ហ៊ុន សែន ការពារ ឡុង ឌីម៉ង់ រឿង​កាត់​ក្បាល​ទាហាន​មួក​ខៀវ​ខ្មែរ

នាយករដ្ឋមន្ត្រីកម្ពុជា បានចេញមុខ​មកការពារ​ឯកអគ្គរាជទូតខ្មែរ ប្រចាំនៅប្រទេស​កូរ៉េ​ខាង​ត្បូង លោក ឡុង ឌីម៉ង់ នៅព្រឹក​ថ្ងៃទី១០ ខែឧសភានេះ ទាក់ទងនឹងការ​បង្ហោះ​ព័​ត៌មានមួយ នៅលើ​បណ្ដាញ​​សង្គម ដែល​អះអាង​​ថា ទាហានមួក​ខៀវ​កម្ពុជា ដែលបានបាត់បង់​ជីវិត នៅក្នុងប្រទេស​អាហ្វ្រិក​​កណ្ដាល ត្រូវ​បាន​​ក្រុម​ឧទ្ទាម​​កាត់​ក្បាល។
ហ៊ុន សែន ការពារ ឡុង ឌីម៉ង់ រឿង​កាត់​ក្បាល​ទាហាន​មួក​ខៀវ​ខ្មែរ
ពីឆ្វេងទៅស្ដាំ៖ លោក ហ៊ុន សែន នាយករដ្ឋមន្ត្រីកម្ពុជា និងលោក ឡុង ឌីម៉ង់ ឯកអគ្គរាជទូតកម្ពុជា ប្រចាំនៅកូរ៉េខាងត្បូង។ (រូបថតលើហ្វេសប៊ុក)
Loading...
  • ដោយ: ដារី ([email protected]) - ភ្នំពេញ ថ្ងៃទី១០ ឧសភា ២០១៧
  • កែប្រែចុងក្រោយ: May 10, 2017
  • ប្រធានបទ: នយោបាយខ្មែរ
  • អត្ថបទ: មានបញ្ហា?
  • មតិ-យោបល់

ផ្ទុយពីការអះអាងជាច្រើន ដែលគេជឿថា គណនេយ្យហ្វេសប៊ុក ដាក់ឈ្មោះ «Long Dimanche» ជា​គណនេយ្យ​របស់​លោក ឡុង ឌីម៉ង់ ឯកអគ្គរាជទូតកម្ពុជា ប្រចាំនៅប្រទេសកូរ៉េខាងត្បូងនោះ លោក ហ៊ុន សែន នាយក​រដ្ឋ​មន្ត្រី​កម្ពុជា បានច្រានចោលថា គណនេយ្យនោះ មិនមែនជារបស់លោក ឡុង ឌីម៉ង់ ទេ បន្ទាប់ពីគណនេយ្យ​មួយ​នេះ បាន​បង្ហោះ​ព័ត៌មាន​មួយកាលពីម្សិលម៉ិញ បង្កការភ្ញាក់ផ្អើលពេញប្រព័ន្ធផ្សព្វផ្សាយ នៅកម្ពុជា។

ភ្ជាប់​ជាមួយ​​នឹង​រូបភាព​​មួយ​ចំនួន គណនេយ្យខាងលើ បានសរសេរថា៖ «​សូម​ជម្រាប​ដំណឹង​រន្ធត់ ​និង​សោក​សៅ​​ស្តាយ​ស្រណោះ ​ចំពោះ​យោធិន​កម្ពុជា​មួយ​រូប​ ដែល​បាន​បាត់បង់​ជីវិត​ នៅ​អាហ្វ្រិក​កណ្តាល ពេល​​បំពេញ​បេសកកម្ម​ ក្នុង​​ក្រប​ខណ្ឌ​​ថែរក្សា​​សន្តិភាព ​របស់​អង្គការសហប្រជាជាតិ ដោយពួកឩ​ទ្ទា​ម​បាន​កាត់​​ក្បាល​គាត់​»។​

