ស្វាយរៀង៖ សាលាដំបូងខេត្តស្វាយរៀងបានប្រកាសពន្យាពេលបើកសវនាការ អតីតៈអភិបាលក្រុងបាវិតដ៏មានឥទ្ធិពល លោក ឈូក បណ្ឌិត ដែលបានបាញ់កម្មការិនីរោងចក្រនៅក្រុងបាវិត៣នាក់ឲ្យរងរបួស ទៅបើកសវនាការជាថ្មីនៅថ្ងៃទី១២ ខែមិថុនា ដោយសារតែអតីតៈអភិបាលក្រុង ដែលជាជនជាប់ចោទរូបនោះ ពុំមានវត្តមាននៅក្នុងថ្ងៃសវនការ ដោយពុំបាន​ដាក់លិខិតសុំពន្យាពេល។

លោក ឈូក បណ្ឌិត អតីតអភិបាលក្រុងបាវិត។ (រូបថត VOA)

ភាពភ្ញាក់ផ្អើលបានកើតមានឡើងនៅក្នុងបន្ទប់សវនាការដ៏ចង្អៀតណែន ពីសំណាក់ក្រុមអង្គការក្រៅរដ្ឋាភិបាល ម្ចាស់​បញ្ជាទិញ Puma ក្រុមសហជីព ដែលបានតាមដានករណីនេះយ៉ាងយកចិត្តទុកដាក់ បន្ទាប់ពីចៅក្រមលោក លាង សួ បាន​សម្រេចប្រកាសថា សវនាការសុំណុំរឿង ដ៏ចម្រុងចម្រះអតីតៈអភិបាលក្រុងបាវិត ត្រូវបានពន្យាពេលសវនាការ ដោយ​សារតែមេធាវីរបស់ជនជាប់ចោទបានដាក់លិខិតសុំពន្យារពេល ពីព្រោះជាប់ទៅបំពេញភារកិច្ចនៅក្រៅប្រទេស និងមេធាវី​ម្នាក់ទៀតបានជាប់បំពេញបេសកម្មនៅឯខេត្តកំពង់ចាម។

លោក លាង សួ ចៅក្រមសាលាដំបូងខេត្តស្វាយរៀង ដែលកាន់រឿងក្តីដ៏ស្មុគស្មាញមួយនេះ បានប្រកាសនៅក្នុង​អង្គ​សវនាការ ដែលមានការចូលរួមពីសាធារណៈជន និងក្រុមអង្គការសង្គមស៊ីវិល ថា សវនាការនេះត្រូវពន្យាពេល ហើយ​ត្រូវកំណត់លើកយកមកដាក់សវនាការជាថ្មីនៅថ្ងៃទី១២ ខែ មិថុនា ម៉ោង ៨ ព្រឹក ដោយសារមេធាវីររបស់លោកឈូក បណ្ឌិតបានដាក់លិខិតសុំពន្យារ ដោយហេតុផល មេធាវីម្នាក់ជាប់ទៅបំពេញបេសកម្មនៅប្រទេសជប៉ុន និងម្នាក់ទៀត​ជាប់ទៅការពារក្តីនៅឯខេត្តកំពង់ចាម។ លោកបានថ្លែងឲ្យដឹងទៀតថា ៖ «យើងមិនអាចដំណើរការសវនាការបានទេ ដោយយើងគោរពសិទ្ធិមេធាវីទាំងពីរបស់គាត់សុំពន្យារពេល ហើយតួរអង្គសំខាន់នៅក្នុងរឿងក្តីនេះគឺលោកឈូក បណ្ឌិត ក៏អវត្តមានផងដែរ»។

