ក្រុមប្រឹក្សានៃសហភាពអ៊ឺរ៉ុប ដែលជាក្បាលម៉ាស៊ីនដឹកនាំសហភាពអ៊ឺរ៉ុប (ឬនិយាយម្យ៉ាងទៀត ជារដ្ឋាភិបាលនៃសហភាពអ៊ឺរ៉ុប) បានចេញសេចក្ដីសន្និដ្ឋានមួយមាន១១ចំណុច ព្រមានរដ្ឋាភិបាលកម្ពុជាខ្លាំងៗ ចំពោះសភាពការណ៍នយោបាយកម្ពុជាសព្វថ្ងៃ ដែលក្រុមប្រឹក្សាបានពន្យល់ថា មានភាពអាក្រក់ជាទីបំផុត។ 

នៅក្នុងសេចក្ដីប្រកាសព័ត៌មានរួមមួយ ដែលបានចេញផ្សាយ នៅបន្ទាប់ពីបញ្ចប់កិច្ចប្រជុំ នៃបណ្ដារដ្ឋមន្ត្រីការបរទេសអ៊ឺរ៉ុប ក្នុងថ្ងៃចន្ទទី២៦ ខែកុម្ភៈនេះ បានសរសេរដាក់ឱសានវាទ ទៅកាន់របបដឹកនាំក្រុងភ្នំពេញថា៖ «ប្រសិនជាស្ថានភាព មិនមានភាពប្រសើរឡើងវិញទេ ក្រុមប្រឹក្សាអ៊ឺរ៉ុបនឹងចាត់វិធានការ ដោយផ្ទាល់ និងចំទិសដៅដ៏សំខាន់ៗជាច្រើន»។

សេចក្ដីប្រកាសព័ត៌មាន បានបញ្ជាក់ថា ក្រុមប្រឹក្សាអ៊ឺរ៉ុបទាមទារ ឲ្យរដ្ឋាភិបាលកម្ពុជា បញ្ឈប់ប្រើប្រាស់ប្រព័ន្ធតុលាការ ជា«សម្ភារៈនយោបាយ» ដើម្បីគម្រាមកំហែង និងបំភិតបំភ័យក្រុមអ្នកនយោបាយប្រឆាំង ក្រុមអង្គការសង្គមស៊ីវិល បណ្ដាអ្នកការពារសិទ្ធិការងារ និងសិទ្ធិមនុស្ស។

នៅចំពោះហេតុការណ៍ ដែលមានលក្ខណៈនយោបាយជាច្រើន ត្រូវបានក្រុមប្រឹក្សាអ៊ឺរ៉ុប សំដែងក្ដីបារម្ភរបស់ខ្លួន យ៉ាងជ្រាលជ្រៅជាទីបំផុត។ ហេតុការណ៍ ដែលត្រូវបានយកមកបញ្ជាក់នោះ មានដូចជាការបិទអង្គការក្រៅរដ្ឋាភិបាល និងប្រព័ន្ធផ្សព្វផ្សាយឯករាជ្យជាច្រើន ជាពិសេសការរំលាយគណបក្សសង្គ្រោះជាតិ និងការចាប់ប្រធានគណបក្ស លោក កឹម សុខា  យកទៅឃុំខ្លួនរហូតមកដល់ពេលនេះ។

ក្រុមប្រឹក្សាអ៊ឺរ៉ុប «ទទូចជាថ្មី ឲ្យមានការដោះលែង លោក កឹម សុខា ភ្លាម» និងអំពាវនាវ ទៅអាជ្ញាធរកម្ពុជា ឲ្យ«លប់ចោលជាបន្ទាន់ នូវការការសម្រេចរំលាយគណបក្សប្រឆាំងខាងលើ»។

Council adopts conclusions on #Cambodia in the light of worrying political developments & the continuing deterioration of #democracy, respect of #human rights & the rule of law. Specific targeted measures possible if no improvements

Full text: https://t.co/mldpXHj8hs

— EU Council Press (@EUCouncilPress) 26 février 2018

ព្រឹទ្ធសភាឯកបក្ស...

ការព្រមានរបស់ក្រុមប្រឹក្សាអ៊ឺរ៉ុប ដែលជានីតិប្រតិបត្តិ​ដឹកនាំសហភាពអ៊ឺរ៉ុប បានធ្វើឡើងមិនដល់២៤ម៉ោងផងទេ ក្រោយពីការបោះឆ្នោតជ្រើសតាំងសមាជិកព្រឹទ្ធសភា នៅកម្ពុជា ដែលបានប្រព្រឹត្តិទៅ កាលពីថ្ងៃអាទិត្យម្សិលម៉ិញ។ លទ្ធផលបណ្ដោះអាសន្ន នៃការបោះឆ្នោត មិនបានខុសពីការរំពឹងទុកទេ គឺគណបក្សប្រជាជនកម្ពុជា របស់លោកនាយករដ្ឋមន្ត្រី ហ៊ុន សែន បានឈ្នះកៅអីទាំង ៥៨ លើ៥៨កៅអី ដែលអនុញ្ញាតឲ្យគណបក្សមួយនេះ អាចបន្តក្ដោបក្ដាប់ស្ថាប័នកំពូលមួយនេះ តែម្នាក់ឯង សម្រាប់រយៈពេល៦ឆ្នាំទៅមុខទៀត៕