រឿងអាស្រូវនៅសហជីព ស៊ីខាវដូ៖ អាត់ ធន់ បដិសេធការចោទប្រកាន់
ប្រធានសម្ព័នសហជីពប្រជាធិបតេយ្យកម្មករកាត់ដេរកម្ពុជា លោក អាត់ ធន់ បានចេញមកថ្លែងបដិសេធ និងបានលាងសំអាតខ្លួនលោក ថាមិនបានប្រព្រឹត្តិដូចការចោទប្រកាន់ របស់អតីតសមាជិកស្ថាបនិករបស់សហជីពលោកនោះទេ។ ការថ្លែងបដិសេធនេះ បានធ្វើជាមួយទស្សនាវដ្ដីមនោរម្យ.អាំងហ្វូ បន្ទាប់ពីការទម្លាយរបស់អតីតសមាជិកស្ថាបនិកចំនួនពីររូប បាននិយាយបរិហា ទម្លាយពីអំពើពុករលួយមួយនៅក្នុងស្ថាប័ននេះ។
លោកអាត់ ធន់ ប្រធានសម្ព័នសហជីពប្រជាធិបតេយ្យកម្មករកាត់ដេរកម្ពុជា ឈរលើរថយន្ដថ្លែងទៅកាន់ក្រុមកម្មករដែលធ្វើកូដកម្ម ថ្ងៃទី២៨ ខែធ្នូ ឆ្នាំ២០១៣។ (រូបថត ហ្វេសប៊ុក)
ផ្ទុះរឿងអាស្រូវ - «ពួកយើងស្អាតស្អំណាស់ ពួកយើងដាច់ខាតហើយ មិនប្រព្រឹត្តិអំពើពុករលួយនោះទេ។» នេះជាការថ្លែងបញ្ជាក់ការពារខ្លួន របស់លោកអាត់ ធន់ ប្រធានសម្ព័នសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ (C.Cawdu) ក្នុងកិច្ចសម្ភាសជាមួយទស្សនាវដ្ដីមនោរម្យ.អាំងហ្វូ នៅថ្ងៃទី២០ ខែកុម្ភៈ ឆ្នាំ២០១៤នេះ។
ការថ្លែងរបស់លោក ជាប្រតិកម្មតបទៅនឹងការទម្លាយរឿងអាស្រូវពុករលួយ របស់អតីតសមាជិកស្ថាបនិករបស់សហជីពចំនួនពីរនាក់ គឺលោក អ៊ំ វិសាល និងអ្នកស្រី រឿន ចាន់ថន។ នៅតាមទំព័រហ្វេសប៊ុក របស់អតីតមន្រ្តីទាំងពីររូប របស់សម្ព័នសហជីព ប្រជាធិបតេយ្យកម្មករកាត់ដេរកម្ពុជា ដែលទើបនឹងត្រូវបានបណ្ដេញចេញពីតួនាទីនេះ បានទម្លាយឲ្យដឹងនូវរឿងអាស្រូវមួយចំនួន ជុំវិញការកេងប្រវ័ញ្ចលើកម្មករ របស់ក្រុមមេដឹកនាំសហជីពដ៏ល្បីឈ្មោះ។
អ្នកស្រីរឿន ចាន់ថន បានសរសេរនៅលើទំព័រហ្វេសប៊ុករបស់អ្នកស្រីថា៖ «ហេតុអីក៍ស៊ីខាវឌូ ធ្វើអញ្ចឹង? ម៉េចក៍ក្បត់កូនចៅឯងអញ្ចឹង? ក្រែងអួតអាងថា ខ្លួនជាអ្នកប្រជាធិបតេយ្យ អ្នកកាពារផលប្រយោជន៍អោយកម្មក ហេតុអីក៍កេងលុយកម្មករ ដូចថៅកែរោងចក្រដែរ ?»
