និពន្ធនាយក អង្គភាពសារព័ត៌មាន​កម្លាំង​មនុស្​សធម៌ លោក ឃឿន សុឡា ហៅ «K01» និងក្រុមការងារ អាច​នឹង​មាន​បញ្ហាធ្ងន់ធ្ងរ ប្រសិនបើក្រុម​របស់​លោក​មិន​បញ្ឈប់សកម្មភាព ដែលអាជ្ញាធរចាត់ទុកថា ជាការ​«បង្ក​ភាព​រញ៉េ​រញ៉ៃ អនាធិបតេយ្យ និងមិនព្រមសហការ» ជាមួយអាជ្ញាធរ។ គេហទំព័រ​របស់​នគរបាលជាតិ បានស្រង់​សំដី របស់​លោកឧត្ដមសេនីយ៍ ជួន សុវណ្ណ អគ្គស្នងការនគរបាលរាជធានី មកសរសេរថា លោកនឹងបញ្ជា​ទៅ​គ្រប់​បណ្ដា​ខណ្ឌ ទាំង១២ នៅក្នុង​រាជធានី​ភ្នំពេញ ឲ្យត្រួតពិនិត្យចំពោះទង្វើ របស់ក្រុមការងារ «K01»។

នៅក្នុងអត្ថបទរបស់ខ្លួន ដែលមានចំណងជើង «សមត្ថកិច្ច​នឹងមានវិធានការ ចំពោះ K01 បើនៅតែបង្កភាព​រញ៉េ​រញ៉ៃ​លើដងផ្លូវ» គេហទំព័រដដែល បាន​លើកមកបញ្ជាក់ នូវមាត្រាមួយចំនួន នៃច្បាប់ចរាចរណ៍​ជើង​គោក និងច្បាប់ក្រមព្រហ្មទណ្ឌ ដែលអាចឲ្យគេដឹងថា សមាជិកក្រុមរបស់លោក ឃឿន សុឡា អាចនឹងមាន​ទោស ​រហូត​​ជាប់​ពន្ធនាគារ ប្រសិនជានៅតែបន្តសកម្មភាព ចាប់ឃាត់យានយន្ដ នៅតាមដង​ផ្លូវ​សាធារណៈ​តទៅ​ទៀត។​ សកម្មភាព ដែល​អត្ថបទ​នោះ ហៅថា ជាការ«សម្ញែង»ខ្លួនឯង ថាជាក្រុមសកម្មបំផុត ក្នុងសង្គម។

គេហទំព័រ បានសរសេរថា៖

តាមច្បាប់ចរាចរណ៍ជើងគោក ក្នុងជំពូកទី៩ មាត្រា៦០ ស្តីពីសមត្ថកិច្ច និងសិទ្ធិអំណាច របស់មន្ត្រីអនុវន្តច្បាប់ ស្តី​ពី​ចរាចរណ៍ផ្លូវគោក បានចែងថា៖ «មន្ត្រី​អនុវន្តច្បាប់ចរាចរណ៍ផ្លូវគោក រួមមាន ១- មន្ត្រីមកពីក្រសួង​សាធារណការ និងដឹកជញ្ជូន, ២-អង្គភាពនគរបាល ឬកងកម្លាំងអាវុធហត្ថ ដែលទទួលបន្ទុក​រៀបចំ​​សណ្តាប់ធ្នាប់ សុវត្ថិភាព និងចាត់ចែងចរាចរណ៍ ឲ្យមានសណ្តាប់ធ្នាប់ល្អ, តាមដាន ល្បាត និង​ពិនិត្យ​អំពើ​ល្មើស​នឹង​បទ​ប្បញ្ញត្តិចរាចរណ៍ផ្ទាល់ ឬដោយ​ឧបរណ៍បច្ចេកទេស, ធ្វើរបាយការណ៍ ស្តីពីសភាព​ការណ៍​សណ្តាប់​ធ្នាប់​ចរាចរណ៍ បទល្មើសចរាចរណ៍ និងគ្រោះថ្នាក់ចរាចរណ៍ ដែលកើត​មាន​ឡើង»។