ព័ត៌មាន ដែលមិនបាន​បញ្ជាក់​ប្រភព​មួយនេះ ត្រូវបានប្រព័ន្ធផ្សព្វផ្សាយនៅកម្ពុជា (រូមទាំង​សារព័ត៌មាន ដែល​ស្និត​នឹង​រដ្ឋាភិបាល) និងក្រុមអ្នកប្រើប្រាស់​បណ្ដាញសង្គម ដកស្រង់​យក​ទៅ​ផ្សាយ​បន្ត ដោយគ្រាន់តែ​គេជឿ​ថា គណនេយ្យ​មួយ​នោះ ជា​របស់​លោក ឡុង ឌីម៉ង់ មន្ត្រីជាន់​ខ្ពស់ម្នាក់ ដែលត្រូវបាន​លោក ហ៊ុន សែន ស្នើ​ព្រះ​មហាក្សត្រ​ឲ្យ​តែង​តាំង ធ្វើជា​ឯកអគ្គរាជទូត ប្រចាំនៅប្រទេស​កូរ៉េខាងត្បូង កាលពីអំឡុង​ខែមេសា ឆ្នាំ​ទៅ​ម៉ិញ។

តែនៅព្រឹកថ្ងៃទី១០ ខែឧសភានេះ ក្នុងពិធីអបអរសាទរខួប១០ឆ្នាំ នៃទិវាអតីតយុទ្ធជនកម្ពុជា ដែល​ធ្វើ​ឡើង​ នៅ​មជ្ឈ​មណ្ឌល​សន្និបាត និង​ពិព័រណ៍​កោះ​ពេជ្រ លោក ហ៊ុន សែន បាន​ប្រកាស​ការពារ​លោក ឡុង ឌីម៉ង់ ឯក​អគ្គ​រាជ​ទូត​កម្ពុជា ថា​មិនមែន​ជា​លោក ឡុង ឌីម៉ង់ ម្ចាស់​គណនេយ្យ​ហ្វេសប៊ុក​​នោះ​ទេ។

លោកនាយករដ្ឋមន្ត្រីកម្ពុជា បានថ្លែង​ឡើង​ថា៖ «ខ្ញុំសុំស្នើឲ្យយក​ហ្វេសប៊ុក របស់ឈ្មោះ ឡុង ឌីម៉ង់ ដោយ​សុំ​ឲ្យ​អ្នក ធ្វើការកែប្រែ​ជាបន្ទាន់ នៅក្នុងការបង្ហោះ​ហ្វេសប៊ុកបែបនេះ។ នេះ ជាការបង្ហោះ ដែលបាន​បំផ្លិចបំផ្លាញ ទៅ​ដល់​កិត្តិយស​របស់​កងទ័ព ដែលឈាន​ទៅដល់ថា កាត់កក។ សុំ​លោក ឡុង ឌីម៉ង់ ដែល​មិនមែន​ជា ឡុង ឌីម៉ង់ ឯក​អគ្គរាជ​ទូត នៅកូរ៉េ​ខាង​ត្បូងទេ ក៏ប៉ុន្តែ ខ្ញុំបញ្ជា​ឲ្យក្រសួង​មហាផ្ទៃ ធ្វើកិច្ចការងារនេះ​ជាបន្តាន់ ប្រសិន​ជា​គេ​មិន​ប្ដូរ និង​ដក​រូបភាព នៃការកាត់ក​នេះ​ចេញ វាមានតម្លៃ​ស្មើនឹង​ការប្រកាស​សង្គ្រាម ជាមួយ​កងទ័ព​កម្ពុជា​ទាំង​មូល។»។