លោក អ៊ុំ វិសាល មន្ត្រីម្នាក់ពីក្នុងចំណោមមន្ត្រីទាំងពីរនាក់នេះ បានថ្លែងឲ្យដឹងពីមូលហេតុធំពីរ ដែលឈានទៅដល់ការបណ្ដេញរូបលោកចេញពីសហជីព។ មូលហេតុទីមួយ ដោយសារតែលោកបានជីកកកាយ ករណីលុយរបស់រោងចក្រអ៊ីហ្គាមិន ដែលក្រុមហ៊ុនបានបង្វិលលុយនោះសងមកកម្មករវិញ ក្នុងពេលដែលក្រុមហ៊ុនបានបញ្ឈប់កម្មករ តាំងពីឆ្នាំ២០០៧ ដល់ឆ្នាំ២០០៩ និងពី២០០៩ ដល់២០១៣។ បើតាមការអះអាងរបស់អតីតមន្ត្រីសហជីពរូបនេះ បានឲ្យទស្សនាវដ្ដីមនោរម្យ.អាំងហ្វូ ដឹងថា លុយកម្មករម្នាក់ត្រូវទទួលបានជិតប្រាំពាន់ដុល្លា ប៉ុន្តែមិនបានសងគ្រប់ចំនូនទេ អ្នកខ្លះបានត្រឹម១ពាន់២រយដុល្លា និងអ្នកខ្លះបាន១ពាន់៧រយដុល្លាប៉ុណ្ណោះ។
លោក វិសាល បានថ្លែងទៀតថា «នៅពេលដែលបានខ្ញុំបានស៊ើបអង្កេតទៅ ឃើញថាថ្នាក់ដឹកនាំ ស៊ីខាវដូ បានកិបកេងលុយសំណងរបស់កម្មករយ៉ាងច្រើន»។
សម្រាប់មូលហេតុមួយទៀត មន្រ្តីសហជីពរូបនេះបានរៀបរាប់ថា «ក្រោយពេលកើតរឿងហេតុបែបនេះ ក្នុងនាមខ្ញុំជាស្ថាបនិក និងជាគណកម្មការ គឺខ្ញុំប្រាប់ថា ខ្ញុំអស់ទំនុកចិត្តទៅលើការដឹកនាំបែបហ្នឹងហើយ ខ្ញុំទាមទារឲ្យមានការកែទម្រង់ឆ្លុះបញ្ចាំងអំពីតម្លាភាពទាក់ទងនឹងរឿងប្រព័ន្ធហិរញ្ញវត្ថុ និងជំនួយផ្សេងៗ»។
ប៉ុន្តែជុំវិញការបណ្ដេញមន្ត្រីទាំងពីរនាក់ខាងលើ ត្រូវបានលោក អាត់ ធន់ បកស្រាយថា ដោយសារតែអតីតមន្ត្រីរួមសហជីពរបស់លោកមិនព្រមចុះហត្ថលេខា លើកិច្ចសន្យាបន្តការងារ ដើរបរិហារកេរ្តិ៍ និងជេប្រមាថថ្នាក់ដឹកនាំរបស់ស៊ីខាវឌូ ហើយគាត់ចង់ចេញដោយខ្លួនឯង ទៅបង្កើតសហព័ន្ធមួយទៀត។
បញ្ហាកិច្ចសន្យាការងារ ដែលលោក អ៊ុំ វិសាល ឆ្លើយប្រតិកម្មថា លោកមិនមែនជាបុគ្គលិក ដែលជ្រើសតាំងឡើងតាមការផ្ញើប្រវត្តិរូបសុំធ្វើការងារនោះទេ។ «ខ្ញុំគឺជាស្ថាបនិកដែលបង្កើតសហជីពនេះ ហើយក៏ទទួលបានការតែងតាំងតាមរយៈការបោះឆ្នោត ពីថ្នាក់ដឹកសហជីពមូលដ្ឋាន។ (...) រីឯថ្នាក់ដឹកនាំ ស៊ីខាវឌូ មានសិទ្ធិត្រឹមតែដាក់វិន័យ ឬក៏ណែនាំតែប៉ុណ្ណោះ។» លោកបានហៅការបណ្ដេញចេញរូបលោក ថាជាការរំលោភទៅនឹងច្បាប់របស់ស៊ីខាវឌូ ហើយជាចេតនា ក្នុងការ«ក្តោបអំណាចផ្តាច់ការ»ចង់រក្សានូវអំណាចខ្លួនឯង។
