បុគ្គលិក​សណ្ឋាគារ​សូហ្វីតែល ភ្នំពេញ ភូគីត្រា ចំនួន​ពីរ​រូប​ត្រូវ​បាន​ចាប់​ខ្លួន និង​ចោទ​ប្រកាន់​ពី​បទ​«ចោរ​កម្ម» រួច​ព្រម​ទាំង​ធ្វើការ​ឃុំ​ខ្លួន​ជា​បណ្តោះ​អាសន្ន ដោយ​តុលាការ បើ​ពិនិត្យ​យោង​តាម​របាយ​ការណ៍​របស់​សមត្ថកិច្ច។

តំណាង​អយ្យការ​សាលា​ដំបូង​រាជធានី​ភ្នំពេញ លោក កែវ សុជាតិ ដោយ​យោង​តាម​របាយការណ៍​របស់​សមត្ថកិច្ច ជា​មួយ​នឹង​ពាក្យ​បណ្តឹង​របស់​ដើម​ចោទ​លោក សៀក សុជាតិ បាន​សម្រេច​ចោទ​ប្រកាន់​ជន​សង្ស័យ​ទាំង​ពីរ​នាក់​នោះ ពី​បទ​«ចោរ​កម្ម»។ ហើយ​បាន​បញ្ជូន​ទៅ​កាន់​លោក ម៉ុង មុន្នីសោភា ចៅក្រម​ស៊ើប​សួរ នៃ​សាលា​ដំបូង​រាជធានី​ភ្នំពេញ ធ្វើការ​សម្រេច​ចោទ​ប្រកាន់ និង​បន្ត​នីតិវិធី​តុលាការ។

ជនជាប់សង្ស័យទាំងពីររូបនេះ នៅចំពោះមុខតុលាការ បានធ្វើការបដិសេធចំពោះការចោទប្រកាន់នោះ ដោយ​អះអាងថាខ្លួនមិនបានយកនោះឡើយ។ បើទោះជាយ៉ាងនេះក្តី លោក កែវ សុជាតិ ព្រះរាជអាជ្ញារង បាន​សម្រេចធ្វើការចោទប្រកាន់ភ្លាមៗ និងបញ្ជូនទៅឲ្យចៅក្រមស៊ើបសួរ ដើម្បីឃុំខ្លួនជនទាំងពីរ ជា​បណ្តោះ​អាសន្ន កាលពីរសៀលថ្ងៃទី២១ ខែមករាម្សិលម៉ិញនេះ។

«ករណីចោទប្រកាន់នេះ ជនសង្ស័យទាំងពីរនាក់មិនបានឆ្លើយសារភាពអ្វីនោះទេ។ ខ្ញុំសម្រេចធ្វើការចោទ​ប្រកាន់​យោងទៅតាមរបាយការណ៍របស់សមត្ថកិច្ចដែលបញ្ជូនសំណុំរឿងមក។ (…) ទ្រព្យសម្បត្តិរបស់​ជន​រងគ្រោះដែលបាត់បង់ គឺមានតម្លៃជាទឹកប្រាក់ជាង២០ម៉ឺនដុល្លារ(អាមេរិក)។» នេះបើតាមការបញ្ជាក់ របស់​លោកព្រះរាជអាជ្ញារង តាមសារព័ត៌មានដើមអម្ពិល។

តាមការអះអាង របស់នាយកទីចាត់ការការងារព្រំដែន នៃអគ្គបញ្ជាការដ្ឋានកងយោធពលខេមរភូមិន្ទ លោក​ឧត្តមសេនីយ៍ឯក សៀក សុជាតិ និងជានាយរងសេនាធិការចម្រុះ នៃកងយោធពលខេមរភូមិន្ទ (ផ្កាយ៣) បានលើកឡើងថា លោកបាត់គ្រឿងអលង្ការមានខ្សែក បន្ដោងដាំពេជ្រ ចិញ្ចៀន និងកាបូបលុយ សរុបទឹក​ប្រមាណជិត២០ម៉ឺនដុល្លារអាមេរិក បន្ទាប់ពីលោកបានត្រឡប់មកពីហាត់ប្រាណ ស្ទីម សូណា និងម៉ាស្សាវិញ ក៏បើកប្រអប់សុវត្តិភាព សម្រាប់ដាក់សម្ភារៈភ្ញៀវ ក៏បាត់តែម្តង។ លោកបញ្ជាក់ថា សោរប្រអប់សុវត្តិភាពនោះ មេការម្នាក់បានប្រគល់កូនសោរឲ្យលោក ដើម្បីចាក់និងរក្សាទុកដោយខ្លួនឯង។

