កាលពីថ្ងៃទី២៦ ខែកុម្ភៈ ឆ្នាំ២០១៤ តំណាងថ្នាក់ដឹកនាំសហជីព ដែលបានដឹកនាំកម្មករធ្វើបាតុកម្មកន្លងមក បាន​ចេញលិខិតជូនដំណឹងមួយ ទៅសមាគមរោងចក្រកាត់ដេរកម្ពុជា (តំណាងថៅកែរោងចក្រ) ស្តីពីការធ្វើកូដកម្ម​នៅ​តាមក្រុមហ៊ុនសហគ្រាស គ្រឹះស្ថានដោយអត់ចូលធ្វើការចាប់ពីថ្ងៃទី១២ ខែមិនា ឆ្នាំ២០១៤ តទៅបើគ្មាន​ដំណោះ​ស្រាយ។

ក្រុមកម្មករធ្វើបាតុកម្មនៅខាងមុខក្រសួងការងារ លើវិថីសហព័ន្ធរ៉ូស្ស៊ី កាល់ពីថ្ងៃទី៣១ខែធ្នូឆ្នាំ២០១៣។ (រូបថត MONOROOM.info/O.Vary)

វិបត្តិការងារ - សេចក្តីជូនដំណឹងរបស់តំណាងថ្នាក់ដឹកនាំសហជីពទាំងនោះ បានបញ្ជាក់ថា ដោយសារការរស់​នៅ​របស់​កម្មករនិយោជិក​បច្ចប្បន្ននេះ មានការលំបាក ដែលបណ្តាលមកពីប្រាក់ឈ្នួលតិចតួច វាពិតជាមិនអាច​ធ្វើ​ឲ្យ​ពួកដោះស្រាយការលំបាកបានឡើយ ព្រោះការស្រាវជ្រាវរបស់គណៈកម្មការត្រីភាគីឃើញថា យ៉ាងហោចណាស់​កម្មករម្នាក់ៗ ត្រូវចំណាយពី១៥៧ដុល្លាដល់ ១៧៧ដុល្លា។

ការធ្វើកូដកម្មចាប់ពីថ្ងៃទី១២ មិនាតទៅនេះ តំណាងថ្នាក់ដឹកនាំសហជីពទាំងនោះ ទាមទារអោយរដ្ឋាភិបាល និង​និយោជកដោះស្រាយបញ្ហាមួយចំនួន ដូចជាទី១ សុំដោះលែងជនជាប់ចោទទាំង ២១នាក់ និងទម្លាក់ចោល​ការចោទ​ប្រកាន់មនុស្ស ២៣នាក់ទាំងស្រុង។ ទី២ ស្នើសុំឲ្យមានការចរចាដំឡើងប្រាក់ឈ្នួលគោល ១៦០ដុល្លារឡើងវិញ។ ទី៣ ត្រូវដាក់ទោសដល់ជនល្មើសដែលបានប្រើហិង្សា និងសម្លាប់កម្មករព្រមទាំងផ្ដល់សំណងជំងឺចិត្ត​ដល់ជនរង​គ្រោះដែល បាត់បង់ជីវិត រងរបួស និងជាប់ឃុំឃាំង។ ទី៤ រដ្ឋាភិបាលត្រូវដកបម្រាម​នៃការជួបជុំជាសាធារណៈមិន​ឲ្យ​លើសពី ១០នាក់ចេញ។ ទី៥ តំណាងក្រុមហ៊ុនត្រូវដកបណ្ដឹងដែលប្រឆាំងសហជីព និងកម្មករនិយោជិក​ទាំងអស់។ ទី៦ និយោជកត្រូវទទួលយកកម្មករ ដែលបានបញ្ឈប់ពីការងារឲ្យចូលធ្វើការវិញ និងត្រូវបង់ប្រាក់រំលឹកដល់ពួកគេ និងទី៧ និយោជកត្រូវផ្ដល់ប្រាក់ឈ្នួល និងប្រាក់រង្វាន់ដល់កម្មករក្នុងអំឡុងពេលកម្មករធ្វើកូដកម្មកន្លងមក។

សម្រាប់ការដកបម្រាមនៃការជួបជុំសាធារណៈ ត្រូវបានលោកនាយករដ្ឋមន្ត្រី ហ៊ុន សែន ប្រកាសលប់ចោលរួចហើយ កាលពីថ្ងៃអង្គារទី ២៥ ខែកុម្ភៈកន្លងមកនេះ។ រីការការទាមទាររបស់ក្រុមសហជីពទាក់ទងនឹង ការបើកកិច្ចការចរចា​ឡើងវិញ អ្នកនាំពាក្យក្រសួងការងារ លោក ហេង សួរ បានបញ្ជាក់យ៉ាងខ្លី​តបទៅនឹងការសាកសួរ របស់ទស្សនាវដ្ដី​មនោរម្យ.អាំងហ្វូ នៅថ្ងៃទី២៧ ខែកុម្ភៈ នេះថា បញ្ហារឿងប្រាក់ឈ្នួលកម្មករ រដ្ឋាភិបាលមិនដែលបិទផ្លូវចរចានោះទេ។

ចំពោះការតម្លើងប្រាក់ឈ្នួលគោលកម្មករវិញ បើយោងតាមសេចក្តីសម្រេចរបស់ក្រសួងការងារ និងបណ្តុះ​បណ្តាល​វិជ្ជាជីវៈ ចុះថ្ងៃទី៣១ ខែធ្នូ ឆ្នាំ២០១៣ បាន​សម្រេចតម្លើង​ប្រាក់ឈ្នួលបន្ថែម៥ដុល្លាបន្ថែមទៀត ទៅលើប្រាក់ខែ​គោល​៩៥ដុល្លា ដែលបានកំណត់​កាលពីថ្ងៃ​ទី២៤ ខែធ្នូ ឆ្នាំ​២០១៣ ហើយនឹងចាប់ផ្ដើមអនុវត្តពីពីខែកុម្ភៈ ឆ្នាំ២០១៤ នេះ​ត​ទៅ។ តែប្រាក់ខែ១០០ដុល្លា ដែលក្រសួង​ការងារបាន​សម្រេចនោះ មិនត្រូវបានកម្មករទទួលយកនោះទេ បង្កឲ្យ​មាន​ការងើបតវ៉ាជាបន្តបន្ទាប់ រហូតមានយុទ្ធនាការបង្ក្រាបយ៉ាងរង្គាល ពីសំណាក់កងកម្លាំងគ្រប់គ្រងដោយរដ្ឋាភិបាល កាលពីដើមឆ្នាំ២០១៤នេះ។

កាលពីថ្ងៃទី២៥ ខែកុម្ភៈកន្លងទៅ ក្រុមសហជីពទាំងនោះ ទើបបានបញ្ចប់យុទ្ធនាការរបស់ខ្លួន ក្នុងការចែកខិតប័ណ្ណ​អំពាវអោយកម្មករចូលរួម ធ្វើបាតុកម្មនៅថ្ងៃទី១២ ខាងមុខនេះ។ រីឯសភាសហព័ន្ធសហជីពជាតិកម្ពុជា ដែលជា​សហជីពមាននិន្នាការគាំទ្ររដ្ឋាភិបាល កាលពីថ្ងៃទី២០ កុម្ភៈកន្លងមក បានអំពាវនាវដល់សមាជិករបស់ខ្លួនផងដែរ មិនអោយចូលរួមធ្វើបាតុកម្មជាមួយសហជីពទាំងនោះ និងអោយខិតខំធ្វើការថែមម៉ោង៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ២៧ កុម្ភៈ ២០១៤