ហ៊ុន សែន ត្រៀម​ធ្វើ​សង្គ្រាម

ជាសំដីសារភាពលើកដំបូងបំផុត ដែលចេញពីមាត់ផ្ទាល់ របស់នាយករដ្ឋមន្ត្រីកម្ពុជា ដែលមិនរង្គើពី​អំណាច តាំង​ពីជាង​​៣​ទសវត្សន៍​មក​ហើយ។ លោក ហ៊ុន សែន បានថ្លែងឡើង ក្នុងឯកសណ្ឋាន​ជាមេបញ្ជាការ កងទ័ព​ជាតិ ​ថាបើ​សង្គ្រាម​«ផ្ទុះឡើង ក៏ផ្ទុះទៅចុះ» តែលោកត្រូវ​តែទប់ស្កាត់ ទោះក្នុងតម្លៃណា​ក៏ដោយ ទល់នឹង​ចលនា​ប្រឆាំង ​ដែល​​ធ្វើឲ្យ​ខូច​ដល់​សណ្ដាប់ធ្នាប់​សាធារណៈ ក្នុងអំឡុង​ពេល និងក្រោយ​ពេល​ការបោះឆ្នោត​​សាកល​ទាំង​ពីរ នាពេល​ខាងមុខ។
ហ៊ុន សែន ត្រៀម​ធ្វើ​សង្គ្រាម
លោក ហ៊ុន សែន ក្នុងឯកសណ្ឋានជាមេបញ្ជាការកងទ័ព ប្រកាសសុទ្ធចិត្តឲ្យ«សង្គ្រាមផ្ទុះ ក៏ផ្ទុះទៅចុះ»។ (រូបថតលើហ្វេសប៊ុក)
Loading...
  • ដោយ: ដ. កែវ ([email protected]) - ភ្នំពេញ ថ្ងៃទី១០ ឧសភា ២០១៧
  • កែប្រែចុងក្រោយ: May 10, 2017
  • ប្រធានបទ: នយោបាយខ្មែរ
  • អត្ថបទ: មានបញ្ហា?
  • មតិ-យោបល់

បើគ្រាន់តែ ដើម្បី​រក្សាសណ្ដាប់ធ្នាប់​សាធារណៈ លោក ហ៊ុន សែន បានព្រមានថា លោកសុខចិត្តឲ្យ​«សង្គ្រាម​ផ្ទុះ​ក៏​ផ្ទុះ​ទៅ​ចុះ» តែ​លោក​នឹងមិនសុខចិត្ត ឲ្យចលនាពលរដ្ឋ ដែលមាននិន្នាការប្រឆាំង ប្រព្រឹត្តិនូវ​អំពើ​ខុស​ច្បាប់ ដូច​ជា​ការ​«ដុតឡាន» ឬ​ការ​រារាំង​«ពលរដ្ឋ មិន​ឲ្យ​បោះ​ឆ្នោត» នោះ​ឡើយ។ នាយក​រដ្ឋមន្ត្រី​កម្ពុជា ដែល​មាន​អតីតភាព ជា​ទាហាន​ខ្មែរ​ក្រហម និង​ជា​ជន​កុម្មុយនីស ស្និត​នឹង​ប្រទេសវៀតណាម បានថ្លែង​ដូច្នេះ នៅព្រឹក​ថ្ងៃ​ទី១០ ខែ​ឧសភា​នេះ ក្នុងពិធី​អបអរសាទរ​​ខួប​១០ឆ្នាំ នៃទិវាអតីត​​យុទ្ធជនកម្ពុជា ដែល​​ធ្វើ​​ឡើង​ នៅ​​មជ្ឈ​មណ្ឌល​​​សន្និបាត និង​​ពិព័រណ៍​​កោះ​​ពេជ្រ កណ្ដាល​រាជធានី​ភ្នំពេញ។

នៅចំពោះអតីត​យោធិន​ជាច្រើន​រយ​នាក់ លោក ហ៊ុន សែន បានប្រើប្រាស់​ពេល​ជាច្រើន​ម៉ោង ក្នុង​នាម​ជា​នាយក​រដ្ឋមន្ត្រី និ​ងជា​អគ្គមេ​បញ្ជាការ​កងទ័ពជាតិ ដើម្បីរៀបរាប់​ពីគុណសម្បត្តិ នៃការដឹកនាំ​ច្រើន​​ទសវត្សន៍ របស់លោក ​និង​​គណបក្ស​​ប្រជាជន​​កម្ពុជា។ នៅទីបំផុត លោក​បាន​សរុប​សេចក្ដី​ថា៖ «គណបក្ស​ប្រជាជន​[កម្ពុជា] ត្រូវ​តែ​​ឈ្នះ​​ឆ្នោត នៅគ្រប់ការ​បោះឆ្នោត​ទាំងអស់»។

នាយករដ្ឋមន្ត្រី ដែលមិនរង្គើចេញពីតំណែង តាំងពីជាង៣០ឆ្នាំមកនេះ បានព្រមានសុខចិត្ត​ឲ្យ​​ផ្ទុះសង្គ្រាម​​ថា៖ «សូមកុំភ្លេច ថ្ងៃ២៨ ខែកក្កដា [ឆ្នាំ២០១៣] មិនទាន់ទាំងដឹងលទ្ធផលផ្លូវការផង ឆេះឡានអស់ប៉ុន្មាន នៅ​ស្ទឹង​មាន​ជ័យ? អ្នកឯង​ធ្វើសកម្មភាព ច្រើន​ទីកន្លែង មិនឲ្យពលរដ្ឋ​ចូលបោះឆ្នោត។ តែដើម្បី​ថ្នាក់ថ្នម​សភាព​ការណ៍ យើង​អត់​ធ្មត់ មិន​ធ្វើ​សកម្មភាព។ តែកុំភ្លេចថា ២០១៧ និង២០១៨ បើ​សកម្មភាព​ពួក​អ្នកឯង​របៀប​នេះ កម្លាំង​ប្រដាប់​អាវុធ ត្រូវចេញ​បង្ក្រាប​ភ្លាម បើផ្ទុះ​សង្គ្រាម ក៏ឲ្យវាផ្ទុះ​ទៅ​ចុះ។»។

«ថ្ងៃបុណ្យខ្មោច...»