ឡើងថ្លែងតតាំងដើម្បីស្នើរសុំឲ្យតុលាការបន្តនិតិវិធី បើកសវនាការបើទោះជាមានតែសាក្សី​ ជាមន្ត្រីប៉ូលីសចំនួន១៨នាក់ និងពុំមានសាក្សីរបស់ជនរងគ្រោះក៏ដោយ កញ្ញា សារី បុត្រចរិយា មេធាវីការពារក្តីឲ្យជនរងគ្រោះ របស់អង្គការអប់រំ​ច្បាប់​សម្រាប់សហគមន៍ បានថ្លែងឲ្យដឹងថា បើពន្យាពេលម្តងហើយម្តងទៀត គឺវាពន្យាពេលកាន់តែយូ ហើយបើទោះបី​លោក​ឈូក បណ្ឌិតដែលជាតួរអង្គសំខាន់ អវត្តមានក៏ដោយក៏គាត់ធ្លាប់បានចូលសាលាឧទ្ទរណ៍ ផ្តល់ចម្លើយរបស់គាត់រួចហើយ ដូច្នេះទោះបីជាគាត់មិនមកក៏ដោយ បើតាមនិតិវិធីច្បាប់គឺអាចបន្តសវនាការ។

នៅក្នុងបន្ទប់សវនាការដ៏តូច៥ង្អៀត ហើយត្រូវបានដាក់ពង្រាយ កងកំលាំងរាជអាវុធហត្ថលើផ្ទៃប្រទេស និងប៉ូលីស​ជា​ច្រើននាក់នៅជុំវិញបរិវេណតុលាការ ជនរងគ្រោះនាង កែវ នា បានថ្លែងនៅខាងមុខតុលាការ ដោយមានកំលាំងប៉ូលីស​និងប៉េអឹមនៅឈរពីក្រោយនោះថា ចំពោះរឿងក្តីនៅថ្ងៃនេះ គឺបានស្តែងចេញខ្លះហើយថា តុលាការមិនមានចេតនា រក​យុត្តិធម៌ដល់ពួកនាងទាំងបីនាក់នោះទេ ពីព្រោះលោកឈូក បណ្ឌិតតែងតែសូមពន្យាពេលរហូត នៅពេលដែលតុលាការ ហៅ​ឲ្យមកចូលខ្លូន។ នាងបានថ្លែងឲ្យដឹងទៀតថា ៖«ខ្ញុំត្រូវតែតស៊ូដើម្បីបង្ក្រាបឈូក បណ្ឌិតឲ្យទាល់តែបាន បើទោះបីជា​បុគ្គលនេះមានលុយនិងឥទ្ធិពលក៏ដោយ ហើយខ្ញុំគ្មានលុយក៏ដោយ បើពុំដូច្នេះទេអ្នកមានអំណាច និងអ្នកមានលុយ​នឹង​បាញ់ពលរដ្ឋផ្សេងៗទៀត ដោយសារតែពួកគេគិតថាបាញ់អ្នកណាក៏គ្មានទោសពៃរ៍ដែរ»។

រីឯជនរងគ្រោះប៊ុត ចិន្តាបានថ្លែងឲ្យដឹងទៀតថា នាងនៅតែទទូចរកយុត្តិធម៌បើទោះបីជានាងដឹងថា យុត្តិធម៌នៅ​សែន​ឆ្ងាយចំពោះនាងក៏ដោយ ក៏នាងនៅតែសង្ឃឹមអាចមានយុត្តិធម៌ ពីព្រោះមន្ត្រីតែងតែថា នេះគឺជាប្រទេសនិតិរដ្ឋ ដូច្នេះ​មនុស្សគ្រប់រូបត្រូវតែអនុវត្តន៍ច្បាប់។ នាងបានថ្លែងឲ្យដឹងទៀតថា ៖«រឿងយើងបានអូសបន្លាយយូរណាស់មកហើយ តែពុំមានអ្វីប្លែកនោះទេ គឺនៅតែដដែលពួកខ្ញុំខ្លះរៀបការមានកូន ខ្លះបានរៀបការរូចអស់ទៅហើយ តែលោកឈូក បណ្ឌិត នៅតែគ្មានទោស ហើយរស់នៅយ៉ាងមានសេរីភាព»។

