លោក សុខ ឈុនអឿន ប្រធានស្តីទី របស់សមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ បានផ្ដល់កិច្ច​សម្ភាសដាច់ដោយឡែកមួយ ជាមួយទស្សនាវដ្ដីមនោរម្យ.អាំងហ្វូ ទាក់ទងនឹង សាលដីការសម្រេចនានា របស់​ប្រព័ន្ធ​តុលាការកម្ពុជា កាត់ទោសទៅលើជនជាប់ឃុំទាំង២១នាក់ ទាំងពួកគេមិនទាន់មានទោស។ លោកនិយាយថា ការ​ប្រកាសសាលដីកាបន្តការឃុំខ្លួននេះ ពិតជារឿងដែលមានការពាក់ពាន់នឹងរឿងនយោបាយ ហើយបានដាក់​អ្នក​ទាំង​២១នាក់នោះ ជាចំណាប់ខ្មាំងនៃអ្នកនយោបាយ។

ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១០ ឧសភា ២០១៤
--------------------------

សេរីភាព - ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ នៅមុខតុលាការកំពូល ប្រធាន​ស្តីទី របស់សមាគម​ប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ ​លោក សុខ ឈុនអឿន បានលើកឡើងថា រាល់ការកាត់សេចក្តី​ទាំង​អស់របស់តុលាការគ្រប់ជាន់ថ្នាក់ ពិសេសករណីអ្នកទាំង២១នាក់នោះ ដោយផ្អែកតាមស្ថានការនយោបាយ​នៃ​ប្រទេសកម្ពុជាទៅវិញ ដែលបង្ហាញថា ពុំមានយុត្តិធម៌ឡើយ។

លោកបានរៀបរាប់ថា ក្នុងថ្ងៃទី២០ ខែឧសភា ខាងមុខនេះនឹងមានសវនាការអង្គសេចក្តីលើអ្នកទាំង២១នាក់នោះ នៅសាលាដំបូងរាជធានីភ្នំពេញ។ ហើយលោកមានជំនឿថា បើគ្មានគំនាបខាងនយោបាយ សាលារាជធានីភ្នំពេញ នឹងទម្លាក់ចោល ការចោទប្រកាន់អ្នកទាំង២១នាក់។ តែផ្ទុយមកវិញ មានតែអ្នកនយោបាយទេ ដែលភ្ជាប់ករណីនេះ​ទៅនឹងរឿងនយោបាយនោះ និងបានយកក្រុមជនទាំង២១នាក់ មកធ្វើជា«ឈ្នាន់»នៃនយោបាយទៀតផង។

សកម្មជនរបស់អង្គការសង្គមស៊ីវិល ដែលមានប្រធានរបស់ខ្លួនកំពុងជាប់ឃុំដែររូបនេះ បានធ្វើការពន្យល់ពាក់ព័ន្ធ​នឹងករណីនេះថា កន្លងមកមានមន្រ្តីមួយចំនួនក្នុងជួរដ្ឋាភិបាល បានបញ្ជាក់ប្រាប់ក្រុមការងារលោក ក៏ដូចជា​មានការ​ប្រកាសតាមសារព័ត៌មាន យ៉ាងដូច្នេះ៖ «ប្រសិនបើគណបក្សនយោបាយទាំងពីរនេះចចារត្រូវគ្នា អ្នកទាំង២១នាក់​នោះនឹងត្រូវបានដោះលែងឆាប់។(...) ឬបើគណបក្សសង្គ្រោះជាតិព្រមចូលសភា តុលាការនឹងសម្រេចដោះលែង​អ្នក​ទាំង២១នាក់។»

លោក សុខ​ ឈុនអឿន អនុប្រធាន និងបច្ចុប្បន្នជាប្រធានស្ដីទីសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ។ (រូបថត MONOROOM.info/ O.Vary)

ទស្សនាវដ្តីមនោរម្យ.អាំងហ្វូ មិនអាចសុំការអធិបាយពន្យល់ ពីប្រធានក្រុមប្រឹក្សាជំនុំជំរះ ចំពោះការចោទប្រកាន់​ខាង​លើបានទេ ក្នងចុងសប្ដាហ៍នេះ ដោយលោកពុំទទួលទូរស័ព្ទ។

លោក សុខ ឈុនអឿន បានអះអាងទៀតថា ការបដិសេធមិនទទួលយកឯកសារស្តុតាងនានា ជាវីដេអី ជារូបភាព ដែលជាហេតុផលស្របច្បាប់របស់មេធាវី ពីសំណាក់ស្ថាប័នតុលាការគ្រប់ជាន់ថា្នក់ ការប្រកាសសាលដីកាយ៉ាង​តក់​ក្រហល់​របស់តុលាការកំពូល ដោយបន្តការឃុំខ្លួនលើអ្នក២១នាក់ ត្រូវបានប្រជាពលរដ្ឋក៏ដូចជាអ្នកតាមដាន​នូវ​រឿង​នេះ ចាត់ទុកជាស្រេចទៅហើយ ថាជារឿងនយោបាយ។ អ្នកនយោបាយទាំងនោះ បានយកសកម្មជនសិទ្ធិមនុស្ស សកម្មជនដីធ្លីនិងកម្មករ មកធ្វើចំណាប់ខ្មាំងរបស់ខ្លួន ដើម្បីជាថ្នូរ«ដោះស្រាយបញ្ហាជាប់គាំងនយោបាយនេះ» ព្រោះ​តែបំពេញ និងដើម្បីការពារនូវអំណាចបុគ្គល៕