ព្រឹកនេះបុគ្គលិកក្រុមហ៊ុនណាហ្គាវើល ជិតមួយពាន់នាក់បន្តធ្វើកូដកម្ម បន្ទាប់ពីបរាជ័យលើតុចរចារត្រីភាគី ដើម្បី​ស្វែងរកដំណោះស្រាយ កាលពីថ្ងៃទី២០ខែមិថុនា នៅសាលារាជធានីភ្មំពេញ។ ការបរាជ័យក្នុងកិច្ចចរចារ និងការ​ជូនដំណឹងអំពីការបញ្ឍប់បុគ្គលិក ច្រើនជាង(៤០០)នាក់ ពីភាគីក្រុមហ៊ុន បានជំរុញឲ្យមានកូដកម្មបន្តនៅថ្ងៃនេះ។

សណ្ឋាគារ មជ្ឈមណ្ឌលកំសាន្ដ ណាហ្គាវើល នៅមាត់ទន្លេនៃរាជធានីភ្នំពេញ ក្នុងពេលរាត្រី។

អគ្គលេខាធិការរង សហព័ន្ធសហជីពវិស័យទេសចរណ៍ និង សេវាកម្ពុជា លោក សុខ ណារិទ្ធ បានពន្យល់ថា​ការ​សម្រេច​បន្តធ្វើកូដកម្មនេះ គឺទាមទារនូវលក្ខខណ្ឌចំនួនបី។ ទីមួយ ទាមទារឲ្យក្រុមហ៊ុនគោរពសិទ្ធការងារបុគ្គលិក ដោយមិន​ត្រូវបញ្ឍប់បុគ្គលិកស្រេចតែអំពើចិត្ត - ទីពីរ សូមតំឡើងប្រាក់ឈ្នូល ខណៈចំណូលក្រុមហ៊ុនមានការ​កើន​ឡើង - ទីបី សូមឲ្យក្រុមហ៊ុនគោរពសេចក្តីសម្រេច របស់ក្រុមប្រឹក្សាអាជ្ញាកណ្កាល។

សូមរំលឹកថាកាលពីថ្ងៃទី១៩ ខែមិថុនា កន្លងទៅបុគ្គលិកក្រុមហ៊ុនណាហ្គាវើល បានធ្វើកូដកម្មទាមទារលក្ខខណ្ឌ​មួយ​ចំនួន តែត្រូវបានបង្រាបពីកម្លាំងសមត្ថកិច្ច និងសន្តិសុខក្រុមហ៊ុន ដោយលើកហេតុផលថាជាកូដកម្មខុសច្បាប់។ ក្នុង​ហេតុការណ៍នោះកូដករ (១៩) នាក់ត្រូវបានឃាត់ខ្លួន តែត្រូវដោះលែងនាល្ងាចថ្ងៃដ៏ដែល និងបានឯកភាពគ្នាផ្តើម​ឲ្យ​មាន​ការចរចារ រកដំណោះស្រាយ។

កញ្ញា ឈឹម ស៊ីថរ អនុប្រធានសហជីពប្រចាំណាហ្គាវើលបញ្ជាក់ថា៖ «ការបន្តធ្វើកូដកម្មនេះ ពីព្រោះរហូតមក​ដល់​ថ្ងៃនេះ ពុំទាន់មានដំណោះស្រាយអ្វីនោះទេ»។ កញ្ញាបន្ថែមថា កិច្ចចរចារត្រីភាគីថ្ងៃទី២០ មិថុនា រវាតំណាងបុគ្គលិក តំណាងក្រុមហ៊ុន និងសាលារាជធានីភ្នំពេញ គឺមិនទទួលបានលទ្ធផលអ្វី ក្រៅពីការជំរុញឲ្យបុគ្គលិកចូលធ្វើការវិញ ដោយរងចាំដោះស្រាយជាមួយក្រុមហ៊ុននៅពេលក្រោយ។ កញ្ញាបន្តថា ក្រុមហ៊ុនបានផ្ញើរសារអេឡិចត្រូនិក បញ្ឍប់​ការងាររបស់កូដករ ខណៈដែលក្រុមហ៊ុននេះ ប្រកាសជ្រើសរើបុគ្គលិកថ្មីជាច្រើន។

អនុប្រធាននាយកដ្ឋានដោះស្រាយវិវាទការងារ នៃក្រសួងការងារ លោក ខៀវ សាវុធ លើកឡើងថា ការផ្ញើរសារបញ្ឍប់​ពីការងារ គឺជាសកម្មភាពមួយ ពុំមានលក្ខណៈត្រឹមត្រូវតាមច្បាប់នោះទេ។ លោកអំពាវនាវដល់ភាគីទាំងពីរ កុំ​ពង្រីក​វិវាទឲ្យកាន់តែធំជាងនេះ។ លោកបញ្ជាក់ថា៖ «ភាគីទាំងពីរ ត្រូវតែបន្តការចរចារបញ្ចប់វិវាទ ដើម្បីផល​ប្រយោជន៍​ទាំង​សងខាង»។

ទាក់ទងបញ្ហានេះមនោរម្យព័ងអាំងហ្វូ មិនអាចសុំការបំភ្លឺពីលោក ឡុង ឌីម៉ង់ អ្នកនាំពាក្យសាលារាជធានី​ភ្នំពេញ​បាន​ទេ ដោយលោកជាប់ប្រជុំ។ ទន្ទឹមនឹងនេះ តំណាងខាងក្រុមហ៊ុនណាហ្គាវើល ក៏មិនអាចសុំការបំភ្លឺទាក់ទង នឹង​បញ្ហា​នេះបានដែរ។

----------------------------------------------------------
ដោយៈ អ៊ុំ បូរី - ភ្នំពេញថ្ងៃទី២៤ មិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