លោក ហ៊ុន សែន បានព្រមានលោក កឹម សុខា ប្រធានគណបក្សសង្គ្រោះជាតិ ដោយចំមុខ ថា​បើ​នៅ​តែ​ហ៊ាន​​ធ្វើ​រឿង​ទាំង​នោះ ថ្ងៃនេះ​​គឺថ្ងៃបុណ្យ​​ខ្មោច របស់​ប្រធាន​គណបក្ស​ប្រឆាំងរូបនេះ ជាមិនខាន។ បុរស​​ខ្លាំង​​កម្ពុជា​ បាន​ថ្លែង​ថា៖ «អត់មាន​ទុក​ឲ្យ​មក​ដុត​​ឡាន បំផ្លាញ​សណ្ដាប់​ធ្នាប់​សាធារណៈ​នោះ​ទេ។ មិនទាន់​ទាំង​ឈ្នះ [ឆ្នោត] ផង បែរ​ជា​បង្កើត​ហេតុ​​ទៅ​​ហើយ។ បន្ទាប់​ពីនោះ ធ្វើបាតុកម្ម ​"ហ៊ុន សែន អើយ ចុះចេញ​ទៅ"។ ខ្ញុំ​បាន​​និយាយ ជា​មួយ កឹម សុខា ដោយ​​ផ្ទាល់ នៅ​នឹង​រដ្ឋសភា "ខ្ញុំថា ម៉េច​​ឯកឧត្ដម បើមិនចុះ មានតែអង្រួន​​ឲ្យចុះ"។ ខ្ញុំ​បាន​​ចង្អុល​​មុខ​​គាត់ (...) ខ្ញុំថា​ឯកឧត្ដម បើ​សិន​​ជា​ឯកឧត្ដម​​ធ្វើ [ដូច្នេះ] ថ្ងៃ​នេះ គឹថ្ងៃបុណ្យខ្មោច​ឯកឧត្ដម​ទេ។ សុំ កុំ​ព្រហើន!»។

» វីដេអូ នៃការថ្លែងពីបំណង ឲ្យផ្ទុះសង្គ្រាម របស់លោក ហ៊ុន សែន៖

មិនមានប្រតិកម្មដោយផ្ទាល់ ចេញពីគណបក្សសង្គ្រោះជាតិ ឬចេញពីប្រធានគណបក្សសង្គ្រោះ​ជាតិ លោក កឹម សុខា នោះ​ទេ។ តែលោក អេង ឆៃអ៊ាង អនុប្រធាន​គណបក្សប្រឆាំង បានបង្ហោះ​សារខ្លីមួយ នៅលើ​បណ្ដាញ​សង្គម ប្រៀបធៀប​ការ​ព្រមាន​ធ្វើ​សង្គ្រាម របស់លោក ហ៊ុន សែន ថាមានន័យ​ស្មើរ​នឹង«ប្រឆាំងព្រះរាជា»។ ​តំណាង​រាស្ត្រ​រូបនេះ បានសរសេរថា៖ «ព្រះរាជា ប្រាប់ទៅប្រជានុរាស្ត្រ​របស់ព្រះអង្គ កុំភ័យ​ខ្លាច នាំគ្នា​ទៅ​បោះ​ឆ្នោត ឲ្យ​បាន​គ្រប់​គ្នា។ ឯអ្នក​បំភ័យ​រាស្ត្រថា បោះឆ្នោតចាញ់​មានសង្គ្រាម បានន័យ​ថាប្រឆាំង​នឹងព្រះរាជា !»


«សេរីភាពសង្គម...»

សម្រាប់លោក​ ចាន់ វិបុល អ្នក​ជំនាញ​ខាង​អភិបាលកិច្ច និង​វិទ្យាសាស្ត្រ​នយោបាយ បានថ្លែងចាត់​ទុក​​ការលើក​ឡើង របស់​លោក ហ៊ុន សែន ជាគម្រាមកំហែង ទៅដល់សេរីភាពសង្គម និងបង្កការរំខាន ដល់ការ​សម្រេច​ចិត្ត របស់​ពលរដ្ឋ។ អ្នក​វិភាគ​​បញ្ហា​សង្គម​រូប​នេះ បានថ្លែងប្រាប់​វិទ្យុ​អាស៊ីសេរី នៅថ្ងៃនេះ​ថា៖ «ខ្ញុំយល់​ឃើញ​ថា នេះ​គឺ​ជា​សារ​គម្រាម​​កំហែង ទៅដល់​សេរី​ភាព​សង្គម ទៅដល់​ចិរភាព​សង្គម ទៅដល់ដំណើរការ​នៃការបោះឆ្នោត ហើយ​ទៅ​ដល់​​ការ​សម្រេច​​ចិត្ត របស់​ប្រជា​ពលរដ្ឋ។ ចំណុច​ទីពីរ​ទៀត ខ្ញុំយល់​ឃើញ​ថា យើង​នៅ​តែ​មើល​​មិន​ឃើញ ពី​សញ្ញាណ​​នៃ​ការ​​បង្កើត​​សង្គ្រាម​ [ពីភាគី​ណា​] ទេ។»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...