លោក កែត ឆែ ដែលជាអភិបាលរងខេត្តពោធិ៍សាត់ និងលោក នួន ផារ័ត្ន ដែលជាមន្ត្រីផ្នែករដ្ឋបាល នៃទីស្ដីការគណៈរដ្ឋមន្ត្រី ត្រូវបានតែងតាំងឲ្យក្លាយជាអភិបាលរង នៃគណៈអភិបាលរាជធានីភ្នំពេញ ជំនួសតំណែងលោក ឃួង ស្រេង ដែលឡើងជាអភិបាល និងជំនួសលោក ត្រាក់ ថៃសៀង ដែលត្រូវបានផ្លាស់ ទៅកាន់ក្រសួងមហាផ្ទៃ។ នេះ បើតាមអនុក្រឹត្យ​មួយ ​ចុះហត្ថលេខា​ដោយលោក ហ៊ុន សែន នាយករដ្ឋមន្ត្រី- ប្រធានគណបក្សប្រជាជនកម្ពុជា ដែលទើបនឹងធ្លាក់ មកដល់ដៃអ្នកសារព័ត៌មាន នៅមុននេះ។

អនុក្រឹត្យ​ចុះថ្ងៃទី២២ ខែមិថុនា ដែលបានយោងតាមសំណើរ របស់រដ្ឋមន្ត្រីក្រសួងមហាផ្ទៃ បានសរសេរថា លោក ត្រាក់ ថៃសៀង ដែលជាមន្ត្រីថ្នាក់លេខ១ ត្រូវផ្ទេរពីតំណែង ជាអភិបាលរង ទៅបម្រើការ នៅទីស្ដីការក្រសួងមហាផ្ទៃ ខណៈលោក កែត ឆែ ដែលជាមន្ត្រីថ្នាក់លេខ៣ ត្រូវបានផ្ទេរពីតំណែង ជាអភិបាលរងខេត្តពោធិ៍សាត់ មកជាអភិបាលរងរាជធានីភ្នំពេញ។ ចំណែកឯលោក នួន ផារ័ត្ន ដែលជាមន្ត្រីថ្នាក់លេខ៤ ត្រូវបានផ្ទេរពីក្របខណ្ឌរដ្ឋបាល នៃទីស្តីការគណៈរដ្ឋមន្ត្រី ទៅជាអភិបាលរងរាជធានីភ្នំពេញ។

សូមបញ្ជាក់ដែរថា គណៈអភិបាលនៃរាជធានីភ្នំពេញ មានអភិបាលរងដល់ទៅ៦រូប ហើយអភិបាលរងដទៃទៀត មិនឃើញមានការផ្លាស់ប្ដូរទេ ដែលខុសប្លែកតែលោក ត្រាក់ ថៃសៀង ម្នាក់ បន្ទាប់ពីមន្ត្រីរូបនេះ បានកាន់តំណែង ជាអភិបាលរងរាជធានីភ្នំពេញ តាំងពី៨ឆ្នាំមកហើយ។

រីឯលោក នួន ផារ័ត្ន ត្រូវបានគេស្គាល់ថា ជាមន្ត្រីជិតដិត របស់លោក ហ៊ុន ម៉ានី កូនប្រុសលោក ហ៊ុន សែន។ លោក នួន ផារ័ត្ន តែងតែធ្វើជាតំណាងឲ្យលោក ហ៊ុន ម៉ានី ជាញយដង នៅក្នុងការចុះទៅមូលដ្ឋាន សម្រាប់ក្របខណ្ឌ សហភាពសហព័ន្ធយុវជនកម្ពុជា។

អាយុ៣៧ឆ្នាំ លោក នួន ផា​រ័ត្ន ​ជា​អនុប្រធាន​គណបក្ស​ប្រជាជន​កម្ពុជា ​នៅ​ខេត្តកំពង់ស្ពឺ និង​ជា​ប្រធាន​ក្រុមការងារ​យុវជន ​​ក្នុងខេត្ត​នេះដដែល​។ បញ្ចប់​​ជំនាញ​ថ្នាក់អនុបណ្ឌិត​ ផ្នែក​នីតិសាស្ត្រ និង​ផ្នែក​វិជ្ជាជីវៈ​តុលាការ ​ពី​ប្រទេស​បារាំង ​ក្នុង​ឆ្នាំ២០០៣ លោក ផា​រ័ត្ន បានធ្វើ​ការងារ​ជាច្រើន​ ទាក់ទង​នឹង​ការតាក់តែង​ច្បាប់​ មុននឹង​​ក្លាយជា​សមាជិក​ក្រុមប្រឹក្សា​អ្នកច្បាប់​ នៃ​ទីស្តីការគណៈរដ្ឋមន្ត្រី ដែលមាន​ឋានៈ ​ស្មើ​រដ្ឋលេខាធិការ ក្នុង​ឆ្នាំ២០០៧៕