ជនរងគ្រោះដែលបានស្លាប់ ក្នុងហេតុការណ៍នេះ មានឈ្មោះ យួន ពេទ្យ អាយុ ១៩ ឆ្នាំ ធ្វើការនៅ ទីតាំងកើតហេតុ នៅ​តាម​បណ្តោយ ផ្លូវលេខ៣៧២ ផ្ទះលេខ ៤១២ ភូមិ ទី១០ ស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។ ជនរងគ្រោះ បានធ្លាក់ពីសំណង់ ផ្ទះល្វែងជាន់ទី៦ កាលពីវេលា ម៉ោង៩ព្រឹក ថ្ងៃទី២៨ ខែមេសា ឆ្នាំ២០១៥នេះ។ តាម​ការ​ធ្វើកោសល្យវិច័យ របស់នគរបាល បានឲ្យដឹងថា ជនរងគ្រោះបានស្លាប់ភ្លាមៗ នៅនឹងកន្លែងកើតហេតុ ដោយសារដាច់​ខ្សែរក្រវ៉ាត់ សុវត្តិភាព ពេលធ្លាក់មកដល់ដី និងមានដាច់សាច់ដុំដៃខាងស្តាំ និងជង់ជាប់ដែក ខាងក្រោម។

បន្ទាប់ពីមន្ត្រីជំនាញ បានធ្វើកោសល្យវិច័យរួច សាកសពត្រូវបានបញ្ជូន ទៅឲ្យក្រុមគ្រួសារ ដើម្បីយកទៅធ្វើបុណ្យ តាម​ប្រពៃណី នៅភូមិដូនកែវ ឃុំទ្រា ស្រុកសំរោង ខេត្តតាកែវ។

តាមការឲ្យដឹងរបស់លោក យូ ងួន ម្ចាស់ផ្ទះល្វែង ដែលកំពុងសាងសង់នេះ បានឲ្យដឹងថា លោកបានជួល ម៉ៅផ្ទះរបស់​លោកទាំងមូល ឲ្យទៅមេម៉ៅការមួយរូប ឈ្មោះ សុខ ពៅ ចំណែកឯជនរងគ្រោះ ជាកូនចៅរបស់អ្នកម៉ៅការខាងលើ មក​ពីខេត្តជាមួយគ្នា។ តែរឿងផ្សេងទៀត លោកមិនបានដឹងទេ។

យ៉ាងណាក៏ដោយ នៅក្នុងហេតុការណ៍នេះ មន្រ្តីនគរបាលមានសមត្ថកិច្ច បានឃាត់ខ្លួនលោកក សុខ ពៅ ដែលមេម៉ៅ​ការ​សំណង់ យកទៅធ្វើការសាកសួរ នៅប៉ុស្តិ៍នគរបាល បឹងសាឡាង ហើយសំនុំរឿង អាចនឹងត្រូវធ្វើការស្រាវជ្រាវ តាមដាន​ជាបន្ត។

បច្ចុប្បន្ន គ្រួសារជនរងគ្រោះ បានដឹកសព ទៅកាន់ខេត្តតាកែវហើយ ក្រោមការចំណាយ ថ្លៃឡានពេទ្យ ២០០ដុល្លា ពី​ម្ចាស់​ផ្ទះល្វែង ទៅឲ្យជនរងគ្រោះ ដោយសារគ្រួសារសពគ្មានលទ្ធភាពគ្រប់គ្រាន់។ បន្ថែមពីលើនេះ ម្ចាស់ផ្ទះបាន​ជួយ​ឧបត្ថម្ភ ក្នុងពីធីបុណ្យបុណ្យនេះ ១លានប្រាំសែនរៀលទៀត។

មិនអាចសុំការបំភ្លឺ ពីអធិការនគរបាលខណ្ឌទួលគោកបានទេ ចំពោះការចេញសំណងផ្លូវច្បាប់ នៃការស្លាប់ របស់កម្មករ​សំណង់ខាងលើ ពីក្រុមហ៊ុនអ្នកម៉ៅការសំណង់ ដោយលោកបានបដិសេធន៍ មិនឆ្លើយជាមួយអ្នកសារព័ត៌មាន៕