ប្រធានសហជីពសេរីកម្មករ លោក ជា មុនី បានដាក់លិខិតស្នើមួយទៅក្រសួងការងារ កាលពីថ្ងៃទី ០៥ ខែមិនា ម្សិល​មិញនេះ ដើម្បីអោយក្រសួង​មួយនេះបញ្ជាក់អោយច្បាស់ នៃការដាក់ចេញនូវគោលការណ៍ និងវិធានអោយបាន​ច្បាស់លាស់ ស្តីពីការចុះ​បញ្ជីការ​នៃអង្គការវិជ្ជាជីវៈ។

លោក ជា មុន្នី ប្រធានសហជីពសេរីកម្មករ។ (រូបថត សហការី)

សហជីព - បន្ទាប់ក្រសួងការងារមិនចុះបញ្ជីការ នៅតាមរោងសហគ្រាសមួយចំនួន លោកជា មុន្នី ប្រធានសហជីព​សេរីកម្មករនៃព្រះរាជាណាចក្រកម្ពុជា កាលពីថ្ងៃទី០៥ ខែមិនា ឆ្នាំ២០១៤ បានដាក់លិខិតមួយជូនដល់លោក អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈដើម្បីស្នើរសុំ និងបញ្ជាក់ស្តីពីករណីការសុំចុះបញ្ជីការ​សហជីពសេរីកម្មករនៃរោងចក្រ សហគ្រាស ក្រុមហ៊ុន និងគ្រិះស្ថានថ្មីៗមួយចំនួន ។

ក្នុងលិខិតរបស់សហជីពសេរីកម្មករនៃព្រះរាជាណាចក្រកម្ពុជា បានបញ្ជាក់ថា ខណៈពេលដែល​សហជីពសេរីកម្មករ​នៃព្រះរាជាណាចក្រកម្ពុជាស្នើសុំចុះបញ្ជីកាសហជីពសេរីកម្មករនៃបណ្តារោងចក្រ សហគ្រាស ក្រុមហ៊ុន និង​គ្រឹះស្ថាន​ថ្មីៗមួយចំនួន ជូនទៅក្រសួងការងារនិងបណ្តុះបណ្តាលវិជ្ជាជីវៈ មន្រ្តីទទួលបន្ទុកសំណុំឯកសារ បាន​តម្រូវ​អោយសហជីពភ្ជាប់ជាមួយ នូវលិខិតថ្កោលទោស ចេញដោយក្រសួងយុត្តិធម៌ ដែលមិនមានចែងនៅក្នុងប្រកាស​លេខ០២១ កកបវ.ប្រក ចុះថ្ងៃទី១៥ ខែកុម្ភៈ ឆ្នាំ២០០៦ របស់ក្រសួងការងារ និងបណ្តុះបណ្តាលវិជ្ជាជីវៈ ស្តីពីការចុះ​បញ្ជីនៃអង្គការវិជ្ជាជីវៈឡើយ និងកាលពីមុនមកមិនធ្លាប់មានបែបហ្នឹងឡើយ។

នៅថ្ងៃទី០៦ ខែមិនា ឆ្នាំ២០១៤នេះ ទស្សនាវដ្ដីមនោរម្យ.អាំងហ្វូ មិនអាចធ្វើការទាក់ទងក្រសួងការងារ​ និងបណ្តុះ​បណ្តាលវិជ្ជាជីវៈបានទេ ដោយគ្មានអ្នកទទួលទូរស័ព្ទ។

តែតាមការលើកឡើង នៅក្នុងលិខិតរបស់លោកជា មុន្នី ដដែល បានអោយដឹង ថាប្រសិនបើក្នុងករណីក្រសួងការងារ និងបណ្តុះបណ្តាលវិជ្ជាជីវៈ មានគោលការណ៍ថ្មីស្តីពីការចុះបញ្ជីការរបស់អង្គការវិជ្ជាជីវៈ ដែលតម្រូវអោយ​មានលិខិត​ថ្កោលទោស សំរាប់យកមកអនុវត្តជាទូទៅនោះ សូមអោយមានវិធានការដូចជា ទី១. ក្រសួងគួរតែចេញក្រកាស​ស្តីពី​ការចុះបញ្ជីការនៃអង្គការវិជ្ជាជីវៈនានា ចូលរួមអនុវត្តន៍ ប្រសើរជាងដាក់ចេញនូវគោលការណ៍ថ្មី តាមរយៈការប្រាប់​មាត់ទទេ។ ទី២. ក្រសួងគួរតែ សម្រេចនិរាសករណ៍ប្រកាសលេខ០២១ កកបវ.ប្រក ចុះថ្ងៃទី១៥ ខែកុម្ភៈ ឆ្នាំ២០០៦ ស្តីពីការចុះបញ្ជីការ នៃអង្គការវិជ្ជាជីវៈចោលជាអសាបង់ជាមុនសិន ដើម្បីអោយអង្គការវិជ្ជាជីវៈងាយស្រួល ចូលរួម​អនុវត្តន៍​ប្រកាសថ្មីរបស់ក្រសួងអោយមានប្រសិទ្ធិភាព។

ផ្តល់បទសម្ភាសមួយជាមួយវិទ្យុបារាំងអន្តរជាតិ លោក ជា មុន្នី បានអះអាងថា ការចុះបញ្ជីការនេះ រដ្ឋាភិបាលមាន​កំហុស​ឆ្គងច្រើន ដែលលោកយល់ថាបន្ទាប់ពីផ្ទុះ បាតុកម្ម-កូដកម្មទាមទារប្រាក់ឈ្នួលគោល១០៦ដុល្លា កាលពីចុង​ឆ្នាំ២០១៣ និងដើមឆ្នាំ២០១៤ មកការចុះបញ្ជីការនៃអង្គការវិជ្ជាជីវៈ មានលក្ខណៈប្លែក និងមានរោងចក្រសហគ្រាស ជាច្រើនមិនត្រូវបានអនុញ្ញាតអោយចុះបញ្ជី៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) -ភ្នំពេញ ថ្ងៃទី ០៦ មិនា ២០១៤