ជនសង្ស័យជាចោរដៃឆៅម្នាក់ ត្រូវបានក្រុមសមត្ថកិច្ចខណ្ឌ៧មករា សហការជាមួយនឹង កងរាជអាវុធហត្ថរាធានីភ្នំពេញ ដេញចាប់បាន និងបន្ទាប់មកត្រូវបាន មនុស្សម្នាមហាជន វាយដំយ៉ាងចាស់ដៃ នៅម្តុំផ្សារអូឬស្សី កាលពីរសៀលថ្ងៃទី ២៧ ខែមេសា ឆ្នាំ២០១៥នេះ។ សមត្ថកិច្ចបាននិយាយថា ជនសង្ស័យបានប្លន់ម៉ូតូ Scoopy មួយគ្រឿង ពីយុវតីម្នាក់ កាលពី​វេលា​ម៉ោង៣រសៀល នៅកោះពេជ្រ។ ប៉ុន្តែដោយសារវត្តមាន របស់កម្លាំងនគរបាលនៅទីនោះ ដែលបានធ្វើ​ប្រតិកម្ម​ភ្លាមៗ ជនសង្ស័យបានព្យាយាមរត់គេចខ្លួន។ តែមិនបានសម្រេច ក៏ចាប់នារីរងគ្រោះ ធ្វើជាចំណាប់ខ្មាំង ដើម្បី​គម្រាម​សមត្ថកិច្ច​វិញ។

តែនៅទីបំផុត ជនសង្ស័យត្រូវបានចាប់ខ្លួន កាលពីវេលាម៉ោង ប្រមាណជា៤ និង៣០នាទីរសៀល ថ្ងៃទី២៧ ខែមេសា នៅ​ជិតអតីតរោងភាពយន្តអង្គរ ម្តុំផ្សារអូឬស្សី ស្ថិតក្នុងសង្កាត់អូឬស្សី ខណ្ឌ៧មករា រាជធានីភ្នំពេញ។ សមត្ថកិច្ចខណ្ឌនេះ បាន​ឲ្យដឹងថា ជនសង្ស័យមានឈ្មោះ សឿន សុធា អាយុ២៤ឆ្នាំ ជាបុគ្គលិកផ្នែកចុងភៅម្នាក់ នៅសណ្ឋាគារលំដាប់ផ្កាយ៥ សូហ្វីតែល ភូកេត្រា រាជធានីភ្នំពេញ។ ចំណែកឯនារីរងគ្រោះ ឈ្មោះ សុខ វ៉ាន់ធីតា ជាសិស្សថ្នាក់ទី១០ នៅវិទ្យាល័យ ហ៊ុនសែន​តាខ្មៅ។

សមត្ថកិច្ចខណ្ឌ៧មករា បានបានបញ្ជាក់ទៀតថា ដំបូងឡើយ ពេលមិនទាន់មកដល់ ដែនសមត្ថកិច្ចខណ្ឌ៧មករា ជន​ល្មើស​បានដកកាំភ្លើង បាញ់តបជាមួយប៉ូលីស តែជាអកុសល កាំភ្លើងនោះមិនផ្ទុះ ជនល្មើសនៅតែបន្តគេចខ្លួន រហូត​មក​ដល់ខណ្ឌ៧មករា ត្រង់ចំនុចជិតអតីត រោងភាពយន្តអង្គរ ទើបចាប់ឃាត់ខ្លូនបាន។ សមត្ថកិច្ចបានដកហូត វត្ថុតាង ពីជន​ល្មើសនៅពេលចាប់ខ្លូន បានកាំភ្លើងខ្លីម៉ាក រ៉ូលូ មួយដើម។ បច្ចុប្បន្ន ជនល្មើសត្រូវបាន មន្ត្រីសមត្ថកិច្ចបញ្ជូន ទៅឃុំ​ខ្លូន​ជា​បណ្តោះអាសន្ន នៅខណ្ឌ៧មករា ដើម្បីកសាងសំនុំរឿង បញ្ជូនទៅតុលាការ។ ចំណែកឯម៉ូតូនារីរងគ្រោះ ត្រូវបាន​ប្រគល់​ជូនម្ចាស់វិញ កាលពីល្ងាចថ្ងៃដដែលនោះ រួចរាល់ហើយ៕