អ្នកស្រី យ៉ោម បុប្ផា ត្រូវបានផ្លាស់ប្តូរកន្លែងឃុំខ្លួន ពីពន្ធនាគារព្រៃស ដែលស្ថិតនៅក្រោមការគ្រប់គ្រង របស់​នាយកដ្ឋាន​ពន្ធនាគារនៃក្រសួងមហាផ្ទៃ ទៅកាន់ពន្ធនាគារ PJ វិញ ដែលគ្រប់គ្រងដោយស្នងការ​នគរបាលរាជធានី​ភ្នំពេញ។ តែក្រុម​អ្នកការពារសិទ្ធិមនុស្ស និងខាងគ្រួសារជនជាប់ចោទ បានចោទថា ជារឿងខុសច្បាប់ ដោយមកពី​ការផ្លាស់ប្ដូនេះ មិនបាន​ជូនដំណឹងជាមុន។

រូបភាព អ្នកស្រីយ៉ោម បុប្ផា កាលពីខែកញ្ញាឆ្នាំ២០១២។

មូលហេតុនៃការផ្លាស់ប្តូរនេះ មន្រ្តីរដ្ឋបាលមួយរូបពន្ធនាគារព្រៃស ម២ លោក សាទ មុស បានបញ្ជាក់ថា នៅ ម២ មាន​អ្នក​ទោសកាន់តែកើនច្រើនឡើង ធ្វើឲ្យចង្អៀត។ លោក ថាក្នុងថ្ងៃនេះមានការប្តូរ អ្នកទោសស្រីជាងម្ភៃនាក់ផ្សេងទៀត ដែល​ស្ថិតនៅក្រោមការគ្រប់គ្រងរបស់អគ្គនាយកដ្ឋានតែមួយដដែល។

តែលោក លួស សាខន ជាស្វាមី បាននិយាយថា ភរិយាលោក មិនបានដឹងពីមូលហេតុនេះទេ។ លោកបានថ្លែងថា មន្ត្រី​ខាងពន្ធនាគារបានប្រាប់ភរិយាលោក ឲ្យរៀបចំឥវ៉ាន់ ដើម្បីធ្វើការផ្លាស់ប្តូរកន្លែង នៅព្រឹកថ្ងៃ​ដដែលតែប៉ុណ្ណោះ។ លោក​បន្តថា មន្ត្រីខាង PJ ប្រាប់ថានៅទីនេះទូលាយជាង និងជាអ្នកទោសកំរិតស្រាល។

ការផ្លាស់ប្តូរដោយស្ងាត់ស្ងៀមនេះ មន្ត្រីអង្គការសង្គមស៊ីវិល មេធាវី បានធ្វើការរិះគន់ថា ការមិនផ្តល់ដំណឹងដល់មេធាវី និង​សាច់ញាតិជនជាប់ចោទជាមុន ជាការមិនគោរពច្បាប់ មិនគោរពសិទ្ធិមនុស្ស ពិសេសមិនគោរពសិទ្ធិរបស់​ជន​ជាប់​ចោទ។

លោក ហម ស៊ុនរិទ្ធិ ជាមេធាវីការពារឲ្យអ្នកស្រី យ៉ោម បុប្ផា បានបញ្ជាក់ថាការផ្លាស់ប្តូនេះលោកពុំបានទទួល ដំណឹង ឬ​ព័ត៌មានជាផ្លូវការទេ។ លោកបន្តថា តាមនីតិវិធីមានលក្ខណៈស្មើភាពគ្នាចំពោះមុខច្បាប់ រាល់ការផ្លាស់ប្តូរកូនក្តីលោក ត្រូវ​តែជូនដំណឹងជាមុន។ លោកបង្ហាញថា មូលដ្ឋានគ្រឹះនៃការគោរពសិទ្ធិរបស់ជនជាប់ចោទ ជាការជូនដំណឹងទៅគ្រួសារ​របស់គាត់ជាការសំខាន់ និងក៏ត្រូវជូនដំណឹងទៅមេធាវី ដើម្បីអាចទំនាក់ទំនងគ្នាបានផងដែរ។