ចំណែកក្រមព្រហ្មទណ្ឌ នៃព្រះរាជាណាចក្រកម្ពុជា មាត្រា៦០៩ បានចែងអំពីការជ្រៀតជ្រែក ក្នុងមុខងារ​សាធារណៈ ថា៖ «បទជ្រៀតជ្រែក ដោយ​ខុស​ច្បាប់ ទៅក្នុងការបំពេញមុខងារសាធារណៈ ត្រូវផ្តន្ទាទោស ដាក់​ពន្ធនាគារពី១ ឆ្នាំទៅ៣ឆ្នាំ និងពិន័យជាប្រាក់ពី ពីរលានរៀល ទៅប្រាំមួយលានរៀល អំពី​ជ្រៀងជ្រែក ដោយ​ខុស​ច្បាប់ ក្នុងការអនុវត្តមុខងារសាធារណៈណាមួយ ដោយបំពេញកិច្ចណាមួយ ក្នុងចំណោមកិច្ចទាំងឡាយ ដែល​សម្រាប់​តែ​អ្នកមាន​សិទ្ធិ ក្នុងមុខងារនេះ»។

រីឯមាត្រា៦១០ នៃក្រមព្រហ្មទណ្ឌនេះ បានចែងថា៖ «បទធ្វើសកម្មភាព បង្កើតឲ្យមានការយល់ច្រឡំ ជាមួយ​ការ​បំពេញ មុខងារសាធារណៈ ត្រូវ​ផ្តន្ទា​ទោស ដាក់ពន្ធនាគារ ពីមួយខែ ទៅមួយឆ្នាំ និងពិន័យជាប្រាក់​មួយ​សែន​រៀល ទៅពីរលានរៀល បុគ្គលដែលធ្វើសកម្មភាព នៅក្នុងលក្ខខណ្ឌ ដែល​អាច​នាំ​ឲ្យ​សាធារណៈជន​យល់​ច្រឡំ ថាជាការបំពេញមុខងារសាធារណៈ»។

សកម្មភាព ដែលនាំឲ្យ«ខូច»រូបភាព របស់រដ្ឋាភិបាល...

គេហទំព័រ បានសរសេររៀបរាប់ដាក់បន្ទុក លើក្រុមលោក «K01» ថា៖ «យោងតាមច្បាប់ចរាចរណ៍ គ្មាន​ជន​ស៊ីវិល​ណាម្នាក់ អាចធ្វើការរបស់​មន្ត្រី​នគរបាល ដែល​ត្រូវ​បាន​បណ្តុះបណ្តាលត្រឹមត្រូវ ទាំងផ្លូវច្បាប់ និង​ចិត្ត​សាស្ត្រ។ ដូច្នេះសកម្មភាពរបស់ក្រុម KO1 ដែលជាជនស៊ីវិលធម្មតា មិនមានសិទ្ធិ​ធ្វើកិច្ចការ ផ្នែក​​ចរាចរណ៍​​ឡើយ ហើយក៏គ្មានសិទ្ធិហាមឃាត់ ឬរារាំងអ្នកធ្វើដំណើរដទៃទៀតឡើយ។ ទង្វើដែលធ្វើខុសគោលការ​ច្បាប់ របស់ក្រុម KO1 អាចមានទោស ប្រសិនបើយកច្បាប់មកអនុវត្ត។»។

អត្ថបទរបស់គេហទំព័រនគរបាលជាតិ បានសរសេរព្រមានបន្តថា៖ «ចំណែកទង្វើរំលោភបំពានសិទ្ធិ មន្ត្រី​សាធារណៈ ដូចមានចែងក្នុងក្រមព្រហ្មទណ្ឌ ដូចរៀបរាប់ខាងលើ [ក្រុម] KO1 មិនអាចរួចខ្លួន ពីការ​ជាប់​ពន្ធនាគារ​ឡើយ ព្រោះអំពើរបស់ពួកគេ នាំឲ្យខូចផលប្រយោជន៍ច្បាប់ និងបង្កភាពវឹកវរ​ក្នុង​សង្គម ព្រោះ​វា​នាំ​អ្នក​ដទៃ​ទៀត​យល់​ដោយ​ភាន់ច្រឡំថា រដ្ឋាភិបាល ក៏ដូចជាអាជ្ញាធរមូលដ្ខាន ខ្វះសមត្ថភាពក្នុងការ​គ្រប់គ្រង​រដ្ឋ និង​គ្រប់​គ្រង​សណ្ដាប់​ធ្នាប់ ក្នុងសង្គម។»៕