នៅថ្ងៃទី១៧ ខែកញ្ញានេះ សហព័ន្ធសហជីពទាំង៨ នឹងធ្វើយុទ្ធនាការ មួយដើម្បីទាមទារប្រាក់​១៧៧​ដុល្លា។ លោក កង រីណា មន្រ្តីផ្នែកតស៊ូមតិ នៃសហភាពការងារកម្ពុជាបានឱ្យដឹងថា គោលបំណងនៃ​យុទ្ធនាការ​នេះ ដើម្បីទាមទារការតម្លើងប្រាក់ឈ្នួល ឱ្យកម្មករក្នុងវិស័យកាត់ដេរ ឱ្យបាន១៧៧ដុល្លា។

លោកបន្តថា មូលហេតុដែលសហជីពទាមទារ ឱ្យនិយោជកតម្លើងប្រាក់ឈ្នួលដល់១៧៧ដុល្លានេះ ដោយ​សំអាងទៅលើការស្រាវជ្រាវ របស់គណកម្មការសិក្សាស្រាវជ្រាវមួយ ដែលបានចេញផ្សាយនូវរបាយនេះ កាល​ពីថ្ងៃទី១៦ ខែធ្នូ ឆ្នាំ២០១៣ ដែលបញ្ជាក់ថា កម្មករអាចរស់នៅដោយសមរម្យបាន ចន្លោះពី ១៥៧ ទៅ ១៧៧ដុល្លា។

យុទ្ធនាការថា្នក់ជាតិ និងអន្តរជាតិនេះ នឹងមិនប៉ះពាល់ដល់ការធ្វើការងាររបស់កម្មករឡើយ ដោយគ្រាន់តែ​សកម្មជនរបស់សហជីព ដើរទៅតាមបណ្តារោងចក្រនានា ផ្សព្វផ្សាយ និងពន្យល់កម្មករ ពីយុទ្ធនាការនេះ។ បន្ទាប់ពីចុះពន្យល់កម្មករដល់មូលដ្ឋាន យុទ្ធនាការនេះ នឹងបន្តធ្វើនៅតាមបណ្តាញផ្សព្វផ្សាយ ដូចជា​ហ្វេសប៊ុក និង សន្និសិទ្ធការសែតជាដើម។ យុទ្ធនាការ១៧៧ដុល្លានេះ នឹងមិនកំណត់រយៈពេលឡើយ។

មន្រ្តីសហជីពដដែលនេះ ពន្យល់យ៉ាងដូច្នេះថា៖ «យើងព្យាយាម មិនឱ្យប៉ះពាល់ម៉ោងធ្វើការកម្មករ យើង​នឹង​ចុះទៅពន្យល់ពួកគាត់ នៅពេលដែលគាត់សម្រាក ពេលអាហារថ្ងៃត្រង់។ ហើយយុទ្ធនាការរបស់យើង នឹងមិនកំណត់រយៈពេលទេ យើងនឹងធ្វើរហូត ទាល់តែទទួលបានជោគជ័យ ទទួលបាននូវតម្រូវការ​ពិត​ប្រាកដរបស់បងប្អូនកម្មករយើង។»។

ដំណាលគ្នា នឹងយុទ្ធនាការថ្នាក់ជាតិនេះដែរ សម្ព័ន្ធសហជីពទាំង៨ ក៏ធ្វើយុទ្ធនាការស្របគ្នានឹង យុទ្ធនាការ​ថ្នាក់អន្តរជាតិដើម្បី អំពាវនាវឱ្យសហជីពអន្តរជាតិ ក្នុងការដាក់សម្ពាធទៅលើអ្នកបញ្ជាទិញ ផ្តល់ប្រាក់ឈ្នួល​ឱ្យកម្មករក្នុងកម្រិតដែលបានទាមទារ។

កន្លងមក ក្នុងពេលដែលកម្មករទាមទារ ឱ្យមានការតម្លើងប្រាក់ឈ្នួលដល់១៦០ដុល្លា ត្រូវបានទទូលនូវ​ការ​បង្រ្កាបយ៉ាងចាស់ដៃ ពីសំណាក់សមត្ថកិច្ច និងមានការលើកឡើងពីមន្ត្រីរដ្ឋាភិបាល ក៏ដូចជានិយោជកថា ប្រសិនបើតម្លើងប្រាក់ឈ្នួលដល់កម្រិតមួយ ដែលកម្មករទាមទារនោះ ឧស្សាហកម្មរោងចក្រកាត់ដេរ​នៅ​កម្ពុជា អាចនឹងត្រូវបិទទ្វារ។ ទោះបីជាមានការលើកឡើងយ៉ាងនេះក្តី ប៉ុន្តែមន្រ្តីសហជីពរូបនេះបាន​បង្ហាញ​ជំនឿចិត្ត រដ្ឋាភិបាល ខាងនិយោជក និងភាគីបញ្ជាទិញ នឹងធ្វើការសម្រេចចិត្តមួយ ក្នុងការផ្តល់ប្រាក់ឈ្នួល ដល់១៧០ដុល្លា សម្រាប់កម្មករក្នុងប្រទេសកម្ពុជាទាំងអស់៕