សុំរម្លឹកថា កាលពីថ្ងៃទី៤ ខែមិនា ឆ្នាំ ២០១៣ សាលាឧទ្ធរណ៍ បានសម្រេចធ្វើការចោទប្រកាន់សារជាថ្មីឡើងវិញលើលោក ឈូក បណ្ឌិត អតីតៈអភិបាលក្រុងបាវិត ដែលបានបាញ់កម្មការិនីរោងចក្រនៅក្រុងបាវិត៣នាក់ឲ្យរងរបួស ពីបទបង្កររបួស​ស្នាមដោយអចេតនា ហើយបង្វិលសុំណុំរឿងនេះទៅឲ្យតុលាការខេត្តស្វាយរៀងបើកសវនាសារជាថ្មីឡើងវិញ។ សំណុំ​រឿងនេះ ត្រូវបានអគ្គព្រះរាជអាជ្ញាសាលាឧទ្ទរណ៍ បានដាក់ពាក្យបណ្តឹងជំនាស់ទៅនឹងសាលាដំបូងខេត្តស្វាយរៀង ក្នុង​សំណុំរឿងសម្រេចទម្លាក់ចោលការចោទប្រកាន់ នៅថ្ងៃទី ២១ ខែធ្នូ ឆ្នាំ ២០១២។

អតីតអភិបាលក្រុងដ៏មានឥទ្ធិពលមួយនេះ ត្រូវបានតុលាការខេត្តស្វាយរៀង ធ្វើការចោទប្រកាន់បង្ករបួសស្នាម​ដោយ​អចេតនា ទាក់ទិននៅនឹងព្រឹត្តិការណ៍ថ្ងៃទី២០ ខែកុម្ភៈ ដែលបានបាញ់កម្មករ៣នាក់ឲ្យរងរបួសនៅ ខណៈកម្មករជាង ៦០០០នាក់មកពីរោងចក្រ៤ ក្នុងតំបន់សេដ្ឋកិច្ចពិសេស Manhattan ក្នុងក្រុងបាវិត បានធ្វើការតវ៉ានិងទាមទារប្រាក់ឈ្នួល និងលក្ខខណ្ឌការងារប្រសើរជាងមុន។ ប៉ុន្មានថ្ងៃបន្ទាប់មក លោកស ខេង រដ្ឋមន្ត្រីក្រសួងមហាផ្ទៃបានប្រកាសឈ្មោះ លោកឈូក បណ្ឌិត ជាលើកដំបូងថាគឺជាជនសង្ស័យ ដែលជាប់ពាក់ព័ន្ធទៅនឹងការបាញ់ប្រហារទៅលើកម្មករ។ បន្ទាប់​មក​ នៅពីថ្ងៃទី ៥ មីនា ឆ្នាំ ២០១២ លោកនាយករដ្ឋមន្ត្រីហ៊ុន សែន បានចុះហត្ថលេខាលើអនុក្រឹត្យរបស់រដ្ឋាភិបាល បាន​បង្គាប់​ឲ្យ អតីតអភិបាលក្រុងបាវិត ទៅធ្វើការនៅសាលាខេត្តស្វាយរៀង ប៉ុន្តែគ្មានមុខតំណែងដើម្បីធ្វើការឡើយ។

