ការសប្បាយជ្រុល រហូតដល់ចាញ់បោកជនជួញដូរគ្រឿងញៀន និងធ្លាក់ខ្លួនញៀនថ្នាំ មិនត្រឹមតែធ្វើឲ្យខូចខ្លួន របស់អ្នកញៀនថ្នាំនោះប៉ុណ្ណោះទេ តែថែមទាំងរំខាន ទៅដល់រដ្ឋាភិបាលនោះថែមទៀត។ នេះ បើតាមការលើកឡើង របស់លោក ហ៊ុន សែន នាយករដ្ឋមន្ត្រីកម្ពុជា នៅក្នុងការថ្លែងមួយក្នុងទិវាកាកបាទក្រហម អឌ្ឍចន្ទក្រហម ខួបទី១៥៤ នាព្រឹកថ្ងៃទី៨ ខែឧសភានេះ។

នៅចំពោះមន្ត្រីរាជការ និងពលរដ្ឋច្រើនសិបនាក់ លោក ហ៊ុន សែន បានថ្លែងឡើងថា៖ «ខ្ញុំសូមយកឱកាសនេះ ដើម្បីអំពាវនាវចំពោះយុវជនយុវនារី និងមាតាបីតា (...) សុំគេសវេស និងជៀសវាងចំពោះបញ្ហាគ្រឿងញៀន។ គ្រឿងញៀន បានធ្វើឲ្យយើងពិបាក ដោយសារតែយុវជន ដែលប្រើប្រាស់គ្រឿងញៀនទាំងនោះ គេក៏បានខូចខ្លួនប្រាណសម្រាប់គេ។ ប៉ុន្តែមួយផ្នែកទៀត រាជរដ្ឋាភិបាលក៏ត្រូវវិភាជ (បែងចែក) ថវិកាមួយចំនួន ដែលសម្រាប់ធ្លាប់យកទៅប្រើប្រាស់ នៅក្នុងគោលដៅនៃការអភិវឌ្ឍន៍ និងទិសដៅដទៃទៀត យកមកព្យាបាលគ្រឿងញៀន។ នេះ មិនគ្រាន់តែជាការរំខាន ទៅក្នុងគ្រួសារទេ តែវាបានរំខាន ទៅដល់ប្រទេសជាតិទាំងមូល។»។

នាយករដ្ឋមន្ត្រីកម្ពុជា ដែលទើបនឹងត្រឡប់ មកពីការព្យាបាលជម្ងឺ នៅក្នុងមន្ទីរពេទ្យដ៏ទំនើបមួយ នៃប្រទេសសិង្ហបូរី បានអះអាងបន្តថា៖ «នេះ មិនមែនជាជំងឺអត់ឃ្លានទេ តែជាជំងឺដែលសប្បាយជ្រុល របស់យុវជន ដែលត្រូវចាញ់បោកគេ ជាពិសេសចាញ់បោក ចំពោះក្រុមលក់គ្រឿងញៀន»។

លោក ហ៊ុន សែន បានថ្លែងទៅកាន់ឪពុកម្ដាយ របស់យុវជនយុវនារី ដែលញៀនថ្នាំទាំងនោះ ថាកុំបន្ទោសការគ្រប់គ្រង របស់រដ្ឋាភិបាល និងគួរបន្ទោសខ្លួនឯងទៅវិញ។ លោកបានថ្លែងឡើងថា៖ «យើងគ្រប់គ្រង់កូនខ្លួនឯង តែបីនាក់មិនទាំងបានផង (...) ហើយមកស្ដីបន្ទោសឲ្យរដ្ឋាភិបាល ដែលគ្រប់គ្រង់ប្រជាពលរដ្ឋ រហូតទៅដល់១៥លាននាក់ វាមិនមែនជាការសមរម្យនោះទេ។ គួរស្ដីបន្ទោសខ្លួនឯង ដែលខ្វះការទទួលខុសត្រូវ ក្នុងការអប់រំកូនចៅ។»។

នៅក្នុងការថ្លែងរបស់លោក ហ៊ុន សែន លោកមិនបានបញ្ជាក់ផងទេ ថារដ្ឋាភិបាលរបស់លោក បានបង្ក្រាបការជួញដូរគ្រឿងញៀន ដល់កម្រិតណា ហើយថាតើគ្រឿងញៀនទាំងនោះ មានប្រភពចូលមកកម្ពុជា តាមច្រកណា ដោយរបៀបម៉េចនោះឡើយ។ យ៉ាងណា នៅក្នុងពេលកន្លងមក រដ្ឋាភិបាលរបស់លោក បានបង្ក្រាបករណីជួញដូរគ្រឿងញៀន បានជាច្រើនករណី ក្នុងនោះមានដោយ ទាំងកូនចៅមន្ត្រីធំៗ នៅក្នុងជួររដ្ឋាភិបាលនោះផង៕