«យើងទាមទារទៅរាល់សមាជិក របស់រដ្ឋាភិបាលកម្ពុជា នគរបាល និងរាល់បណ្ដាស្ថាប័នពាក់ព័ន្ធ ឲ្យធ្វើការលុបចោលជាបន្ទាន់ នូវព័ត៌មានស្ដីពីអត្តសញ្ញាណ របស់អ្នកសារព័ត៌មាន ចេញពីប្រព័ន្ធអ៊ិនធើណែត»។ នេះ បើតាមសេចក្ដីថ្លែងការណ៍មួយ របស់ក្លិបអ្នកកាសែតបរទេស នៅកម្ពុជា ដែលហៅជាភាសា​អង់គ្លេស «The Overseas Press Club of Cambodia» ចេញផ្សាយនៅមុននេះបន្តិច។

កាលពីរសៀលម្សិលម៉ិញ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានបង្ហោះ​នៅលើ​គណនេយ្យ​ហ្វេសប៊ុក​របស់​លោក នូវរូបថតពីរ-បីសន្លឹក ក្នុងនោះមានពីរសន្លឹក ថតពីពាក្យបណ្ដឹងមួយច្បាប់ និងមួយសន្លឹកទៀត ថតពីលិខិតឆ្លងដែន របស់អ្នកសារព័ត៌មាន ជាតិកាណាដាមួយរូប មកពីសារព័ត៌មាន ខេមបូឌាដេលី។

លោករដ្ឋមន្ត្រី បានសរសេរ អមទៅនឹងរូបថត បង្ហោះ​ជាសាធារណៈ​ទាំង​នេះថា អ្នកកាសែត​ទាំងអស់ ត្រូវ«រៀន​ពីច្បាប់បោះឆ្នោត» និងពី​«ក្រមសីលធម៌» ក្នុងពេលបោះឆ្នោត ឲ្យបានខ្ជាប់ខ្ជួន ដើម្បីចៀសវាង ពីការចោទប្រកាន់នានា។

រីឯពាក្យបណ្ដឹងនោះ ត្រូវបានលោក រម៉ាម យួត មេឃុំមួយរូប មកពីគណបក្ស សម រង្ស៊ី រួមជាមួយអ្នកស្រុក ពីរនាក់ទៀត នៅក្នុងឃុំប៉ាតេ ក្នុងស្រុកអូយ៉ាដាវ ខេត្តរតនគិរី ប្ដឹងឡើង​ទៅអភិបាលស្រុក ប្រឆាំង​នឹងអ្នកសារព័ត៌មាន​ពីររូប របស់​សារព័ត៌មាន​ខាងលើ គឺលោក «Zsombor Peter» ជាតិកាណាដា និងលោក អូន ភាព (អ្នកបកប្រែភាសា) ដោយចោទ​អ្នកសារព័ត៌មាន ថាបានចូលទៅក្នុងភូមិ «ក្នុងគោលបំណងមិនល្អ» បន្ទាប់ពីពួកគេ បានសាកសួរពលរដ្ឋ នៅក្នុងឃុំពីរឿងរ៉ាវ នៃការបោះឆ្នោត។

» អានអត្ថបទដែលទាក់ទង៖ ខៀវ កាញារីទ្ធ ប្រាប់​ឲ្យ​អ្នក​កាសែត​រៀន​ពី​ច្បាប់​បោះឆ្នោត

ការផ្សព្វផ្សាយអត្តសញ្ញាណ របស់អ្នកសារព័ត៌មានជាតិកាណាដា ពីសំណាក់លោក ខៀវ កាញារីទ្ធ ត្រូវបានប្រិយមិត្តរបស់លោក ប្រមាណជិត៥០នាក់ យកទៅចែករំលែក នៅលើបណ្ដាញសង្គម និងត្រូវបានសារព័ត៌មានខ្លះ យកទៅចុះផ្សាយបន្តថែមទៀត។ ក្នុងចំណោមប្រិយមិត្តទាំងនោះ គេសង្កេតឃើញមានលោក ផៃ ស៊ីផាន មន្ត្រីអ្នកនាំពាក្យទីស្ដីការគណៈរដ្ឋមន្ត្រីមួយរូបផង។

លោករដ្ឋមន្ត្រីក្រសួងព័ត៌មាន បានពន្យល់ពីទង្វើរបស់លោក​ ប្រាប់រយៈសារព័ត៌មាន ខេមបូឌាដេលី ក្នុងថ្ងៃនេះថា ការបង្ហោះនោះ គ្រាន់តែ «បង្ហាញថាករណីវាអញ្ចឹង»។

ក្លិបអ្នកកាសែតបរទេស បានហៅការបង្ហោះអត្តសញ្ញាណ របស់អ្នកសារព័ត៌មានខាងលើ ថាជា«ការបំភិតបំភ័យ» បានបង្កគ្រោះថ្នាក់ និងជាការបង្ខូចកេរ្តិ៍ឈ្មោះ ទៅលើរូបលោក «Zsombor Peter» ដោយផ្ទាល់។ ស្ថាប័នក្រៅរដ្ឋាភិបាលមួយនេះ ទាមទារឲ្យធ្វើការលុបចោលជាបន្ទាន់ នូវទិន្នន័យទាំងឡាយ ដែលមានអត្តសញ្ញាណ របស់អ្នកសារព័ត៌មានខាងលើ ចេញពីប្រព័ន្ធអ៊ិនធើណែត៕