យោងទៅតាមដីការដំណោះស្រាយ របស់សាលាដំបូងខេត្តស្វាយរៀង ចុះហត្ថលេខាដោយលោកប៉ិច ឈឿត ចៅក្រម​សាកសួរសាលាដំបូងខេត្តស្វាយរៀង នៅថ្ងៃទី១៤ ខែធ្នូ ឆ្នាំ ២០១២ បានឲ្យដឹងថា នៅវេលាម៉ោង៩ ព្រឹក ដោយឃើញ​ស្ថានភាពហ្វូងបាតុករ ឃាត់មិនស្តាប់ ឈ្មោះ ស ចន្ថា នាយផ្នែកព្រហ្មទណ្ឌនគរបាលក្រុងបាវិត ដែលស្ថិតនៅពីមុខ​អាគារ​ទី២ ទល់មុខបន្ទប់ទឹកស្រ្តីក្នុងរោងចក្រកៅវ៉េ បានដកកាំភ្លើងខ្លីម៉ាកឡុកចិនបាញ់ចំនួនពីរទៅបីគ្រាប់ក្នុងហ្វូងបាតុករ ដើម្បី​ទប់ស្កាត់អំពើហឹង្សា។ ស្របពេលនោះឈូក បណ្ឌិត បានចុះពីលើរថយន្តរបស់ខ្លួន ចូលទៅក្នុងចំណោមកម្មករ ដើម្បីរក​ដំណោះស្រាយបញ្ឈប់សកម្មភាពហឹង្សា ក៏ត្រូវហ្វូងកម្មករនៅតែនាំគ្នាស្រែកនិងសម្រុកចូល ដោយមានកាន់ដំបង ដុំថ្ម​បាន​វាយគប់ទៅលើរោងចក្រ និងវាយមកលើឈូក បណ្ឌិត។ លោកក៏បានដកកាំភ្លើងខ្លីម៉ាកឡុកចិន កាន់លើកកាណុងឡើង​លើគំរាមដាក់កូដករ ទើបបណ្តាលឲ្យអាវុធកាន់នៅក្នុងដៃ«ផ្ទុះគ្រាប់»ឡើង និង«អាក់ស៊ីដង»។

ប៉ុន្តែលោក ស ចន្ថា បានឆ្លើយតបនៅក្នុងបរិវេណតុលាការខេត្តស្វាយរៀងថា លោកពុំបានធ្វើអ្វីទាំងអស់ ហើយលោក​ក៏ពុំ​បាននៅក្នុងកន្លែងកើតហេតុនោះដែរ នៅថ្ងៃដែលមានបញ្ហានោះ ពីព្រោះលោកប្រចាំការនៅកន្លែងផ្សេង តែបែរជា​ត្រូវ​ចោទប្រកាន់ទៅវិញ។ លោកបានថ្លែងឲ្យដឹងទៀតថា ៖«ថ្ងៃក្រោយគ្មានសមត្ថកិច្ចណាហ៊ានធ្វើការអីទៀតនោះទេ បើខ្លួន​ជាអ្នកប្រព្រឹត្តតែបែរជាចោទគេឯងទៅវិញ ពីព្រោះប៉ូលីសបានយាម នៅកន្លែងហ្វូងបាតុកម្មនោះ​បួនថ្ងៃពុំ​មាន​រឿងអ្វីកើត​ឡើងសោះ ស្រាប់តែគាត់មកដល់ភ្លាមមានរឿងកើតឡើងតែម្តង»។

ឆ្លើយតបទៅនឹងការសម្រេច របស់តុលាការខេត្តស្វាយរៀង Dr. Reiner Hengstmann, Global Director of Safe SupplyChain of Puma ដែលបានជិះយន្តហោះពីប្រទេសអាឡឺម៉ង ដើម្បីមកតាមដានរឿងក្តីនោះ បានមានប្រសាសន៍ថា លោកបានធ្វើការហោះហើរពីអាឡឺម៉ង់មកទីនេះ គឺដើម្បីធ្វើការតាមដានករណីនេះ ហើយករណីនេះគឺជាករណីដ៏ធ្ងន់ធ្ងរ។ លោកបានឲ្យដឹងទៀតថា៖ «ខ្ញុំខកចិត្តចំពោះការលើកពេលរបស់សាលាដំបូងខេត្តស្វាយរៀង ប៉ុន្តែយើងនៅតែបន្ត​តាម​ដានករណីនេះទៀត ពីព្រោះយើងមកទីនេះដើម្បីស្វែងរកយុត្តិធម៌»។

