នេះជាលើកទី ៣ ហើយ ដែលក្រុមកម្មកររោងចក្រ ខួយ ស៊ីង បានមកប្រមូលផ្ដុំគ្នា នៅមុខសាលាខណ្ឌច្បារអំពៅ ដើម្បី​ឲ្យ​អភិបាលខ័ណ្ឌនេះ ជួយដោះស្រាយរឿងរោងចក្ររបស់ខ្លួន ដែលបានបិទទ្វា ដោយមិនបានប្រាប់ដំណឹង និងមិនបើក​ប្រាក់​អត្ថប្រយោជន៍មួយចំនួន ឲ្យកម្មករ។ កម្មករ ដែលមានចំនួនប្រមាណជាង ២០០នាក់ បានរត់រប៉ាត់រប៉ាយ បន្ទាប់ពី​ក្រុមកងកម្លាំងសមត្ថកិច្ច ជាង ២០នាក់ បានបើករថយន្ត និងម៉ូតូដេញពួកកម្មករ ឲ្យចេញពីមុខសាលាខណ្ឌច្បារអំពៅ ដោយមិនឲ្យពួកគាត់ នៅឈរស្រែកតវ៉ានៅទីនោះទៀត នាព្រឹកថ្ងៃទី ២៧ ខែកុម្ភៈនេះ។

កម្មការិនីនៅរោងចក្រ ខួយ ស៊ីង មួយរូប អ្នកស្រី សែម មុន្ថា បានប្រាប់ទស្សនាវដ្តីមនោរម្យ.អាំងហ្វូទាំងសំឡេងញ័រ និង​ភ័យ​ខ្លាចថា ពេលនេះ នៅមុខសាលាខណ្ឌច្បារអំពៅ កងសន្តិសុខកំពុងតែបើករថយន្ត ដេញពួកគាត់ ឲ្យចេញពីកន្លែង​នោះ ហើយបានគំរាមចាប់ប្រុសៗ ដាក់រថយន្តទៀតផង។ អ្នកស្រីថា ពួកគាត់មកសាលាខណ្ឌនេះ ព្រោះកាលពីថ្ងៃទី ២៥ ខែកុម្ភៈ សាលាខណ្ឌបានប្រាប់ពួកគាត់ថា នឹងដោះស្រាយបញ្ហាឲ្យ ចំពោះករណីដែលរោងចក្របិទទ្វា ទាំងមិនជូន​ដំណឹង និងមិនបើកប្រាក់ឲ្យកម្មករ។ ប៉ុន្តែនៅពេលដែលមកដល់ បែជាអ្នកផ្សេង ចេញមុខមកឆ្លើយតប ប្រាប់ពួកគាត់​ទៅ​វិញ ដែលខុសពីមនុស្ស ដែលបានសន្យាថា នឹងដោះស្រាយឲ្យនៅថ្ងៃនេះទៅវិញ ហើយថាថ្ងៃអង្គារអាទិត្យក្រោយ ទើប​សាលាខណ្ឌ ដោះស្រាយបញ្ហានេះជូនពួកគាត់។

ក្រោយពីត្រូវបានក្រុមកងកម្លាំងបណ្ដេញ ឲ្យចេញពីមុខសាលាខណ្ឌ ក្រុមកម្មករ បានត្រឡប់មកយាមរោងចក្របន្តទៀត ដោយខ្លាចម្ចាស់រោងចក្រ ចូលមកលួចដឹកម៉ាស៊ីនដេរទៅអស់ ហើយក្រុមកម្មករ នឹងមិនមានអ្វីជាថ្នូរ សំរាប់ជម្រុញឲ្យ​រោង​ចក្រ បើកប្រាក់អត្ថប្រយោជន៍ឲ្យខ្លួននោះទេ។ អ្នកស្រី សែម មុន្ថា បានត្អូញត្អែរដាក់សាលាខណ្ឌទៀតថា៖ «កាល​ពី​លើក​ទីមួយ ក៍ថាដូចគ្នានេះដែរ ថាចាំថ្ងៃនេះថ្ងៃនោះ ប៉ុន្តែគ្មានដំណោះស្រាយ»។

អ្នកស្រី ស៊ីន អាំមីរស់ ជាកម្មករមួយរូបទៀត បានរៀបរាប់ប្រាប់ទស្សនាមនោរម្យ.អាំងហ្វូថា អ្នកស្រីបានធ្វើការនៅទីនោះ ៨ឆ្នាំជាងមកហើយ ហើយប្រាក់ខែគុណរបស់គាត់ ក៍ច្រើនគួសមដែរ។ ប៉ុន្តែរោងចក្រមិនបានបើក ឲ្យពួកគាត់នោះទេ ទើប​គាត់សុខចិត្ត ទៅគេងយាមរោងចក្រ ជាមួយនឹងកម្មកររោងចក្រស្រីៗ ជាច្រើននាក់ទៀត ដើម្បីកុំឲ្យម្ចាស់​រោងចក្រ​ដឹក​ម៉ាស៊ីន ចេញពីរោងចក្របាន។ អ្នកស្រីនិយាយថា៖ «ពួកគាត់មានការភ័យខ្លាចណាស់ដែរ ដែលមកប្រថុយគេង​យាម​រោងចក្រ ប៉ុន្តែវាគ្មានដំណោះស្រាយណា ក្រៅពីនេះទៀតទេ បើសិនជាដឹកម៉ាស៊ីនយកទៅអស់ ពួកគាត់គឺត្រូវចប់ត្រឹម​ណ្នឹងហើយ»។ ការមកគេងនៅរោងចក្រនេះ ពួកគាត់ត្រូវប្រឈមច្រើន ពាក់ព័ន្ធនឹងសុខភាព និងខាតបង់ពេលវេលា​ធ្វើការ។

កម្មការិនីរូបនេះ បានបន្ថែមយ៉ាងដូច្នេះថា ក្រុមពួកគាត់នឹងរងចាំការដោះស្រាយ ពីសាលាខ័ណ្ឌច្បារអំពៅ ត្រឹមថ្ងៃអង្គារទី ៣ ខែកុម្ភៈម្តងទៀត។ លើកកាលកំណត់នេះ ហើយបើសិនជាសាលាខ័ណ្ឌ មិនអាចដោះស្រាយបញ្ហានេះបានទេ ពួក​គាត់​នឹងទៅរកគណៈកម្មការនៃរដ្ឋសភា ឲ្យជួយដោះស្រាយវិញម្តង។

មិនអាចទាក់ទងមន្ត្រីទទួលខុសត្រូវ របស់សាលាខណ្ឌច្បារអំពៅ ដើម្បីធ្វើការបកស្រាយបានទេ នៅពេលនេះ។

គួរបញ្ជាក់ថា រោងចក្រ ខួយ ស៊ីង ស្ថិតនៅសង្កាត់ច្បារអំពៅ១ ខណ្ឌច្បារអំពៅ រាជធានីភ្នំពេញ បានបិទទ្វាមិនដំណើរការ តំាងពីថ្ងៃទី ៣១ ខែមករា ២០១៥មកម្លេះ ដោយមិនបានប្រាប់នយោជិករបស់ខ្លួននោះទេ ថែមទាំងមិនបានគិត​ប្រាក់​ឈ្នួល​អត្ថប្រយោជន៍ ៣ចំណុច តាមច្បាប់ការងារឲ្យកម្មករទៀតផង ទើបកម្មកររោងចក្រនេះ នាំគ្នាទៅតវ៉ា សុំការ​អន្តរាគមន៍​ពីសាលាខ័ណ្ឌ ជាច្រើនដងដូច្នេះ៕