សមិទ្ធិករភាពយន្ដមួយរូប មានសញ្ជាតិកាណាដា ដែលបានចូលមករស់នៅក្នុងប្រទេសកម្ពុជា ទំនងជាបានបាត់ខ្លួន នៅក្នុងខេត្តសៀមរាប ផ្នែកខាងជើងនេះប្រទេសនេះ។ នេះបើតាមការថ្លែងឲ្យដឹង របស់មិត្តភ័ក្រជិតដិតរបស់លោក។

លោក ដេវ វ័លឃ័រ សមិទ្ធិករភាពយន្ដ សញ្ជាតិកាណាដា។ (រូបថត RICHARD S. EHRLICH)

សន្ដិសុខសង្គម - លោក ដេវ វ័លឃ័រ (Dave Walker) ដែលបានចូលមករស់នៅក្នុងប្រទេសកម្ពុជា តាំងពីមួយឆ្នាំ​កន្លះមកនោះ បានចូលមករស់នៅក្នុងផ្ទះសំណាក់មួយកន្លែង កាលពីសប្ដាហ៍មុន។

បើតាមមិត្តរបស់សមិទ្ធិកររូបនេះ លោក ភីធើរ វ្រុនស្គី (Peter Vronsky) បានឲ្យដឹងថា ដេវ វ័លឃ័រ ទំនងជាបានចាក​ចេញពីបន្ទប់របស់លោក នៅថ្ងៃសុក្រកន្លងទៅ ដើម្បីទុកឲ្យអ្នករៀបចំបន្ទប់ចូលមកបោសសម្អាត។ បុរសជនជាតិ​កាណាដារូបនេះ បានចាកចេញទៅតែជាមួយនឹងដបទឹកមួយតែប៉ុណ្ណោះ។

លោក ភីធើរ វ្រុនស្គី បានបន្តទៀតថា លុះពេលក្រោយមក ក្នុងថ្ងៃដដែល ដៃគូរការងារម្នាក់របស់លោក វ័លឃ័រ បាន​មកដល់ផ្ទះសំណាក់នោះ ដើម្បីជួបជាមួយលោក។ ប៉ុន្តែសមិទ្ធិករភាពយន្ដ នៅតែមិនឃើញមានវត្តមាន​នៅក្នុង​បន្ទប់នៅឡើយ ខណៈរបស់របរសម្ភារះប្រើប្រាស់សំខាន់ៗ ដូចជាទូរស័ព្ទដៃ កំព្យូទ័រយួរដៃ ហិបដាក់សម្លៀកបំពាក់ និងលិខិតឆ្លងដែន នៅក្នុងបន្ទប់នោះនៅឡើយ។

ស្ថានទូតអូស្ត្រាលី ដែលទទួលបន្ទុកជនជាតិកាណាដាប្រចាំនៅប្រទេសកម្ពុជា បានដាក់សេចក្ដីជូនដំណឹង​ជាផ្លូវការ​មួយ ស្ដីការការបាត់ខ្លួននេះ។

គឺដៃគូរការងាររូបនោះ ជាអ្នកទាក់ទងអាជ្ញាធរនៅនឹងកន្លែង ដើម្បីជូនដំណឹងពីការបាត់ខ្លួននេះ។ ការរុករកបានចាប់​ផ្ដើមធ្វើ នៅទូទាំងទីក្រុងសៀមរាប ដើម្បីតាមដានស្វែងរកបុរសជនជាតិកាណាដានេះ តែនៅមិនទាន់មានស្លាកស្នាម​អ្វីនៅឡើយ។

សូមបញ្ជាក់ដែរថា លោក ដេវ វ័លឃ័រ និងដៃគូររួមការងាររបស់លោក បានសហការគ្នាបើកផលិកម្មភាពយន្ដមួយ ក្នុងប្រទេសកម្ពុជា កាលពីខែកក្កដា ឆ្នាំ២០១២កន្លងទៅ ដែលមានឈ្មោះថា អានីមីស ហ្វាម ហ្វីម (Animist Farm Films)។ លោកបានធ្វើភាពយន្ដឯកសារមួយ នៅលើប្រជាជនកម្ពុជាទាំងឡាយដែលបានរួចរស់មានជីវិត ពីរបបខ្មែរ​ក្រហម។ លោក ភីធើរ វ្រុនស្គី បានសម្ដែងការព្រួយបារម្ភ ខ្លាចមនុស្សដែលរអើលខ្លួន ដោយសារភាពយន្ដឯកសារ​របស់លោក ដេវ វ័លឃ័រ អាចនឹងមានបំណងអាក្រក់ណាមួយ មកលើមិត្តរបស់លោក៕

-----------------------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី២១ ខែកុម្ភៈ ឆ្នាំ២០១៤