តារាកំប្លែងទាំងពីរ ដែលស្ថិតនៅក្នុងរូបថត របស់លោកតា វិច ទ័រ នោះ គ្មាននរណាផ្សេង ក្រៅពីតារាល្បីខាងកំប្លែង ប្រចាំស្ថានីយ៍ទូរទស្សន៍ ស៊ីធីអិន អ្នកនាង ស្រេង សុកាន់ដា ហៅ ខ្ញុង និងអ្នកនាង វ៉ាន់ នីឡា នោះឡើយ។ រូបថត ដែល​ទើបនឹងត្រូវបានបង្ហោះ មកលើបណ្ដាញសង្គម កាលពីថ្ងៃទី២៨ ខែមីនានេះ បង្ហាញពីសកម្មភាព ទទួលទានអាហារ នៅ​ក្រោយ​ឆាក របស់អ្នកទាំងពីរ ដែលមើលទៅ ដូចជាមានលក្ខណៈមមាញឹក យ៉ាងសម្បើមដៃណាស់។

លោកសុវណ្ណ រិទ្ធី ហៅលោកតា វ៉ិច ទ័រ ដែលជាឪពុករបស់អ្នកនាង វ៉ាន់ នីឡា បានសរសេរ នៅជាមួយ នឹងរូបថត​នោះ​ថា៖ «ពិតជាខុសគ្នា រវាងលើឆាក និងក្រោយឆាក។ ក្រោយ ផ្ទាំងអិល អី ឌី ខ្ញុំសុំបង្ហាញជូន បងប្អូន នេះជារូប ក្រោយ​ឆាក ក្នុង​កម្មវិធី​រាត្រីកំសាន្ត !!!»

រូបភាពមួយនេះ បានធ្វើឲ្យមាន ការចាប់អារម្មណ៍យ៉ាងច្រើន ពីសំណាក់អ្នកគាំទ្រ។ ពួកគេបានបញ្ចេញ យោបល់​ចម្រុះ​ចូលគ្នា តែភាគច្រើន បានលើកដំកើង នូវសកម្មភាព ទទួលទានអាហារ របស់អ្នកសំដែងខាងលើ ដែលជាវារឿងធម្មតា ព្រោះត្រូវប្រញាប់ឡើងសម្ដែង។ ម្ចាស់គណនីម្នាក់ បានលើកឡើងបែបនេះថា៖ «ពេលបន្ទាន់ ឫក៏ពេលរវល់ នរណាក៏​ធ្លាប់បែបនេះដែរ លោកពូ។ ខ្ញុំធ្លាប់សម្តែងរបាំ និង រៀបចំកម្មវិធីសម្តែង រាប់សិបដងហើយ ការឆ្លៀតបរិភោគបន្តិចបន្ទួច និងតាមកៀនៗ តែងតែមាន ។ សប្បាយម្យ៉ាងដែរតើ!»

ដោយឡែក មតិខ្លះទៀត បានលើកឡើងថា វាអាចធ្វើឲ្យអាប់ឱនកិត្តិយ ដល់តារាសម្តែង ដោយសារម្ចាស់មតិទាំងនោះ យល់ថា ក្នុងនាមជាតារា ក៏ដូចជាអ្នកដឹកនាំម្នាក់ដែរ បានធ្វើជាគំរូល្អ ដល់មហាជនទូទៅជាច្រើន យកតម្រាប់តាម។ តែនេះ ពួកនាង បែជាមកញ៉ាំអាហារ នៅខាងក្រោយឆាក ទាំងលួចលាក់ ដែលធ្វើឲ្យបាត់បង់ នូវភាពថ្លៃថ្នូរ​របស់ខ្លួន ដែលខំរក្សាជាយូរកមហើយ។ អ្នកគាំទ្រម្នាក់ បានសរសេរថា៖ «ហូបបែបហ្នឹង ខូចកាលីបអស់ហើយ»។

យ៉ាងណាក៏ដោយ បើទោះជាមានមតិ បានលើកឡើងព្រមគ្នាបែបនេះក៏ដោយ ក៏អ្នកផលិតកម្មវិធី លោក សុវណ្ណ រិទ្ធី ហៅ​លោកតា វិច ទ័រ ដែលជាម្ចាស់រូបថត  នៅតែបង្ហាញពីទឹកចិត្តអំណរគុណ ដល់អ្នកគាំទ្រទាំងអស់ ហើយ​លោក​ស្វាគមន៍ នូវរាល់មតិយោបល់ផ្សេងៗ ពីទស្សនិកជន»៕