នេះហើយ ជាអាពាហ៍ពិពាហ៍មួយ នៅប្រទេសចិន ដែលកើតមកពីការផ្សំផ្គុំ រៀបចំរបស់ចាស់ទុំ ដែលម្ចាស់ខ្លួន ទាំង​សង​ខាង មិនទាំង​ដែល​ឃើញគ្នា ដោយផ្ទាល់សូម្បីតែម្ដង។ យុវជន កៀន ហ៊ូ (Kang Hu) អាយុ៣៣ឆ្នាំ នឹងត្រូវរៀបការ ជាមួយនាង ណា ស៊ុន (Na Sung) អាយុ៣០ឆ្នាំ ដែលជាសម្ព័ន្ធមេត្រីភាពមួយ កើតចេញពីការផ្សំផ្គុំ។ ប៉ុន្តែនៅពេលដែល កៀន ហ៊ូ បានឃើញ​មុខ របស់​គូដណ្ដឹងខ្លួន ដែលជាអនាគតភរិយានោះ បុរសយើងភ្ញាក់ខ្លួន សឹង«ដាច់ផ្ញារ»។

កៀន ហ៊ូ ដែលជាអ្នករស់នៅ ក្នុងក្រុង ស៊ីយ៉ាង (Shiyan ផ្នែកខាងកើត នៃប្រទេសចិន) បាននិយាយសុំទោស មុននឹង​បញ្ជាក់ ទៅកាន់គូដណ្ដឹងខ្លួន ដោយចំមុខថា មុខនាង«អាក្រក់ខ្លាំងណាស់» មិនអាចក្លាយជាភរិយា របស់ កៀន ហ៊ូ បាន​ទេ។

កម្មវិធីភ្ជាប់ពាក្យ ដែលមានវត្តមាន របស់ភ្នាក់ងាររកគូរស្រករនោះផង បានបញ្ចប់ទៅ ដោយហេតុការណ៍ ដែលមិន​បាន​ព្រាងទុកមួយ។ នោះគឺបុរស កៀន ហ៊ូ បានដើរចេញពីពិធីនោះ ទាំងអារម្មណ៍ក្ដៅមួហ្មង។ មិត្តភ័ក្រមួយរូប របស់ កៀន ហ៊ូ បានថ្លែងប្រាប់សារព័ត៌មាន «Metro» ចេញផ្សាយនៅអង់គ្លេសថា៖ «កូនកម្លោះ ទទួលអារម្មណ៍រន្ធត់ជាខ្លាំង។ គ្រួសារ​ទាំងសងខាង ក៏សម្ដែងការខឹងសម្បារ។ ចំណែកពួកយើងជាមិត្តភ័ក្រវិញ មានអារម្មណ៍ទើសទាល់ ថាមិនត្រូវ។ កៀន ហ៊ូ ជាមនុស្សរើសណាស់ ខាងគូស្រករ។ ប៉ុន្តែរឿងមួយដែលសំខាន់ គឺ កៀន ហ៊ូ ត្រូវបានចាប់បង្ខំ ឲ្យរៀបការ។»

ប៉ុន្មានម៉ោងក្រោយមក គេឃើញ កៀន ហ៊ូ បានរត់សំដៅមាត់ស្ទឺង ហើយបានលោតចូល ទៅក្នុងនោះ។ ក្រុមកម្លាំង​នគរបាល ដែលត្រូវបានរាយការណ៍ ឲ្យដឹងពីហេតុការណ៍ បានមកទាន់ពេល ដើម្បីសង្គ្រោះបុរស កៀន ហ៊ូ ឡើង​ពី​ទឹក​មកវិញ។ បុសម្នាក់ ដែលបានថតទិដ្ឋភាពនេះ បានថ្លែងឡើងថា៖ «កៀន ហ៊ូ បានលោតទឹកទាំងខោអាវ ហើយបាន​អណ្ដែតឡើង។ បន្ទាប់ពីត្រូវបានស្រង់ឡើងមកវិញ កៀន ហ៊ូ ដូចជាមិនដឹងខ្លួនទេ។ ខ្ញុំគិតថា កៀន ហ៊ូ បានស្លាប់​ហើយ។»

បន្ទាប់ពីត្រូវបានបញ្ជូន មកដល់មន្ទីរពេទ្យ កៀន ហ៊ូ បានប្រមូលស្មារតីមកវិញ ហើយលែងនឹកឃើញ ពីរឿងចង់​សម្លាប់​ខ្លួនជាថ្មីទៀត។ កៀន ហ៊ូ បាននិយាយថា៖ «ខ្ញុំពិបាកក្នុងចិត្តណាស់ ពីអ្វីដែលបានកើតឡើង។ តែពេលដែលខ្ញុំ បាន​ឃើញ​នាងដំបូង ខ្ញុំមិនគិតស្មានថា នាងមានរូបរាងអញ្ចឹងទេ។ ឥឡូវនេះ ខ្ញុំដឹងថា នាងមានរូបរាងអាក្រក់ណាស់ សម្រាប់​ខ្ញុំ។ តែឪពុកម្ដាយខ្ញុំ ជាអ្នកបានរៀបចំ អាពាហ៍ពិពាហ៍នេះឡើង។ ដូច្នេះ ខ្ញុំគ្មានជម្រើសអ្វី ដែលគេចផុត ពី​គ្រោះ​កម្ម​នេះ ក្រៅ​តែ​ពីសម្លាប់ខ្លួនឡើយ។»៕