ទស្សនាវដ្ដីមនោរម្យ.អាំងហ្វូ នៅមិនទាន់មានការបញ្ជាក់អះអាង ពីប្រភពឯករាជ្យណាមួយនៅឡើយ ជុំវិញជម្លោះបកអាក្រាតគ្នានេះ។ ជម្លោះនៅក្នុងស្ថាប័នមួយ ដែលធ្លាប់បានដឹកនាំការជជែកតវ៉ាយ៉ាងផុលផុស ពីបញ្ហាតម្លើងប្រាក់ឈ្នួលឲ្យកម្មករ និងធ្លាប់ឈរនៅជួរមុខ ក្នុងការដឹកនាំធ្វើបាតុកម្ម-កូដកម្មទាមទារឲ្យរដ្ឋាភិបាល និងថៅកែគិតគូរអំពីជីវភាពដ៏លំបាកលំបិតរបស់កម្មករ។ ជុំវិញក្ដីបារម្ភពីការបែកបាក់នេះ លោក អាត់ ធន់ បានធានាអះអាងថា «តាមពិតយើងអត់មានបន្លំអីនោះ គាត់ខ្លួនឯងទេនៅពេលដែលគេបញ្ឈប់ពីការងារ គាត់មិនដឹងរកនឹកអី គាត់ក៏ដើរបង្ខូចកេរ្តិ៍គេទៅ។ ចំពោះបញ្ហាហ្នឹង កុំបារម្ភពីពួកខ្ញុំអី។»
ប្រធាន ស៊ីខាវឌូ រូបនេះ បានបញ្ជាក់ទៀតថា «ពួកខ្ញុំកំពុងតែរកភស្តុតាង ពីទង្វើបរិហារកេរ្តិ៍របស់ពួកគាត់ នៅពេលមានភស្តុតាងពូកខ្ញុំនឹងប្តឹងគាត់»។
ប៉ុន្តែសម្រាប់ លោកអ៊ុំ វិសាល និងអ្នកស្រី រឿន ចាន់ថន ក៏ទំនងជាមិនបាននៅស្ងៀមដែរ។ អ្នកស្រី រឿន ចាន់ថន បាននិយាយថា «ខ្ញុំបានរៀបចំពាក្យបណ្ដឹងរួចរាល់ហើយ ក្នុងទាមទាររកយុត្តិធម៌សំរាប់ខ្លួនខ្ញុំ។»
ក្ដីបារម្ភមួយទៀត ដែលមជ្ឈដ្ឋានទូទៅ បានលើកមកនិយាយដែរនោះ គឺជាយុទ្ធសាស្ត្រ«ពិសបង្ក្រាបពិស» ឬ«យកបន្លាជុសបន្លា» របស់ក្រុមអ្នកមានអំណាចណាមួយ ខណៈពេលដែលសម្ព័នសហជីពប្រជាធិបតេយ្យកម្មករកាត់ដេរកម្ពុជាមួយនេះ តែងតែឈរនៅខ្សែត្រៀមជួរមុខគេ ជាមួយនឹងសហជីពកម្មករផ្សេងទៀត ដើម្បីប្រឈមមុខប្រឆាំងនឹងការរំលោភសិទ្ធកម្មករ ជាពិសេសទៅនឹងការបង្ក្រាបថ្មីៗយ៉ាងរង្គាល របស់កងកម្លាំងគ្រប់គ្រងដោយរដ្ឋាភិបាល ទៅលើការតវ៉ារបស់កម្មករ។ ទស្សនាវដ្ដីនឹងត្រឡប់មកវិញ ជាមួយនឹងអត្ថបទរបស់ខ្លួន នៅពេលដែលទទួលបានព័ត៌មានបន្ថែម៕
-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ២០ ខែកុម្ភៈ ឆ្នាំ២០១៤