រាជរដ្ឋាភិបាលកម្ពុជា កាលពីថ្ងៃសុក្រ បានអនុម័តសេចក្តីព្រាងគោលនយោបាយជាតិស្តីពីលំនៅឋាន ដើម្បីជួយដល់​ពលរដ្ឋងាយរងគ្រោះ និងក្រីក្រ ខណៈដែលគេប៉ានប្រមាណថា កម្ពុជាអាចត្រូវការលំនៅដ្ឋាន​ថ្មី១.១លាន​បន្ថែម​ទៀត​នៅក្នុងឆ្នាំ ២០៣០ ដោយមិនរាប់បញ្ចូលលំនៅដ្ឋានបច្ចុប្បន្ន។

តំបន់ប៊ុលឌីង«ស» នៅនឹងច្រមុះរបស់រាជធានីភ្នំពេញ។ (រូបភាពឯកសារ)

ដោយ គិន ង៉ុយ (ទំនាក់ទំនង [email protected]) - ភ្នំពេញ ថ្ងៃទី១០ ឧសភា ២០១៤
------------------

លំនៅដ្ឋាន - សេចក្តីប្រកាសព័ត៌មានរបស់ ទីស្តីការគណៈរដ្ឋមន្ត្រី ស្តីពីលទ្ធផលនៃសម័យប្រជុំពេញអង្គ របស់គណៈ​រដ្ឋមន្ត្រី ក្រោម​​អធិបតីភាពលោកនាយករដ្ឋមន្ត្រី ហ៊ុន សែន បានបានឆ្លងសេចក្តីព្រាងគោលនយោបាយជាតិ​ស្តីពី​លំនៅឋាន ដោយ​លើកឡើងថាបន្ទាប់ពីឆ្លងកាត់សង្គ្រាមពីឆ្នាំ១៩៧០ដល់១៩៧៥ ហេដ្ឋារចនាសម្ព័ន្ធសេដ្ឋកិច្ចសង្គម ត្រូវបានបំផ្លិច​បំផ្លាញ ក្នុងនោះលំនៅឋានប្រជាពលរដ្ឋមួយចំនួនធំ ក៏ត្រូវបានបំផ្លិចបំផ្លាញដែរ ដែលធ្វើឲ្យកំណត់ត្រា​ដីធ្លី ត្រូវបាន​បាត់បង់។ គួបផ្សំនឹងអត្រាកំណើនប្រជាជនខ្ពស់ក្រោយសង្គ្រាម ជាពិសេសកំណើនសេដ្ឋកិច្ចខ្ពស់​នៅ​រយៈពលេ​ប៉ុន្មានឆ្នាំថ្មីៗនេះ បានបង្កឲ្យមានលំហូរប្រជាជនមួយចំនួន ធ្វើបម្លាស់ទីពីជនបទមកកាន់ទីក្រុង ទីប្រជុំជន ដែលមាន​សក្តានុពលសេដ្ឋកិច្ច ធ្វើឲ្យទីក្រុង និងទីប្រជុំជន មានសម្ពាធកាន់តែធ្ងន់ធ្ងរថែមទៀត​ទៅលើតម្រូវការ​លំនៅឋាន និងដីធ្លី។

សេចក្តីប្រកាសព័ត៌មានឲ្យដឹងទៀតថា៖ «តាមការប៉ាន់ស្មាននៅឆ្នាំ២០៣០ ប្រជាជនកម្ពុជា នឹងមានទៅដល់១៨លាន​នាក់ កម្ពុជា អាចត្រូវការលំនៅឋានថ្មីប្រមាណជាង១.១លានបន្ថែមទៀត ដោយមិនរាប់បញ្ចូលលំនៅឋានបច្ចុប្បន្ន»។

សេចក្តីប្រកាសព័ត៌មាន ឲ្យដឹងទៀថា រាជរដ្ឋាភិបាល ប្តេជ្ញាការអនុវត្តគោលការណ៍សិទ្ធិមនុស្ស ជាអាទិ៍សិទ្ធិទទួល​បាន​លំនៅឋានសមរម្យសម្រាប់ស្នាក់នៅរបស់ប្រជាជន គ្រប់រូប ដោយដាក់ចេញនូវយុទ្ធសាស្ត្រនានា ដែលក្នុង​នោះ​រួមមានយុទ្ធសាស្ត្រជាតិកាត់បន្ថយភាពក្រីក្រ ផែនការសកម្មភាពអភិបាលកិច្ច ផែនការយុទ្ធសាស្ត្រអភិវឌ្ឍជាតិ និង​យុទ្ធសាស្ត្រចុតុកោណជាដើម ដោយធានានូវសិទ្ធិទទួលបានលំនៅឋានសមរម្យរបស់ប្រជាជនកម្ពុជា ជាពិសេស​អ្នក្រីក្រ និងក្រុមជនងាយរងគ្រោះ។

