ភ្នំពេញ៖ គណៈកម្មាធិការចម្រុះឯករាជ្យមួយ ទំនងជានឹងអាចចេញជារូបរាង ក្រោយពីមានជំនួបរវាង គណៈកម្មាធិការ​ជាតិរៀបចំការបោះឆ្នោត (គ.ជ.ប) តំណាងមកពីគណបក្សប្រជាជនកម្ពុជា និងមកពីគណបក្សសង្គ្រោះជាតិ កាលពី​ព្រឹក​ថ្ងៃសៅរ៍ទី៣ ខែសីហានេះ នៅទីស្តីការគ.ជ.ប។ ប៉ុន្តែសម្រាប់គណបក្សសង្គ្រោះជាតិ សមាសភាពដែល​ត្រូវបាន​កំណត់​ឡើង មិនសមប្រកបនឹងអាចធានាបាន នូវយុត្តិធម៌មិនលំអៀងនោះឡើយ។

ពីឆ្វេងទៅស្ដាំ លោក គួយ ប៊ុនរឿន លោក យឹម សុវណ្ណ លោក ហូ វ៉ាន់ មន្ត្រីរបស់គណបក្សសង្គ្រោះជាតិ នាព្រឹកថ្ងៃទី៣ខែសីហានេះ។ (រូបថត MONOROOM.info/ O. Vary)

ក្នុងជំនួបត្រីភាគីលើកទីមួយ ដែលមានគណៈកម្មាធិការជាតិរៀបចំការបោះឆ្នោត គណបក្សប្រជាជនកម្ពុជាដែលមាន លោក ព្រុំ សុខា ជាតំណាង និងគណបក្សសង្គ្រោះជាតិ មានលោក គួយ ប៊ុនរឿន ជាតំណាង។ ក្នុងជំនួបស្តីពីការសម្រេច​បង្កើតគណៈកម្មាធិការចម្រុះឯករាជ្យមួយ បានធ្វើឡើងបន្ទាប់ពីការបោះឆ្នោតត្រូវបានបញ្ចប់ និងដោយមានការទាមទារ ដោយគណបក្សប្រឆាំង ដើម្បីពិនិត្យ និងស៊ើបអង្កេតទៅលើភាពមិនប្រក្រតីដែលបានកើតឡើង ពិសេសក្នុងដំណាក់​កាលនៃការបោះឆ្នោត និងរាប់សន្លឹកឆ្នោត។

ក្នុងកិច្ចប្រជុំដោយបិទទ្វានេះ លោក យឹម សុវណ្ណ មន្ត្រីអ្នកនាំពាក្យរបស់គណបក្សសង្គ្រោះជាតិ ក៏បានស្នើរសុំដល់គ.ជ.ប អនុញ្ញាតិឲ្យអ្នកសង្កេតការណ៍ និងអ្នកយកព័ត៌មានចូលរួមស្តាប់ ដើម្បីផ្តល់នូវព័ត៌មានទាំងនេះដល់ម្ចាស់ឆ្នោត តែត្រូវបាន​បដិសេធដោយគ.ជ.ប។

លោកទេព នីថា បានបញ្ជាក់ថា ក្រោយពីជំនួបនេះមក អង្គប្រជុំបានសម្រេចទៅលើករណីពីរ ទីមួយការសម្រេចបង្កើត​គណៈកម្មាធិការចម្រុះដែលមាន គ.ជ.ប តំណាងគណបក្សប្រជាជនកម្ពុជា និងតំណាងគណបក្សសង្គ្រោះជាតិ។ ទីពីរ​គណៈកម្មាធិការចម្រុះនិងធ្វើការពិភាក្សាគ្នាអំពីអាណត្តិ និងភារកិច្ចរបស់ខ្លួន។

លោកបន្តរថាអង្គការសង្គមស៊ីវិលជាតិនិងអន្តរជាតិ មិនមែនជាភាគីពាក់ព័ន្ធក្នុងករណីនេះទេ មិនអាចចូលរួមជា​សមាជិក​បានទេ ប៉ុន្តែមានសិទ្ធិ និងតួនាតីក្នុងការចូលរួមជាអ្នកសង្កេតការណ៍ និងវាយតម្លៃនៃដំណើរការ​គណៈកម្មាធិការ​ចម្រុះ ក៏ដូចជាដំណើរការនៃការដោះស្រាយបញ្ហាទូទៅបាន តែមិនមានវត្តមានរបស់អង្គការសហប្រជាជាតិ (UN) ចូលរូមទេ ដោយហួសពីសមត្ថភាពគ.ជ.ប។ លោកបន្តរថាគណៈកម្មាធិការចម្រុះនេះ នឹងធ្វើការបង្កើតឲ្យបានឆាប់បំផុត តែមិនទាន់​មានកំណត់នូវចំនួនសមាជិក នៃគណបក្សដែលនឹងត្រូវចូលរួម ធ្វើការងារនេះនៅឡើយនោះទេ។ តែជាបឋមក្រោយការ​បង្កើត គណៈកម្មាធិការចម្រុះនឹងពិនិត្យទៅលើរបាយការណ៍នៃភាពមិនប្រក្រតី ដែលបានដាក់ដោយគណបក្ស​នយោបាយ នៅតាមរាជធានីខេត្ត-ក្រុង។