ចំណែករីឯ លោកជា មុន្នី ប្រធានសហជីពសេរីកម្មករ នៃព្រះរាជាណាចក្រកម្ពុជាឯណោះវិញ បានថ្លែងឲ្យដឹងថា នេះគឺ​ល្បែងមួយរបស់តុលាការនៅក្នុងប្រទេសកម្ពុជា ហើយការលើកពេលនេះ វាខុសនិតិវិធី ពីព្រោះលោកឈូក បណ្ឌិត គឺជា​ជនត្រូវចោទ បើទោះជាមេធាវីពន្យាពេល ក៏ដោយក៏គាត់ត្រូវតែមានវត្តមាន។ លោកបានថ្លែងឲ្យដឹងទៀតថា៖ «ឈូក បណ្ឌិត​ គឺជាជនល្មើសទៅហើយ ដូច្នេះហើយជនល្មើសដែលមិននៅក្នុងពន្ធនាគារ ធ្វើឲ្យការដំណើរការក្តី វាមិនប្រក្រតី​ដូចនៅថ្ងៃនេះ»។

រីឯលោក អំ សំអាត មន្ត្រីស៊ើបអង្កេតជាន់ខ្ពស់អង្គការការពារសិទ្ធិមនុស្សលីកាដូ បានថ្លែងនៅក្នុងសន្និសិទ្ធការសែត នៅ​ខាងមុខរបងតុលាការថា ការពន្យាពេលនេះវាគ្មានហេតុផលនោះទេ តែបើតុលាការថាសមហេតុផលនោះ លោកនៅ​តែ​មានការសោកស្តាយ ពីព្រោះគាត់គួរតែជូនដំណឹងមុន ដល់ជនរងគ្រោះក៏ដូចជាសាក្សី ដើម្បីកុំឲ្យចំណាយពេលវេលា​ឥត​ប្រយោជន៍។ លោកបានឲ្យដឹងទៀតថា ៖ «ការពន្យាពេលសវនាការនៅថ្ងៃនេះ គឺហាក់ដូចជាផ្តល់ផលប្រយោជន៍​មួយ​ដល់​លោកឈូក បណ្ឌិត ពីព្រោះការពន្យាពេលនេះគឺបានបង្ហាញថាលោកឈូក បណ្ឌិត មានចេតនាមិនចង់ចូល​ក្នុង​សវនាការ​នេះទេ។ ទោះជាយ៉ាងណាក៏ដោយ រឿងនេះគឺជារៀងមជ្ឈឹមគឺនៅតែអាចបន្តសវនាការបាន តែតុលាការគ្រាន់តែធ្វើ​ជា​ការបង្គ្រប់និតិវិធីតាមផ្លូវច្បាប់តែប៉ុណ្ណោះ ធាតុពិតនៃការរកយុត្តិធម៌ដល់ជនរងគ្រោះ នៅតែមិនមានទាល់តែសោះ រីឯ​ឈូក បណ្ឌិត នៅតែរស់ក្រៅពន្ធនាគារជាដរាប។»

លោកបានបន្តឲ្យដឹងទៀតថា នេះគឺជាលើកទី១ តែប្រសិនបើលើកទី២ នៅតែពុំមានវត្តមានរបស់ជនជាប់ចោទ ឈូក បណ្ឌិត នៅឯតុលាការទេ ក្នុងនាមសង្គមស៊ីវិល លោកទទូចហើយទទូចទៀត សូមឲ្យដំណើរការទៅតាមផ្លូវច្បាប់ ដើម្បី​ផ្តល់យុត្តិធម៌ទៅដល់ជនរងគ្រោះ។ លោកបានឲ្យដឹងទៀតថា ៖ «លោកឈូកបណ្ឌិតដឹងថា រដូវនេះគឺជារដូវបោះឆ្នោត។ ដូច្នេះប្រសិនបើគាត់ចូលខ្លូន មកតុលាការគឺវាមានរឿងមិនល្អចំពោះរូបគាត់ ពីព្រោះគណបក្សនយោបាយ គឺចង់បាន​ប្រជាប្រិយភាពពីអ្នកបោះឆ្នោត៕»

----------------------------------------------------
ដោយ៖ គិន ង៉ុយ - ភ្នំពេញ ថ្ងៃទី២១ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