សេចក្តីប្រកាសព័ត៌មានឲ្យដឹងទៀតថា សេចក្តីព្រាងគោលនយោបាយលំនៅឋាននេះ នឹងក្លាយជាផែនទីចង្អុលផ្លូវ​រយៈពេលវែង ត្រូវបានរៀបចំឡើងដោយមានគោលបំណង ផ្តល់ដល់ប្រជាជនទូទៅនូវលទ្ធភាព និងមធ្យោបាយ ដែលអាចទទួលបានលំនៅឋានសមរម្យ ឬជួសជួលកែលំនៅឋាន និងការគិតគូរជាពិសេសដល់ក្រុមគ្រួសារ ដែល​មាន​ប្រាក់ចំណូលមធ្យម ប្រាក់ចំនួនទាប និងក្រុមជនងាយរងគ្រោះ និងដោះស្រាយជូនពលរដ្ឋ ដែលរស់នៅ​បណ្តោះ​អាសន្នក្នុងទីតាំងមិនរៀបរយ ដោយមានកិច្ចសហការជាមួយដៃគូអភិវឌ្ឍន៍ សង្គមស៊ីវិល សប្បុរសជន ដើម្បីកសាង​កម្មវិធីលំនៅឋានថ្នាក់ជាតិ និងថ្នាក់ក្រោមជាតិសម្រាប់រយៈពេលខ្លី មធ្យម និងវែង។ សេចក្តីប្រកាសព័ត៌មាន​បាន​បញ្ជាក់ទៀតថា៖ «សេចក្តីព្រាងគោលនយោបាយនេះ នឹងចូលរួមចំណែកក្នុងការអភិវឌ្ឍជនបទសេដ្ឋកិច្ចគ្រួសារ បង្កើត​ការងារធ្វើ ការពារបរិស្ថាន និងប្រពៃណីទំនៀមទម្លាប់ល្អរបស់សង្គមជាតិ»។

កាលពីថ្ងៃសុក្រកន្លងមក លោកនាយករដ្ឋមន្ត្រី ហ៊ុន សែន បានណែនាំដល់រដ្ឋមន្ត្រីក្រសួងការងារ និង​បណ្តុះ​បណ្តាល​​វិជ្ជាជីវៈ ដោយជំរុញឲ្យ សហការជាមួយបណ្តារោងចក្រនីមួយៗ សាងសង់ផ្ទះសម្រាប់​ការស្នាក់នៅរបស់​កម្មករ​កម្មការិនី ដែលមកពីតាមបណ្តាខេត្តនានា មកធ្វើការនៅភ្នំពេញ ក្នុងគោលបំណងជួយកាត់បន្ថយបន្ទុក​ការចំណាយ​របស់កម្មករ-កម្មការិនី។

កាលពីខែកុម្ភៈ ឆ្នាំ ២០១៤ លោក គាត ឈន់ ឧបនាយករដ្ឋមន្រ្តីប្រចាំការបានបង្ហាញថា ក្នុងរយៈពេល៧ឆ្នាំ​រដ្ឋាភិបាល​បានរំដោះមនុស្ស៤លាននាក់ ឲ្យចាកផុតពីភាពក្រីក្រ។

លោក សៀ ភារម្យ ប្រធានក្រុមការងារពិសេសសិទ្ធិលំនៅដ្ឋាន បានថ្លែងឲ្យដឹងថា លោកស្វាគមន៍ចំពោះ រដ្ឋាភិបាល​ដែលបានអនុម័តសេចក្តីព្រាងគោលនយោបាយជាតិស្តីពីលំនៅឋាន បន្ទាប់ពីពិភាក្សាគ្នា​ជាមួយ​សង្គម​ស៊ីវិល អស់​រយៈពេល៤លើកកន្លងមក ពីព្រោះចំណុចទាំងឡាយ លើកដំកើងនិងការពារផលប្រយោជន៍​ប្រជាជន​ក្រីក្រ​មានសិទ្ធិ​ទទួលបានលំនៅដ្ឋានសមរម្យ។ លោកបានថ្លែងឲ្យដឹងទៀតថា៖ «យើងនឹងមានការសោកស្តាយ ប្រសិនបើ​រដ្ឋាភិបាល​ធ្វើសេចក្តីអនុម័តសេចក្តីព្រាងចាស់ទេនោះ ពីព្រោះ ពុំបានបំរើឲ្យផលប្រយោជន៍ ឲ្យប្រជាជនទូរទៅ​នោះទេ គឺបំរើឲ្យតែផលប្រយោជន៍អ្នកមានអំណាចតែប៉ុណ្ណោះ»៕