ជនសង្ស័យទាំងពីរនាក់នោះ ឈ្មោះ សំរិទ្ធ រស្មី ភេទប្រុស អាយុ៣៤ឆ្នាំ ជាគ្រូបង្ហាត់ហែលទឹក និងឈ្មោះ នុត សាវ៉េត ភេទស្រី អាយុ ៣២ឆ្នាំ ជាមេការមើលការខុសត្រូវ សណ្ឋាគារសូហ្វីតែល។ បើទោះជាបដិសេធ​មិន​ទទួលស្គាល់យ៉ាងណា ក៏ជនសង្ស័យទាំងពីរ មិនអាចរួចពីបណ្ដឹងចោទប្រកាន់ របស់លោកផ្កាយបី​នោះ​ឡើយ។ ពួកគេក៏ត្រូវបាននាយកដ្ឋាននគរបាលព្រហ្មទណ្ឌក្រសួងមហាផ្ទៃ ចុះធ្វើការស្រាវជ្រាវ ក៏ឈានទៅ​ដល់ការឃាត់ខ្លួន បុគ្គលិកសណ្ឋាគារទាំងពីរនាក់ រួចបញ្ជូនទៅកាន់តុលាការតែម្តង។

អ្នកដែលស្គាល់សណ្ឋាគារនេះមួយរូប បានលើកឡើងដោយមិនបញ្ចេញអត្តសញ្ញាណថា មិនមានអ្វីពិបាក ក្នុងការស្វែងរកជនល្មើសពិតប្រាកដនោះទេ ព្រោះថាសម្រាប់សណ្ឋាគារ លំដាប់ផ្កាយប្រាំខាងលើនេះ មុខ​ជាមានបំពាក់នូវការមេរ៉ាសុវត្តិភាព។ ដូច្នេះអាចបើកមើល នឹងឃើញពីសកម្មភាពនានា ដែលទាក់ទងនឹង​ប្រអប់​សុវត្តិភាពនោះ ជាមិនខាន។ បើលោកផ្កាយបីរូបនេះ ពិតជាបានទុករបស់ទាំងអស់ នៅក្នុងប្រអប់នោះ វាមិនពិបាកក្នុងការស្វែងរក តាមរយៈកាមេរ៉ាសុវត្តិភាពនេះទេ។ ខ្លាចតែលោកមិនបានដាក់របស់ក្នុងនោះ ហើយស្រែកថាដាក់។

សម្រាប់សមត្ថកិច្ចមួយរូប ដែលបានចុះធ្វើការស្រាវជ្រាវ និងអង្កេតនោះ បានថ្លែងឡើងថា លោកពិតជា​បាន​ពិនិត្យមើល ការមេរ៉ាសុវត្តិភាពជាមុនហើយ ទើបលោកអាចធ្វើការសន្និដ្ឋាន និងឈានដល់ការចោទប្រកាន់ និងចាប់ខ្លួនជនសង្ស័យទាំងពីរនាក់នោះយ៉ាងដូច្នេះ។ បើគ្មានភស្តុតាងជាក់លាក់ណាមួយស៊ីចង្វាក់ទេ នោះ​សមត្ថកិច្ចមិនអាចចាប់ខ្លួន ឬចោទប្រកាន់បុគ្គលណាម្នាក់ថាមានកំហុសនោះដែរ។

យោងតាមមាត្រា៣៨ នៃរដ្ឋធម្មនុញ្ញបានចែងថា៖ «ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួន​ជន​ណាមួយនឹងអាចធ្វើទៅកើត លុះត្រាតែអនុវត្តត្រឹមត្រូវតាមបញ្ញត្តិច្បាប់។ (…) ការទទួលសារភាព ដែល​កើតឡើងពីការបង្ខិតបង្ខំតាមផ្លូវកាយក្ដី តាមផ្លូវចិត្តក្ដី មិនត្រូវទុកជាភស្តុតាងនៃពិរុទ្ធភាពទេ។ វិមតិសង្ស័យ ត្រូវបានជាប្រយោជន៍ដល់ជនជាប់ចោទ។ ជនជាប់ចោទណាក៏ដោយ ត្រូវទុកជាមនុស្សឥតទោស ដរាប​ណា​តុលាការមិនទាន់កាត់ទោសជាស្ថាពរ។ ជនគ្រប់រូបមានសិទ្ធិការពារខ្លួនតាមផ្លូវតុលាការ។»៕