អគ្គលេខាធិការរូបនេះ បានលើកឡើងពាក់ព័ន្ធការបង្កើតគណៈកម្មាធិការចម្រុះនេះថា «ជាការសម្រេចដ៏ល្អមួយ ដែល​អាចឲ្យបងប្អូបប្រជាពលរដ្ឋ អ្នកបោះឆ្នោតទាំងអស់មានការនឹងធឹងក្នុងចិត្ត ថាគណបក្សដែលបានជាប់ឆ្នោតទាំងពីរ រួមទាំងគ.ជ.ប បានរួមសហការគ្នា ដោះស្រាយបញ្ហាដែលយើងថា មានភាពមិនប្រក្រតីក្នុការបោះឆ្នោតនោះ»។

លោក ព្រុំ សុខា តំណាងគណបក្សប្រជាជនកម្ពុជា បានគេចចេញពីអ្នកកាសែតដោយគ្រាន់តែបញ្ជាក់យ៉ាងខ្លីថា «លទ្ធផល​ប្រជុំថ្ងៃនេះ យើងកំពុងតែធ្វើដំណើរទៅមុខហើយ»។

ឯលោក គួយ ប៊ុនរឿន តំណាងគណបក្សសង្រ្គោះជាតិ បានផ្តល់បទសម្ភាសជាមួយអ្នកកាសែតថា «ជាគោលការណ៍​យើងនឹងបើកការស៊ើបអង្កេតមួយ ព្រោះយើយទាំងអស់គ្នា សុទ្ធិតែមានសុឆន្ទះ ចង់បង្កើតឲ្យមានគណៈកម្មការ​ចម្រុះ​នេះទាំងអស់គ្នា»។ គណៈកម្មាធិការ នេះត្រូវបានបង្កើតឡើង បន្ទាប់ពីមានការតវ៉ាអំពីភាពមិនប្រក្រតី នៃការបោះឆ្នោត​ដោយគណបក្សប្រឆាំង។ លោកក៏បានបង្ហាញភាពមិនអស់ចិត្តមួយចំនួន នូវការបដិសេធដោយ គ.ជ.ប ចំពោះវត្តមាន​របស់អង្គការសហប្រជាជាតិ (UN) ចូលរូមក្នុងគណកម្មាធិការអង្កេតនេះ។

ការព្រមព្រៀងគ្នាដែលមិនសូវមានភាពច្បាស់លាស់ខាងលើ ត្រូវបានគណបក្សសង្គ្រោះជាតិលើកមកបញ្ជាក់​ឡើង​វិញនៅ​ល្ងាចថ្ងៃដដែល ដោយបានទាមទារឲ្យមានការចូលរួមកាន់តែទូលាយថែមទៀត ទាក់ទងនឹងសមសភាពនៅក្នុង​គណៈកម្មាការចម្រុះនេះ។ នៅក្នុងលិខិត ចុះហត្ថលេខាដោយប្រធានគណបក្ស លោក សម រង្សី បាននិយាយថា គណបក្ស​សង្គ្រោះ​ជាតិ ចង់ឱ្យ គណៈកម្មការ​ចម្រុះ​ដោះស្រាយ​ភាពមិនប្រក្រតី ​ក្នុងពេល​បោះឆ្នោត មាន​សមាសភាព គណបក្ស​សង្គ្រោះ​ជាតិ គណបក្ស​ប្រជាជន​កម្ពុជា ព្រមទាំង​អង្គការ​សង្គម​ស៊ីវិល អ្នក​អង្កេតការ​ជាតិ និង​អន្តរជាតិ ដោយ​មាន​គណៈកម្មាធិកា​រ​ជាតិ​រៀបចំ​ការបោះឆ្នោត ជា​អ្នកសម្រប​សម្រួល និង​អង្គការសហប្រជាជាតិ ជា​អាជ្ញា​កណ្តាល។

អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានថ្លែងព្រមានថា ​គណបក្ស​សង្គ្រោះ​ជាតិ​នឹងមិន​ចូលរួម​គណៈកម្មការ​ចម្រុះ​នេះទេ​ បើ​គ្មាន​អង្គការ​ពាក់ព័ន្ធ និង​អង្គការសហប្រជាជាតិ​ជា​អាជ្ញាកណ្តាល ព្រោះ​លោក​បាន​អះអាងថា វា​គ្មាន​ន័យ៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០៣ សីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