បន្ទាប់ពីបានការពារលោក ឡុង ឌីម៉ង់ នេះរួច នាយករដ្ឋមន្ត្រីបីទសវត្សន៍ជាង របស់កម្ពុជា នៅ​បាន​យក​ឱកាស​នេះ ដើម្បី​ថ្លែង​ព្រមាន​ទៅ​ដល់​បណ្ដា​អ្នក​ប្រើប្រាស់​បណ្ដាញ​សង្គម ដែលមាននិន្នាការ​​ប្រឆាំង​​នោះ​ផង​ទៀត។ លោក ហ៊ុន សែន បានបន្ត​ថ្លែង​ថា៖ «ប៉ុន្តែអ្នកបង្ហោះ​ហ្វេសប៊ុក ដោយរូបភាព​កាត់ត​បែបនេះ គឺត្រូវ​ទទួល​ខុស​ត្រូវ។ ប្រសិន​បើជាការ​ដកចេញ នូវរូបភាពនេះ យើង​អាច​យោគយល់​បាន ប៉ុន្តែបើសិន​ជាអ្នក មិន​ដក​រូបភាព​នេះ​ចេញ​ទេ យើងនឹង​ស្វះស្វែង​រក​មនុស្ស​នេះ ដើម្បីផ្ដន្ទាទោស។ ហើយបើសិន​ជាអ្នក ជា​សមាជិក​បក្ស​នយោបាយ​ផ្សេង ដែល​មាន​ចេតនា បក្សនោះ​ក៏នឹងក្លាយ​ជា​សត្រូវ នៃកងកម្លាំង​ប្រដាប់​អាវុធ​ផង​ដែរ។ (...) ​បើ​ទោះ​អ្នក​នៅ​ក្រៅ​ប្រទេស អ្នកក៏​គង់​មាន​គ្រួសារ នៅក្នុង​ប្រទេស អ្នកកំភ្លេច​ឲ្យសោះ។»។

តាមច្បាប់កម្ពុជា ការផ្សាយព័ត៌មានមិនពិត នឹងត្រូវមានទោស។ យ៉ាងណាក៏ដោយ នៅក្រោយ​ការបង្ហោះ នៅ​ប្រមាណ​ជា​ប៉ុន្មាន​ម៉ោង​ក្រោយ​មក គណនេយ្យហ្វេសប៊ុក «Long Dimanche» បាន​លុប​រូបភាព និង​ព័ត៌មាន​នោះ​ចេញ​ទៅ​វិញ ហើយគេមិនអាចចូល​ទៅមើល​ឡើងវិញ​បានទេ។

ក្បួនរថយន្ដ​របស់កងកម្លាំង​វិស្វកម្ម​មួកខៀវ របស់កម្ពុជា ដែល​មាន​​អមការពារ ដោយកងកម្លាំង​មួកខៀវ មក​ពី​ប្រទេស​ម៉ារ៉ុក ត្រូវបាន​ក្រុមឧទ្ទាម «anti-Balaka» ពួនស្ទាក់​វាយប្រហារ កាល​ពីយប់​ថ្ងៃចន្ទ វេលាម៉ោង​ជាង២០ (ម៉ោងក្នុងស្រុក ត្រូវជាម៉ោង១រលងអាធ្រាត នៅស្រុកខ្មែរ) នៅក្នុងភាគខាងត្បូង នៃប្រទេស​អាហ្វ្រិក​កណ្ដាល ​បណ្ដាល​ឲ្យ​យុទ្ធជន​កម្ពុជា​បួនរូប ស្លាប់បាត់​បង់ជីវិត និងទាហានផ្សេងទៀត​រងរបួស។

» អត្ថបទលំអិតដែលទាក់ទង ៖ ទាហាន​មួក​ខៀវ​៤នាក់ (មាន​​ខ្មែរ) នៅ​អាហ្វ្រិក​កណ្ដាល​ត្រូវ​បាន​សម្លាប់

សេចក្តីប្រកាសព័ត៌មាន នៅព្រឹកថ្ងៃទី១០ ខែឧសភានេះ របស់ក្រសួង​ការពារជាតិកម្ពុជា បានអះអាង​ពីព័ត៌មានខាងលើ និង​បានបញ្ជាក់​ពីអត្តសញ្ញាណ របស់យុទ្ធជន​ទាំងបួនរូប ដូចតទៅ៖ លោក​អនុសេនីយឯក ​គឹម សំ អ្នក​បើក​បរ​ប៊ិលដូស័រ - លោកអនុសេនីយ៍​ត្រី ស៊ាន នរិន្ទ (ព្រិន្ទបាលទោ) ជំនួយការត្រួតពិនិត្យ​គុណភាព - លោក​ពល​បាល​ឯក មុំ តុលា (ព្រិន្ទបាលទោ) ជំនួយការ​បើកបរអ៊ិស្ការវ៉ាទ័រ និង​លោក​អនុសេនីយ៍​ត្រី ម៉ៅ អេង (អនុ​សេនីយ៍​ឯក) បុគ្គលិក​ពេទ្យ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...