ប្រទេសកម្ពុជា នៅមាន«ហនិភ័យខ្ពស់»នៅឡើយ។ នេះ ជាការលើកឡើងរបស់លោក ហ៊ុន សែន នាយករដ្ឋមន្ត្រី - ប្រធានគណបក្សប្រជាជនកម្ពុជា ទាក់ទងនឹងការបង្ហោះព័ត៌មានក្លែងក្លាយមួយ នៅលើបណ្ដាញសង្គម ដែលអះអាងថា លោកបានទទួលមរណភាព ក្នុងហេតុការណ៍ធ្លាក់យន្ដហោះមួយ នៅពេលដែលលោក បានធ្វើដំណើរ ត្រឡប់មកពីប្រទេសវៀតណាមវិញ។

ព័ត៌មានក្លែងក្លាយនេះ ត្រូវបានបង្ហោះ និងចែករំលែក នៅលើបណ្ដាញសង្គម រាប់ចាប់តាំងពីថ្ងៃទី ២៤ ខែមិថុនានេះមក ដោយមាន​អម​មក​ជាមួយ នូវវីដេអូមួយ ដែលបង្ហាញឲ្យឃើញ ពីការធ្លាក់យន្ដហោះធុនតូចមួយគ្រឿង (មិនស្គាល់កន្លែង) និងរូបភាពរបស់វិទ្យុសម្លេងប្រជាធិបតេយ្យ (VOD) ស្ដីពីការសែងមឈូស របស់មន្ត្រីជាន់ខ្ពស់កម្ពុជាមួយរូប ដែលបានទទួលមរណភាព កាលពីពេលកន្លង​មក។

សារនៃព័ត៌មានក្លែងក្លាយ ដែលសរសេរពោរពេញ ដោយកំហុសអក្ខរាវិរុទ្ធនោះ មានសេចក្ដីដើមទាំងស្រុងថា៖ «សម្ដេច ហ៊ុន សែន ស្លាប់​ហេីយ​បងប្អូន កាលពីម្សិលមិញ នៅវេលាម៉ោង១១ និង៣០នាទី ព្រឹក ថ្ងៃទី២៤ ខែមិថុនា ឆ្នាំ២០១៧។ សម្ដេច ហ៊ុន សែន ធ្វេីដំណេីរទៅប្រទេស​វៀតណាម ធ្លាក់យន្ដហោះ ពេលនេះស្លាប់ហេីយ។ ចូលរួមសោកស្ដាយផង!»។

ប្រតិកម្មទៅនឹងព័ត៌មានខាងលើ លោក ហ៊ុន សែន បានថ្លែងក្នុងពិធីប្រគល់វិញ្ញាបនបត្រ ដល់សិស្សសាលាភូមិន្ទរដ្ឋបាល ក្នុងព្រឹកថ្ងៃទី​២៦ មិថុនា ២០១៧នេះ ព្រមានម្ចាស់គណនេយ្យ ដែលបង្ហោះព័ត៌មាន«បង្កចលាចល» ថាត្រូវ«រត់ឲ្យលឿន ក្រែងលោគេទៅទាន់»។ លោកនាយករដ្ឋមន្ត្រី បានងាក​ទៅខាងក្រោយខ្នងលោក ដែល​មាន​មន្ត្រី​ការទូត​បរទេស​អង្គុយនៅទីនោះ និងសួរឡើងថា៖ «អញ្ចឹងអស់លោកថា អាហ្នឹងសិទ្ធិបញ្ចេញមតិឬ? តើនៅប្រទេសអស់លោក អាហ្នឹង​ជាសិទ្ធិ​បញ្ចេញ​មតិឬ? អាហ្នឹង ត្រូវតាមរកវា! រួចទាំងនាំក្ដីក្ដាំ នៅឯតុលាការ។ មក​ពីអី?»។

ការបង្ហោះព័ត៌មានក្លែងក្លាយ នៅតាមបណ្ដាញសង្គម តែងកើតមានជាហូរហែរ  និងតែងត្រូវបានអ្នកប្រើប្រាស់បណ្ដាញសង្គម ចែក​រំលែក ដោយមិនស្វែងយល់ផងទេថា តើព័ត៌មាននោះពិតឬយ៉ាងណា។ ដូចក្នុងករណី នៃការបង្ហោះព្រះរាជក្រឹត្យ​ក្លែងក្លាយមួយ កាល​ពីដើមខែមិថុនានេះ ដើម្បីចោទប្រកាន់បេក្ខនារីចៅសង្កាត់ មកពីគណបក្សប្រឆាំង ដែលទើបជាប់ឆ្នោតថា ជាជនជាតិយួន ទើបបានសញ្ជាតិខ្មែរ។ ប៉ុន្តែផ្ទុយទៅវិញ លោក ហ៊ុន សែន មិនដែល (ឬកម្រប្រតិកម្ម) ទៅនឹងការបង្ហោះទាំងនោះឡើយ ដែលខុសគ្នាឆ្ងាយ ពីការបង្ហោះព័ត៌មានក្លែងក្លាយ ឬការជេរប្រមាថណា ដែលទាក់ទងនឹងរូបលោក ឬមន្ត្រីគ្រាក់ៗ របស់លោក៕