅពេលមេធាវីសួដេញដោលទៅលើអង្គហេតុជាក់លាក់ ចៅក្រមខ្លួនឯងអ្នកកាត់ជំនួសតំណាង​អយ្យការទៀត។ នេះជាភាពលំអៀង នៃដំណើរការសវនាការក្នុងពេលព្រឹកនេះ។» នេះជាការលើកឡើង របស់លោក នី ចរិយា ប្រធានផ្នែកអង្កេតរបស់សមាគមការពារសិទ្ធិមនុស្សអាដហុក ក្នុងកិច្ចសម្ភាសជាមួយអ្នកសារព័ត៌មាន នៅ​មុខ​សាលាដំបូងក្រុងភ្នំពេញ។

ក្រុមអ្នកតវ៉ានៅមុខសាលាដំបូងរាជធានី។ (រូបថត សហការី)

ប្រព័ន្ធយុត្តិធម៌ - ក្រោមទិដ្ឋភាពនៃការសួរដេញដោល លោក នី ចរិយា លើកឡើងថា ចៅក្រមសវនាការ​សំអាង​លើ​រូបថតតែពីរសន្លឹក និងស្ថិតនៅក្រៅអង្គហេតុ ទាញដាក់បន្ទុកលើជនទាំង២១នាក់នោះ។ ដោយជំហរលំអៀង​របស់​ចៅក្រមទាងនោះ បានធ្វើឲ្យអ្នកគាំទ្រនៅក្រៅតុលាការ បានស្រែកសន្ធាប់កាន់តែខ្លាំងឡើងៗ និងអំពាវនាវឲ្យមន្រ្តី​តុលាការដែលកំពុងអនុវត្តច្បាប់ ធ្វើការគោរពច្បាប់ ជាមួយនឹងការដោះលែងអ្នកទាំង២១នាក់ ហើយចាប់ជន​«ប្រើ​ហិង្សា​ពិតប្រាកដ»មកផ្តន្ទាទោសតាមច្បាប់វិញ។

ក្នុងកិច្ចសម្ភាសជាមួយអ្នកសារព័ត៌មាន អ្នកស្រី បូ ឆវី ប្រជាពលរដ្ឋមកពីបឹងកក់ ទាមទារឲ្យ​តុលាការ​ចាប់មន្រ្តី​កងទ័ព​ឆ័ត្រយោង ដែលប្រើអំពើហិង្សា បាញ់សម្លាប់កម្មករ ចាប់ប្រជាពលរដ្ឋវាយធ្វើបាប ត្រូវ​តែចាប់មកផ្តន្ទាទោសទៅ​តាម​ច្បាប់។ អ្នកស្រីបានបញ្ជាក់ដូច្នេះថា «បើតុលាការបំរើរាស្រ្តពិតប្រាកដ តុលាការយុត្តិធម៌ តុលាការនឹងដោះលែង​អ្នក​ទាំង២៣នាក់។ បើតុលាការពុករលួយ តុលាការមិនយុត្តិធម៌ តុលាការមិនឯករាជ្យទេ នោះអ្នកទាំង២៣នាក់ នឹងមិន​មានសេរីភាព និងយុត្តិធម៌នោះទេ។»

លើកឡើងប្រហែលគ្នានេះដែរ អ្នកស្រី យ៉ោម បុប្ផា មកពីសហគមន៍បឹងកក់ បានបន្ថែមទាំងទឹកភ្នែកថា តុលាការធ្វើ​ឡើងជាសាធារណៈ តែផ្ទុយមកវិញជើញមានកងកម្លាំងយ៉ាងសន្ធឹកសន្ធាប់ ជាមួយនឹងរបាំង រនាំង និងបន្លាលួស។ «យើងមានការបារម្មណ៍ ព្រោះប្រព័ន្ធតុលាការយើង មានឈ្មោះស្អុយរលួយទូទាំងពិភពលោកថា គ្មាន​ភាព​យុត្តិធម៌។ ខ្ញុំសុំផ្តាំផ្ញើរទៅរដ្ឋាភិបាលថា កុំយកតុលាការមកលេងជាឆាកល្ខោន ខ្ញុំគិតថាអំណាចទាងអស់នៅក្នុងដៃរដ្ឋាភិបាល ដូច្នេះគួពិចារណា ត្រូវតែដោះលែងអ្នកទាំង២១នាក់ និងផ្តល់យុត្តិធម៌មកអ្នកទាំង២៣នាក់វិញ។»

លោកស្រី មួរ សុខហួរ បេក្ខជនតំណាងរាស្ត្រជាប់ឆ្នោត មកពីគណបក្សសង្គ្រោះជាតិ ដែលមានវត្តមាន​នៅជុំវិញ​តុលាការនោះ បានលើកឡើយដោយខ្លីថា «ភ្នែករបស់យើង ត្រចៀករបស់យើង មាត់របស់យើង។ យើងឃើញ​ការ​ពិត យើងលឺការពិត យើងនិយាយការពិត។ (…) នៅប្រទេសណាក៏ដោយ មានការពិតទើបមានយុត្តិធម៌ មានការ​ពិត​មានប្រជាធិបតេយ្យ។»

អ្នកស៊ើបអង្កេតជាន់ខ្ពស់ របស់អង្គការការពារសិទ្ធិមនុស្សអាដហុក លោក ចាន់ សូវ៉េត បានបញ្ជាក់ថា សវនាការ​ថ្ងៃ​នេះមានច្រើនបន្ទប់ មិនអាចបញ្ចប់ក្នុងថ្ងៃនេះបានទេ។ ចៅក្រមកាត់សេចក្តី ទៅតាមរឿងនីមួយៗដោយឡែកៗពីគ្នា។ លោកបន្តថា ដូចជារឿងវ៉េងស្រេងនៅបន្ទប់លេខ២ រឿងអេសអិល នៅបន្ទប់លេខបីជាដើម។ តាមការ​រាយការណ៍ នៃអ្នកយកព័តមានរបស់ទស្សនាវដ្តីមនោរម្យ.អាំងហ្វូ បន្ថែមថា នារសៀលថ្ងៃទី២៥ ខែមេសានេះ តុលាការត្រូវ​បិទ​សវនាការមិនមានការប្រកាសជាលទ្ធផលទេ។ តែតុលាការបានប្រកាសថា នឹងបន្តសវនាការជាថ្មីនៅព្រឹកថ្ងៃទី៦ ខែ​ឧសភា ឆ្នាំ២០១៤ខាងមុខ។

ក្នុងរយៈពេលនេះ ជនត្រូវចោទទាំង២១នាក់ ត្រូវបានបញ្ជូនចេញយ៉ាងសម្ងាត់ចេញពីសាលាដំបូង ឆ្ពោះទៅកាន់​ពន្ធនាគារព្រៃសរវិញ។ តែមិនដឹងថា ក្នុងរយៈពេលរងចាំថ្ងៃឡើងសវនាការ ទី៦ ខែឧសភាខាងមុខ ជនទាំង២១​នាក់​នេះ នឹងត្រូវបញ្ជូនជាបន្តត្រឡប់ទៅកាន់ពន្ធនាគារត្រពាំងផ្លុងវិញ ឬយ៉ាងណានោះទេ៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី២៥ ខែមេសា ឆ្នាំ២០១៤