«បេសកកម្មអង្គការសហប្រជាជាតិ ដើម្បីសន្តិភាពនៅប្រទេសអាហ្វ្រិកកណ្ដាល (ហៅកាត់ថា «Minusca») មាន​ទុក្ខ​យ៉ាងក្រៀមក្រំ ដោយសូមអះអាងថា ទាហាន៣នាក់ ពីក្នុងចំណោមទាហានបាត់ខ្លួនបួននាក់ ក្នុង​ការ​វាយ​ប្រហារ កាលពី​យប់​ថ្ងៃទី៨ ខែឧសភា ឆ្នាំ២០១៧ បានស្លាប់។ ទាហានម្នាក់ទៀត នៅតែ​បាត់​ដំណឹង​សូន្យ​ឈឹង​នៅ​ឡើយ។» នេះ បើតាម​ការ​អះអាង​របស់​សេចក្ដីប្រកាសព័ត៌មានមួយ របស់ «Minusca» នៅ​រសៀល​ថ្ងៃ​ទី៩ ខែ​ឧសភា ច្រើន​ម៉ោង​ក្រោយ​ការវាយប្រហារ។

ក្បួនរថយន្ដ របស់​កងកម្លាំងវិស្វកម្ម មកពីប្រទេសកម្ពុជា អមដោយ​កងកម្លាំងការពារ ប្រដាប់​ដោយ​អាវុធ មក​ពី​ប្រទេស​ម៉ារ៉ុក​ច្រើន​នាក់​ បាន​វិល​​ត្រឡប់​​ពី ក្រុង «Rafaï» ទៅកាន់ក្រុង «Bangassou» ដែល​សុទ្ធសឹង​ជា​ក្រុង​ ស្ថិត​នៅ​ភាគ​ខាង​ត្បូង តាមបណ្ដោយព្រំដែន ជាមួយប្រទេស​កុងហ្គោ។ នៅវេលាម៉ោង​ជាង ២០ ពេល​ទៅ​ដល់​ភូមិ​មួយ ឈ្មោះ «Yogofongo» ប្រមាណ​ជា២០គីឡូម៉ែត្រ ពីក្រុង «Bangassou» ក្បួន​រថយន្ដ​​កង​កម្លាំង​មួក​ខៀវ​​ទាំង​នេះ បាន​ធ្លាក់ក្នុងអន្ទាក់​វាយឆ្មក់​ដ៏​សាហាវ​មួយ ពីសំណាក់ក្រុមឧទ្ទាម «anti-Balaka»។

ការផ្ទុះអាវុធបានកើតឡើង រវាងកងកម្លាំងទាំងសងខាង។ ហើយភ្លាមៗ ទាហានកម្ពុជាម្នាក់បានស្លាប់ ដោយ​សារ​គ្រាប់​កាំភ្លើង នៅនឹង​កន្លែង និងបួននាក់​បាន​បាត់ខ្លួន រួមនឹងទាហាន​របួស ៨នាក់ផ្សេង​ទៀត។ នេះ បើ​តាម​ការ​អះអាង​របស់​សេចក្ដី​ប្រកាស​ព័ត៌មាន​ដដែល​នោះ (ដែលផ្ទុយ​ពីព័ត៌មាន​មួយចំនួន ដែលនិយាយថា ទាហាន​កម្ពុជា​រងគ្រោះ បានស្លាប់​ដោយ​ការ​កាត់​ក្បាល) ដោយបញ្ជាក់បន្ថែមថា ភាគីក្រុម​ឧទ្ទាម បានរង​ការ​ខូចខាត​​ខ្លាំង​ជាង (ទាហាន​ឧទ្ទាម​៨នាក់ បានស្លាប់ និងរងរបួសច្រើននាក់ទៀត)។

លោក ហ៊ុន សែន នាយក​រដ្ឋមន្ត្រីកម្ពុជា ក៏បានប្រកាសដែរ កាលពីម្សិលម៉ិញ នៅក្នុង​ពិធីមួយ​ក្នុង​ខេត្ត​​ត្បូងឃ្មុំ ថា កងទ័ព​​មួក​​ខៀវ​កម្ពុជា​ម្នាក់​បាន​ស្លាប់ ​និង៣នាក់ផ្សេងទៀត​ បានបាត់ខ្លួន ក្រោយ​​រងការ​វាយ​​ប្រហារ​​ពី​ក្រុម​ឧទ្ទាម ​ក្នុងពេល​​កំពុង​​បំពេញ​​បេសកកម្ម​ នៅ​ប្រទេស​អាហ្វ្រិក​កណ្ដាល។ បើតាមលោកនាយរដ្ឋមន្ត្រី ទាហ៊ាន​ខ្មែរដែលត្រូវបានសម្លាប់នោះ​ឈ្មោះ អ៊ឹម សំ ជាពលបាលឯក មានស្រុកកំណើត​នៅខេត្តសៀមរាប។

