បណ្តឹងសារទុក្ខសុំនៅក្រៅឃុំរបស់លោក វន់ ពៅ ត្រូវបានសាលាឧទ្ធរណ៍ តម្កល់សាលដីការ«បដិសេធ» ជាលើកទី២ បើទោះបីជាការស៊ើបអង្កេត បានចំណាយពេលជិត «បីខែ» ហើយក៏ដោយ។

ក្រុមអ្នកទាមទារឲ្យដោះលែងលោក វន់ ពៅ នៅមុខសាលាឧទ្ទរណ៍ ថ្ងៃទី២៤ ខែមីនា ឆ្នាំ ២០១៤។ (រូបថត MONOROOM.info/ O. Vary)

ប្រព័ន្ធយុត្តិធម៌ - ដំណើការនៃអង្គជំនុំជម្រះ បានចាប់ផ្តើមបើកសវនាការនៅវេលាម៉ោងជាង២ រសៀល ដែល​មាន​លោក សេង ស៊ីវត្ថា ជាប្រធានអង្គជំនុំជម្រះ រួមទាំងចៅក្រមប្រឹក្សាចំនួនរូប និងព្រះរាជអាជ្ញាលោក អ៊ឹម សុផា ដែល​សម្រេចទៅលើបណ្តឹងសារទុក្ខ សុំនៅក្រៅឃុំ របស់លោក វន់ ពៅ ប្រធានសមាគមប្រជាធិបតេយ្យ​ឯករាជ្យនៃ​សេដ្ឋកិច្ចក្រៅប្រព័ន្ធ។

បន្ទាប់បើកអង្គជំនុំជម្រះ អស់រយៈពេលជាងមួយម៉ោង តុលាការនៃសាលាឧទ្ធរណ៍ បានសម្រេចតម្កល់ទុក​សាល​ដីការ​បដិសេធ ទាំងការស្នើសុំនៅក្រៅឃុំ និងទាំងការស្នើសុំវត្ថុតាង ដែលបានរឹបអូសយកក្នុងអំឡុង​ពេលចាប់​ខ្លួន​មានដូចជា មេក្រូ ម៉ូតូកង់បីជាដើម។ នេះបើតាមការបញ្ជាក់របស់លោក មេធាវីការពារក្តីអោយលោក វន់ ពៅ។

មេធាវីរូបនេះ បានអោយដឹងទៀតថា មូលហេតុដែលមិនដោះលែង ដោយសំអាងលើកុំអោយមានការប៉ះពាល់ ទៅ​លើការស៊ើបអង្កេតរបស់តុលាការ។ លោកបន្តថា លោកនឹងត្រៀមពាក្យបណ្តឹងប្តឹងសាទុក្ខ​ទៅសាលាកំពូល​តទៅ​ទៀត និងត្រលប់ទៅប្តឹងនៅតុលាការដំបូងរាជធានី ដើម្បីទាមទារសុំនៅក្រៅឃុំម្តងទៀតក្នុងពេលឆាប់ខាងមុខនេះ។

សវនាការលើកទីពីរនេះ មិនខុសពីលើកទីមួយដែរ គឺជនចោទត្រូវបានអវត្តមាន ។ ចំពោះការអវត្តមានលោក វន ពៅ នៅក្នុងសវនាកា ដោយមូលហេតុ «រថយន្តរបស់ពន្ធគារខូច» ត្រូវបានអ្នកស្រី ប្រាក់ សុវណ្ណារី  ភរិយា​លោក វន់ ពៅ សម្តែងនូវការខកចិត្តយ៉ាងខ្លាំង។ អ្នកស្រីបាននិយាយថា «ដោយសារតែស្វាមីខ្ញុំ ជាកូនក្តីថ្ងៃសវនាការក្តី គួរតែ​អោយ​គាត់មកស្តាប់សវនាការរបស់គាត់។ បើមិនបញ្ជូនមក វាជាហេតុផលមួយមិនសាកសម ព្រោះពេល ដែលបញ្ជូន​ទៅ​មានលទ្ធភាពបញ្ជូល ទៅដល់កំពង់ចាមបាន តែដល់ពេលសវនាកា តែមិនមានលទ្ធភាព ខ្វះមធ្យោបាយ​បញ្ជូនស្វាមី​ខ្ញុំមកទៅវិញ។»

ដំណាលពេល នៃការរងចាំស្តាប់ការសម្រេច របស់អង្គចៅក្រមនៅថ្ងៃនេះដែរ សម្រែកទាមទារ ពីក្រុមគ្រួសារ​របស់​ជនត្រូវចោទ ព្រមទាំងសមាជិក របស់សមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ កម្មករ និងអ្នកតវ៉ា​ផ្សេង​ទៀតប្រមាណជា២០០នាក់ បាននាំគ្នាស្រែកតវ៉ា ឲ្យមានការដោះលែង អតីតប្រធានសមាគម ប្រជាធិបតេយ្យ​ឯករាជ្យនៃសេដ្ឋកិច្ចក្រៅប្រព័ន្ធ រួមទាំងអ្នក២០នាក់ផ្សេងទៀត នៅមុខសាសាឧទ្ធរណ៍។

តំណាងសហជីពកម្មករម្នាក់ បានកាន់ឃោសនស័ព្ទស្រែកបន្ទរថា តុលាការអោយតែដល់ពេលដែលខ្លួនប្រើប្រាស់ នូវអំណាចឆន្ទានុសិទ្ធរបស់ខ្លួន ដើម្បីផលប្រយោជន៍ជាតិ និងប្រជាពលរដ្ឋហើយ។ រីឯកុមារាដែលមានអាយុ​ប្រហែល​៨ឆ្នាំ ជាកូនប្រុសរបស់លោក វន់ ពៅ ស្រែកអង្វរយ៉ាងខ្លីថា «ខ្ញុំនឹកប៉ារបស់ខ្ញុំណាស់ ដោះលែងគាត់មកវិញ​មក គាត់មិនបានធ្វើអ្វីខុសនោះទេ»៕

-----------------------------------------------
ដោយ ក. ចាន់នីតា និង អ៊ុម វ៉ារី (ទំនាក់ទំនង៖ [email protected]) - ភ្នំពេញ ថ្ងៃទី២៤ មិនា ២០១៤