ក្រុមអ្នកតវ៉ាមួយក្រុម ដែលមានកាន់បដា សរសេរអក្សរធំៗថា «ប្រជាពលរដ្ឋភូមិបាលិលេយ្យ២ ប្រឆាំង​ដាច់​ខាត​មិនឲ្យបុគ្គលណា យកដីផ្លូវធ្វើជាសម្បត្តិ​ផ្ទាល់ខ្លូននោះទេ» បានឲ្យដឹងថា អ្នកដែលរស់នៅ សងខាងផ្លូវ​សារធារណៈ ប្រមាណជា១៣គ្រួសារ ត្រូវបានអាជ្ញាធរបិទផ្លូវមិនឲ្យចេញចូល និងគ្រោងដេញអ្នកទាំងនេះ ឈប់​ឲ្យរស់នៅ ដោយមិនផ្តល់ជាទីតាំងថ្មីណាមួយឡើយ។ អ្នកទាំងនោះ បានផ្ទុះការតវ៉ានេះឡើង ដើម្បីសុំឲ្យ​សាលា​ក្រុងប៉ោយប៉ែត ជួយអន្តរាគមន៍ និងបញ្ឈប់ការដេញចេញ ហើយបើឲ្យចេញ សុំឲ្យមានសំណងសមរម្យ ដល់​ពួក​គាត់។

ដោយឡែក អ្នកតវ៉ាមួយក្រុមទៀត ដែលផ្ទុះការតវ៉ានៅក្នុងពេលតែមួយនេះ បានសរសេរអក្សរ នៅលើបដា​របស់​ពួកគាត់ថា «ពួកយើងទាំងអស់គ្នា សុំឲ្យរដ្ឋាភិបាលផ្តល់លំនៅដ្ឋាន ទាំង៤៣គ្រួសារផង។ យើងត្រូវការដី សង់លំនៅដ្ឋាន។» ក្រុមអ្នកតវ៉ា ប្រមាណ៤៣គ្រួសារនេះ បានស្រែកខ្លាំងៗថា ខ្លូនគ្មានដីសម្រាប់ការ​ធ្វើ​លំនៅ​ដ្ឋាន បានពិតប្រាកដនោះទេ។ មានតែការរុះរើ និងគ្មានអាជ្ញាធរណាដោះស្រាយនោះទេ បានតែសន្យា ចំណែក​ការអនុវត្តន៍ នៅតែគ្មានលទ្ធផល។

ទាក់ទងនឹងការតវ៉ាទាំងនេះ លោក ស៊ុំ ចាន់គា មន្រ្តីសមាគមការពារសិទ្ធិមនុស្ស អាដហុក ប្រចាំខត្ត​បន្ទាយ​មាន​ជ័យ បានថ្លែងដោយដឹងថា ក្រុមអ្នកតវ៉ាទាំងពីរក្រុម សុទ្ធតែមានបញ្ហាដីធ្លី ហើយបញ្ហានេះ មិនមែនទើបតែកើត​ឡើងនោះទេ វាជាបញ្ហារ៉ាំរ៉ៃ ជាយូរមកហើយ តែការដោះស្រាយជួនប្រជាពលរដ្ឋ នៅតែគ្មានលទ្ធផល។

លោកថាករណីនៅព្រឹកថ្ងៃទី១២ ខេសីហា ឆ្នាំ២០១៥ នាមុខសាលាក្រុងប៉ោយប៉ែត ខេត្តបន្ទាយមានជ័យ គឹ​គ្មាន​ការបំពេញបន្ថែម សម្រាប់ប្រជាពលរដ្ឋនោះទេ គឹមានតែការសន្យា និងនិយាយឲ្យរួចពីមាត់ ដើម្បីឲ្យហ្វូង​បាតុកម្ម ចាកចេញពីមុខសាលាក្រុងប៉ុណ្ណោះ។ ម្យ៉ាងវិញទៀត មន្ត្រីសិទ្ធមនុស្សរូបនេះ បានបញ្ជាក់ជាចុង​ក្រោយ​ថា បញ្ហារបស់អ្នកភូមិខាងលើ សំខាន់គឹ តុលាការខេត្តនឹងចេញដីកា ដេញប្រជាពលរដ្ឋនៅថ្ងៃទី១៣ សីហា​ស្អែកនេះ ជាកំហិតពីដីចំណីផ្លូវ ដែលពួកគាត់ធ្លាប់រស់នៅ អស់ជាច្រើនឆ្នាំកន្លងមក។

រហូតមកដល់ថ្ងៃត្រង់ ថ្ងៃដដែលនេះ ក្រុមអ្នកតវ៉ានៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ បាននាំគ្នារំសាយចេញ ពីមុខសាលាក្រុង ទាំងមិនទាន់បានលទ្ធផល ដោយមាន​កម្លាំង​ចម្រុះ​មួយក្រុម ស្នើឲ្យចាកចេញ។ តែក្រុមប្រជាពលរដ្ឋ ដែលនឹងរងការបណ្ដេញចេញ នៅថ្ងៃស្អែកនេះ មិន​ព្រម​ធ្វើ​ដំណើរ ចេញពីមុខសាលាក្រុងទេ ដោយហេតុពីការព្រួយបារម្ភ ពីបញ្ហាដែលគ្មានជម្រកនៅ របស់ពួកគេ និង​គ្រួសារ៕