ប្រភពមួយ ដែលធ្វើការក្នុងបេសកកម្ម​អង្គការ​សហប្រជាជាតិ បានប្រាប់វិទ្យុបារាំងអន្តរជាតិ «RFI» ប្រចាំ​ទ្វីប​អាហ្វ្រិក ឲ្យដឹង​ថា នៅ​ក្រោយ​ការ​វាយប្រហារ ទាហានមួកខៀវ​៤នាក់បានបាត់ខ្លួន ក្នុងនោះ៣នាក់​ជាទាហាន​កម្ពុជា ម្នាក់​​ជា​ទាហាន​​ម៉ារ៉ុក។ ប៉ុន្តែរហូត​មកដល់​រសៀលថ្ងៃទី៩ ខែឧសភា គេបានរកឃើញ​ទាហាន៣នាក់ ពី​ក្នុង​ចំណោម​ទាហាន៤​នាក់នោះ បាន​ស្លាប់ ខណៈម្នាក់​ទៀត នៅបាត់ខ្លួននៅឡើយ។ ទាហាន​បីនាក់ ដែល​ទើបនឹងរក​ឃើញ​ស្លាប់​នេះ ទំនងជាទាហាន​វិស្វកម្ម​កម្ពុជា​​ទាំងអស់។

អ្នកនាំពាក្យ «Minusca» លោក «Hervé Verhoosel» បានថ្លែងប្រាប់​ទីភ្នាក់ងារព័ត៌មានបារាំង «AFP» ថា៖ «នេះ​ ជា​ការ​វាយប្រហារ​ដ៏ខ្លាំងក្លា ជាងពេលណាទាំងអស់ ប្រឆាំងនឹង​កងកម្លាំង​រក្សាសន្តិភាព របស់ "Minusca"»។

គេនៅមិនទាន់ដឹងទេថា តើការវាយប្រហារនៅយប់ថ្ងៃចន្ទ ត្រូវបានធ្វើឡើង ក្រោមមូលហេតុអ្វី​នៅឡើយ។

តាំងពីច្រើនខែមកហើយ អំពើហិង្សាជាច្រើន ក្នុងនោះមានការប្រឈមមុខ ដោយអាវុធ បាន​កើត​ឡើង​យ៉ាង​ខ្លាំង​ក្លា នៅតំបន់​ភាគខាងត្បូង នៃប្រទេស​អាហ្វ្រិកកណ្ដាល បង្កឡើង​ដោយកងកម្លាំង​ឧទ្ទាម ជាច្រើនក្រុម​ ច្រើន​បក្ខពួក (មានដូចជា ក្រុម "UPC" ក្រុម "anti-Balaka" និងក្រុមសេនាជន​ប្រចាំភូមិ​ជាដើម)។ នៅក្នុង​ចំណោម​ការ​ប្រឈម​មុខ ដែលប្រដាប់ដោយអាវុធទាំងនោះ ជារឿយៗ កងកម្លាំងមួកខៀវ​របស់​អង្គការ​សហ​ប្រជា​ជាតិ ត្រូវបានយក​ជាទិសដៅ​កំទេច ដោយ​ហេតុថា ក្រុមឧទ្ទាមមួយ បានចោទ​កងកម្លាំង​មួកខៀវ ថា​បាន​លំអៀង ទៅ​ក្រុម​មួយ​ទៀត។ ពេលខ្លះ ក្បួនរថយន្ដរបស់​កងកម្លាំង​មួកខៀវ បានរង​ការវាយប្រហារ ពី​ក្រុម​សេនាជន​ប្រចាំ​ភូមិ ក្នុងគោលបំណង ដើម្បីគ្រាន់តែ​ប្លន់​យក​អាវុធ និងគ្រាប់កាំភ្លើង​ប៉ុណ្ណោះ។

ដោយឡែក ក្រុមឧទ្ទាម «anti-Balaka» មិនមែនជាក្រុមអ៊ីស្លាមនិយមជ្រុល ឬជាសាខា​ណា​មួយ របស់​ក្រុម​រដ្ឋអ៊ីស្លាម​ទេ (ផ្ទុយពីការផ្សាយ របស់សារព័ត៌មាន​មួយចំនួន)។ ក្រុម «anti-Balaka» នៅខណៈនេះ មានលក្ខណៈ​ជា​កងសេនាជន នៅ​តាម​តំបន់ស្រែចំការ ដែលត្រូវបាន​បង្កើត​ឡើង ដោយ​អ្នកស្រុក​នៅទីនោះ ដើម្បីស្វ័យការពារ​តំបន់​​របស់​​ពួក​គេ ​និង​មាន​តែ​នៅ​ក្នុង​ប្រទេស​អាហ្វ្រិក​កណ្ដាលប៉ុណ្ណោះ៕