ការចុះបង្ក្រាបនេះ បានធ្វើឡើងនៅវេលាម៉ោង ៨ព្រឹកថ្ងៃទី២៦ខែ ឧសភា ឆ្នាំ២០១៥ នៅត្រង់ចំណុចក្រោមស្ពានអាកាស​ច្បារអំពៅ ក្នុងភូមិ ព្រែកតានូ សង្កាត់ចាក់អង្រេលើ ខណ្ឌមានជ័យរាជធានីភ្នំពេញ ដែលឃាត់ខ្លូនបានបុរស់ម្នាក់ និង​វត្ថុ​តាង​មួយចំនួនទៀត នៅទីតាំងប្រព្រឹត្ត។ លោកអនុសេនីយ៍ឯក ម៉ៅ ស៊ីវន បានបញ្ជាក់ថា ក្រុមអ្នកចែកចាយ គ្រឿង​ញៀន​មួយនេះ មានគ្នាច្រើន តែសមត្ថកិច្ចមានដីការ ចាប់ខ្លូនតែម្នាក់ ដែលមានឈ្មោះ ជា សីហា អាយុ៣៣ ឆ្នាំ ពីបទចែកចាយ និងប្រើប្រាស់គ្រឿងញៀន ហើយការស៊ើបអង្កេតយូរថ្ងៃមកហើយ ទើបចាប់បាននៅទីតាំងនេះ។

តាមចម្លើយសារភាព របស់ជនជាប់ចោទ ជា សីហា និយាយជាមួយអ្នកសារព័ត៌មាន នៅក្នុងប៉ុស្តិ៍នគរបាលរដ្ឋបាល ចាក់​អង្រែលើថា ខ្លួនពិតជាបានចែកចាយ និងប្រើប្រាស់គ្រឿងញៀន ជាប្រភេទម៉ាទឹកកក ដែលប្រើអស់រយៈពេល ជិតពីរ​ឆ្នាំ​មកហើយ។ ជនជាប់ចោទ បានឲ្យដឹងទៀតថា ការចែកចាយទាំងនេះ គឺគេមិនដែលទៅទិញទេ គឺគ្រាន់តែទូរស័ព្ទ​ទៅ​ប្រាប់​នោះ គេយកមកឲ្យ។

ក្រុមនគរបាល បានស្រាវជ្រាវបន្ត ទៅលេខទូរស័ព្ទនេះ (០៩៨៥៥៥៥១៣) តែទាក់ទងលែងបាន។ បើតាមចម្លើយ របស់​ជនជាប់ចោទខាងលើ ម្ចាស់លេខទូរស័ព្ទនេះ និងជាអ្នក ដែលតែងយកថ្នាំ មកចែកចាយម្នាក់នោះ មានឈ្មោះ សឺង ជា​ជន​ជាតិវៀតណាម។

បន្ទាប់ពីសារភាព រឿងរ៉ាវទាំងអស់ ទៅកាន់ប៉ូលិស ជនប្រព្រឹត្តខាងលើបាន និយាយរៀបរាប់ ទាំងស្តាយក្រោយថា ពីមុន​ខ្លូនមានគ្រួសារមួយដ៏ល្អ ហើយមានកូនពីរនាក់ បន្ទាប់មក ខ្លួនក៏ចាប់ផ្តើមញៀនថ្នាំ ដោយការអូសទាញពីមិត្តភក្កិ រហូត​ដល់​លែងស្តាប់សម្តីប្រពន្ធ។ ប្រពន្ធលោក បានសម្រេចចិត្តលែលះ ជាមួយលោក ព្រោះលោកមិនអាចផ្តាច់ ថ្នាំញៀន​បាន។ ពេលនាងទៅបាត់ លោកក៏រឹតតែប្រព្រឹត្តលើសដើម រហូតដល់ថ្ងៃចាប់ខ្លូន។ ជា សីហា បាននិយាយទាំងទឹកភ្នែក ជា​មួយ​ដៃជាប់ខ្នោះថា៖ «ខ្ញុំស្តាយក្រោយណាស់ ដែលមិនជឿសម្តីភរិយា ឥឡូវទោះនឹកកូន ក៏មិនបានជួប»។

តាមរបាយការណ៍ របស់ប៉ូលិសប៉ុស្តិ៍ចាក់អង្រែលើ បានឲ្យដឹងថា ជនប្រព្រឹត្តខាងលើ រស់នៅភូមិទួលរកា សង្កាត់ចាក់​អង្រែក្រោម ខណ្ឌមានជ័យ រាជធានីភ្នំពេញ។ ការឃាត់ខ្លូននេះ ចាប់បានតែម៉ាទឹកកក ចំនួន៤កញ្ចប់ និងទូរស័ព្ទដៃ​ប៉ុណ្ណោះ នៅកន្លែងកើតហេតុ ប៉ុន្តែថ្នាំទាំងនោះ ត្រូវបានប៉ូលិសរកឃើញបន្ថែមទៀត នៅក្នុងបន្ទប់ជួល។ បច្ចុប្បន្នជន​ជាប់​ចោទ បានប្រាប់ប៉ូលិសថា អ្នកដែលផ្តល់ថ្នាំឲ្យខ្លូន បានគេចខ្លូនបាត់ស្រមោល និងផ្តាច់ទំនាក់ទំនងជាមួយគេ ដោយមេ​ខ្លោង​ទាំងនោះ ដឹងខ្លូនមុន៕