លោក មឿង តុលា ប្រធានកម្មវិធីការងារ នៃមជ្ឈមណ្ឌលអប់រំច្បាប់សម្រាប់សហគមន៍ លើកឡើងប្រហែលគ្នាថា នេះជា​ភាពមិនប្រក្រតីមួយ។ ទោះជាយ៉ាងនេះក៏ដោយលោកបានបង្ហាញថា ក្នុងចំណោមពន្ធនាគារទាំងអស់ PJ ជាពន្ធនាគារ​មួយដែលមានភាពប្រសើរជាងគេ។

បំបែកចេញ ព្រោះខ្លាចបង្កើតសហគមន៍អ្នកទោស?

ដោយឡែក ប្រធានផ្នែកបច្ចេកទេសស៊ើបអង្កេតអង្គការសិទ្ធិមនុស្សលីកាដូ លោក អំ សំអាត បានបង្ហើបថា នេះគ្រាន់តែ​ជា​រូបភាពមើលពីខាងក្រៅប៉ុណ្ណោះ តែតាមការពិតអ្នកស្រីយ៉ោម បុប្ផា បានដឹងនិងក្តាប់បាន ពីបញ្ហាមួយចំនួន​ដែល​កើត​មាន​ឡើងនៅ មណ្ឌលកែក្រែ ម២ (ព្រៃសរ)។ គេខ្លាចអ្នកស្រីធ្វើការការចងក្រងអ្នកទោស ទៅជាសហគម ទើបមានការបំបែក​យ៉ាងដូចនេះ។ ក្រោយពេលឃុំខ្លួនអ្នកស្រី យ៉ោម បុប្ផា ចេះតែមានបាតុកម្ម ជាញឹកញាប់នៅមុខពន្ធនាគារព្រៃស​នោះ។

លោកបញ្ជាក់ថា អ្នកស្រី យ៉ោម បុប្ផា ស្ថិតក្នុងភាពមិនទាន់មានទោសនៅឡើយទេ។ គាត់ជាពិរុទ្ធជន មិនមែនជាទណ្ឌិតទេ ដូច្នេះរាល់ការផ្លាស់ប្តូរការឃុំខ្លួន ត្រូវតែជូនដំណឹងដល់គ្រួសារ និងមេធាវីជាចាំបាច់។ មួយវិញទៀតនៅពន្ធនាគារ PJ ពិបាកក្នុងការចូលសួរសុខទុក ក៏ដូចជាការទាមទារ ឬតវ៉ាណាស់។ ព្រោះត្រូវមានការអនុញ្ញាតពីស្នងការត្រឹមត្រូវច្បាស់-​លាស់ និងមានហេតុផល ទើបអាចអនុញ្ញាតិ។

លោក លួស សាខន ជាស្វាមីសង្ឃឹមថា ប៉ុន្មានថ្ងៃខាងមុខនេះ មានពីធីបុណ្យចំរើនព្រះជន្មព្រះមហាក្សត្រ នរោត្តម សីហ មុនី នឹងមានអ្នកទោសមួយចំនួន ត្រូវបានព្រះមហាក្សត្រ ព្រះរាជទានលើកលែងទោស និងបន្ធូបន្ថយទោស ក្នុងនោះ​ក៏​នឹងមានភរិយារបស់លោកផងដែរ។

សូមរម្លឹកថា អ្នកស្រី យ៉ោម បុប្ផា ជាប់ចោទពីបទប្រើហឹង្សាដោយចេតនា វាយទៅលើអ្នករត់ម៉ូតូឌុបពីរនាក់ឲ្យរងរបួស តាម​សាលក្រមសាលាដំបូងរាជធានីភ្នំពេញ។ ជាងប្រាំបីខែនៃការឃុំខ្លួននេះ ជនជាប់ចោទកំពុងបន្តនីតិវិធី នៅសាលាឧទ្ទរណ៍​ទៀត ដើម្បីជម្ទាស់នឹងសាលក្រមនេះ។
---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១០ ឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