មូលនិធិធម្មជាតិពិភពលោក ហៅកាត់ជាភាសាអង់គ្លេសថា WWF បានព្រមានថា ទំនប់វារីអគ្គិសនី​នៅលើ​ទន្លេ​​មេគង្គ ដែលគ្រោងសាងសង់ដោយប្រទេសឡាវ ជាប់នឹងព្រំដែនកម្ពុជា អាចនឹងពន្លឿនការស្លាប់ផុតពូជ នៃបណ្ដា​ត្រីផ្សោត​នៅក្នុងប្រទេសកម្ពុជា។ មូលនិធិពិភពលោកមួយនេះ ថែមទាំងបានទាមទារ ឲ្យបញ្ឈប់ជាបន្ទាន់​នូវគម្រោង​សាងសង់ ដែលគួរឲ្យបារម្ភនេះ។

ត្រីផ្សោត ហែលនៅលើទន្លេមេគង្គនៅក្នុងខេត្តក្រចេះ នៃប្រទេសកម្ពុជា។ (រូបថត TANG CHHIN SOTHY)

ធនធានធម្មជាតិ - មូលនិធិធម្មជាតិធិពិភពលោក បានថ្លែងពន្យល់ថា ប្រសិនបើទំនប់ ដុង សាហុង (Don Sahong) ត្រូវបានសាងសង់ឡើង ដែលស្ថិននៅមិនឆ្ងាយប៉ុន្មានពីព្រំដែនប្រទេសកម្ពុជានោះ តែគម្រោងនេះក៏នៅមិនឆ្ងាយ​ប៉ុន្មានដែរពីជម្រកត្រីផ្សោត ដែលជាប្រភេទត្រីដ៏កម្រកំពុងរងនូវការដាច់ពូជ ពីក្នុងពិភពលោកនេះស្រាប់។

មន្ត្រីមួយរូបពីអង្គការពិភពលោកនេះ ប្រចាំនៅប្រទេសកម្ពុជា លោក ឈិត សំអាត បានពន្យល់ទៀតថា «បើទំនប់ដុង សាហុង ត្រូវបានសាងសង់ វានឹងឲ្យត្រីផ្សោតនៅកម្ពុជាស្លាប់ផុតពូជ»។ លោកបន្ថែមថា ត្រីផ្សោត ជាអត្តសញ្ញាណ​នៃធនធានធម្មជាតិមួយ សម្រាប់ប្រទេសកម្ពុជា ហើយវាថែមទាំងបាន ទាក់ទាញទេសចរណ៍នោះទៀតផង។

មន្ត្រីសកម្មជនការពារបរិស្ថានរូបនេះ បានសម្ដែងការព្រួយបារម្ភជាពិសេសថា ទំនប់នេះ អាចនឹងបិតផ្លូវ​បម្លាស់ទី​របស់ត្រី ដែលសុទ្ធសឹងជាចំណីរបស់ត្រីផ្សោត។

មិនមែនមានតែបញ្ហាខាងលើនេះទេ ដោយសារតែត្រីផ្សោតក្នុងប្រទេសកម្ពុជា កំពុងរងនូវការគម្រោមផុតពូជ ដោយ​សារសំណាញ់នេសាទ ក្រឡាល្អិតដែលបានអូសទាញចូលទៅបំផ្លាញជម្រករបស់ត្រីផ្សោតទាំងនេះ។ ប្រទេសកម្ពុជា​បានដាក់តំបន់ដែលមានត្រីផ្សោតរស់នៅនោះ ទៅក្នុងការអភិរក្សដើម្បីការពារការស្លាប់ផុតពូជរបស់ប្រភេទត្រីដ៏កម្រ តែមិនសូវជាទទួលបានលទ្ធផលល្អ ប៉ុន្មាននោះទេ។

គម្រោងទំនប់វារីអគ្គិសនី ដុង សាហុង ដែលមានកម្លាំង២៦០មេហ្គាវ៉ាត់ នឹងផលិតអគ្គិសនីពីពេលនេះ រហូតដល់​ឆ្នាំ​២០១៨ ខាងមុខ ដើម្បីបម្រើបម្រាស់ក្នុងប្រទេសឡាវ។ បើតាមគម្រោងនេះ ការសាងសង់ត្រូវបានចាប់ផ្ដើមតាំង​ពី​ឆ្នាំកន្លងទៅ តែអាជ្ញាធរនៃប្រទេសឡាវ បានយល់ព្រមនៅជជែកជាមួយប្រទេសជិតខាងរបស់ខ្លួន ដែលព្រួយបារម្ភ​អំពីការលើកឡើងនៃផលប៉ះពាល់ដ៏ធ្ងន់ធ្ងរ ទាក់ទងនឹងការនេសាទ និងទៅដល់ជីវភាពប្រជាជនច្រើនលាននាក់ ដែលរស់ពឹងអាស្រ័យលើទន្លេមេគង្គ។

ទំនប់ ដុង សាហុង ជាទំនប់វារីអគ្គិសនីមួយ ក្នុងចំណោមទំនប់វារីអគ្គិសនីចំនួន ១១ ដែលត្រូវបានគ្រោងសាងសង់​នៅលើដងទន្លេមេគង្គ ជាពិសេសនៅក្នុងប្រទេសឡាវ។ ដោយឡែក ទំនប់វារីអគ្គិសនី សាយ៉ាបូរី របស់ប្រទេស​កុម្មុយនីស​មួយនេះ ត្រូវបានចាប់ផ្ដើមសាងសង់នៅចុងឆ្នាំ២០១២ នៅក្រោមភាពប្រទាំងប្រទើសដ៏ខ្លាំងក្លា បើទោះជា​គម្រោងនេះត្រូវបានកែប្រែជាច្រើននោះក៏ដោយ។ អ្នកជំនាញបានគិតថា គម្រោង សាយ៉ាបូរី បានបង្កឲ្យមានផល​ប៉ះពាល់ទៅដល់បណ្ដាជនជាង៦០លាននាក់ ដែលរស់នៅប៉ែកខាងក្រោមនៃទំនប់វារីអគ្គិសនី ក្នុងនោះបណ្ដាជន​មួយចំនួនធំ ជាប្រជាជនកម្ពុជា ដែលរស់អាស្រ័យតែទៅលើទន្លេងដ៏ធំនេះ៕

-----------------------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី២១ ខែកុម្ភៈ ឆ្នាំ២០១៤