អាចជាការត្រៀមទុក តាំងពីច្រើនខែហើយ ដែលលោក សម រង្ស៊ី មេដឹកនាំប្រឆាំងដ៏សំខាន់​របស់កម្ពុជា ត្រូវបង្ហាញវត្តមានរបស់លោក នៅលើទឹកដីនៃប្រទេសជប៉ុន ដែលត្រូវបានគេគិតថា កំពុងដើរតួនាទីដ៏សំខាន់មួយ នៅក្នុងវិបត្តិនយោបាយខ្មែរ។ លោកបានធ្វើដំណើរ ទៅដល់រាជធានីតូក្យូ នៅមុននេះបន្តិច ដោយមានអមដំណើរ ដោយភរិយាលោក គឺអ្នកស្រី ជូឡុង សូម៉ូរ៉ា និងរង់ចាំទទួល ដោយអ្នកស្រី មូ សុខហួរ តំណាងរាស្ត្រជាប់ឆ្នោត មកពីគណបក្សសង្គ្រោះជាតិ ដែលត្រូវបានដកហូត មិនឲ្យធ្វើនយោបាយ សម្រាប់រយៈពេល៥ឆ្នាំ។

នៅក្នុងដំណើរទស្សនកិច្ច របស់ប្រធានចលនាសង្គ្រោះជាតិ និងជាអតីតប្រធានគណបក្សសង្គ្រោះជាតិ ត្រូវបានគេរំពឹងថា ដើម្បីជួបជាមួយអ្នកគាំទ្រ ដែលមានចំនួនច្រើនរយនាក់ នៅថ្ងៃទី១៤ ខែមេសាខាងមុខ។ មន្ត្រីស្និតចលនាសង្គ្រោះជាតិ នៅក្នុងប្រទេសបារាំង បានថ្លែងប្រាប់ទស្សនាវដ្ដី មនោរម្យ.អាំងហ្វូ នៅមុននេះបន្តិចថា មន្ត្រីទទួលខុសត្រូវមួយចំនួន របស់ប្រទេសជប៉ុន ក៏នឹងទទួលជួបលោក សម រង្ស៊ី នៅក្នុងរយៈពេល នៃវត្តមានរបស់លោក នៅទីនោះដែរ។

វត្តមានរបស់មេដឹកនាំប្រឆាំង បានធ្វើឡើងពីរសប្ដាហ៍ ក្រោយវត្តមានកូនស្រីលោក កឹម សុខា ប្រធានគណបក្សសង្គ្រោះជាតិ គឺកញ្ញា កឹម មនោវិទ្យា ដែលបានធ្វើដំណើរ ទៅដល់ប្រទេសជប៉ុន កាលពីចុងខែកន្លងទៅ។ នៅពេលនោះ កញ្ញា កឹម មនោវិទ្យា ដែលជាមន្ត្រីទទួលបន្ទុក កិច្ចការសាធារណៈ របស់គណបក្សប្រឆាំង ត្រូវបានមន្ត្រីអ្នកទទួលខុសត្រូវ របស់ប្រទេសជប៉ុន ទទួលជួប​ដើម្បីកិច្ចពិភាក្សា​ជាច្រើន ជុំវិញវិបត្តិនយោបាយ នៅកម្ពុជា។

កាលពីចុងសប្ដាហ៍មុន រដ្ឋមន្ត្រីការបរទេសជប៉ុន លោក តារ៉ូ កូណូ (Taro Kono) បានធ្វើទស្សនកិច្ចរយៈពេលខ្លីមួយ នៅកម្ពុជា។ នៅក្នុងជំនួបជាមួយលោក ហ៊ុន សែន នាយករដ្ឋមន្ត្រីកម្ពុជា ដែលអង្គុយក្នុងតំណែង តាំងពី៣៣ឆ្នាំមកនោះ លោក តារ៉ូ កូណូ បានអះអាងថា ប្រទេស​ជប៉ុន នៅតែ​បន្ត​ ចង់​ឃើញ​ការបោះឆ្នោត​នៅ​កម្ពុជា ប្រព្រឹត្ត​ទៅ​ដោយ​សេរី ត្រឹមត្រូវ និង យុត្តិធម៌ ដែល​មាន​ការចូលរួម ពី​គណបក្សប្រឆាំង​ដ៏​ធំ​ជាង​គេ នៅ​កម្ពុជា៕