ជម្លោះដីធ្លីមួយនេះ មានជាយូរណាស់មកហើយ ប៉ុន្តែមិនមានអ្នកណា ជាអ្នករងបញ្ហាធំដំនោះទេ ទើបតែមក​ដល់ថ្ងៃ​ទី០៦ ខែកុម្ភៈ ឆ្នាំ២០១៥នេះ មានក្រុមហ៊ុន បានបញ្ជាគ្រឿងចក្រ មកឈូសឆាយ ជីកដីពលរដ្ឋនៅភូមិពង្រ សង្កាត់​កំពង់​ស្វាយ ក្រុងសេរីសោភ័ណ្ឌ ខេត្តបន្ទាយមានជ័យ។ ចាប់តាំងពីថ្ងៃទី០៦ ខែកុម្ភៈ មកដល់ថ្ងៃទី២១ ខែកុម្ភៈនេះ ពលរដ្ឋបានដាក់ពាក្យបណ្តឹផ្សេងៗទៅសាលាឃុំ និងសាលាក្រុងខាងលើ តែនៅមិនមានដំណោះស្រាយ។ ពលរដ្ឋ​បានបន្តការតវ៉ារបស់ពួកគេ  រហូតមកដល់មុខសាលាខេត្ត បន្ទាយមានជ័យ ទៀត នៅព្រឹកថ្ងៃទី២១កុម្ភៈនេះ ដោយ​មាន​ការចូលរួម ពីអ្នកភូមិប្រមាណ ជាជាង១០០នាក់។

តំណាងអ្នកភូមិខាងលើលោក រាជ្យ កុសល បានប្រាប់ទស្សនាវដ្តីមនោរម្យ.អាំងហ្វូថា លោកនិងអ្នកភូមិ បានមកដល់​សាលាខេត្ត តាំងពីពេលព្រឹក រហូតដល់ម៉ោង៩ហើយ តែនៅមិនទាន់មាន អ្នកធ្វើការណាម្នាក់ចេញមកទទួលពាក្យ ឬ​មានការសាកសួរអ្វីផ្សេងៗនោះទេ។ លោកបន្តថា ពលរដ្ឋទាំងអស់ មិនបានដឹងច្បាស់លាស់ថា ក្រុមហ៊ុននោះ ជា​ក្រុមហ៊ុន​អ្វីនោះទេ តែលោកបានប្រាប់ថា ជាបញ្ជារបស់មេបញ្ជាការម្នាក់ឈ្មោះ ហុង ក្នុងខេត្តនេះ។ តែអ្នកភូមិរូបនេះ បានឲ្យដឹងថា នៅពេលដែលពួកគាត់ហាមឃាត់ មិនឲ្យមានការឈូសឆាយ ម្ចាស់គ្រឿងចក្រនោះ បានប្រាប់ថា គាត់​បានទិញដីនេះរួចហើយ។ លោកប្រាប់ទៀតថា មិនមានការព្រមព្រៀងណាមួយ ដោយមានឯកសាត្រឹមត្រូវ ដែលបាន​លក់​នោះទេ ព្រោះជាដីដែលពួកគាត់កំពុងត្រួវការ។

លោក ណាន់ ចន តំណាងអ្នកតវ៉ាម្នាក់ទៀតនោះ បានឲ្យទស្សនាវដ្តីដឹងថា គាត់បានដាក់ពាក្យបណ្តឹង​ជាច្រើនដង​ហើយ តែហាក់មិនមានការទទួលយក ពីភូមិឃុំទេ។ រហូតមកដល់ថ្ងែនេះ អ្នកភូមិនអាចទ្រាំមើល គេជីកដីរបស់​ខ្លួន​ទៀត​បានទេ ក៏បន្តនាំពាក្យនេះ មកដល់សាលាខេត្តបន្ទាយមានជ័យ។ ដើម្បីឲ្យមានអន្តរាគមន៍ បញ្ឈប់ការជីកកាយ​ដីនេះ ជាបន្ទាន់។

ឆ្លើយតបនឹងការទាមទារខាងលើរបស់ពលរដ្ឋ លោក អ៊ុំ រាត្រី អភិបាលរងខេត្តបន្ទាយមានជ័យ បានប្រាប់ទស្សនាវដ្តី​មនោរម្យ.អាំងហ្វូថា លោកមិនទាន់បានដឹងរឿងនេះនៅឡើយទេ។ ហើយការដែលតវ៉ា ដាក់ពាក្យបណ្តឹងនេះ ក៏លោក​មិនបានដឹងដែរ ព្រោះថ្ងៃនេះ ជាថ្ងៃឈប់សំរាក។ លោកនិយាយថា៖ «ខ្ញុំមិនទាន់បានចូលធ្វើការវិញទេ។ ដូច្នេះ មិន​បាន​ដឹងរឿងនេះ។»។

រីឯលោក ស៊ុំ ចាន់គា មន្ត្រីឃ្លាំមើលសិទ្ធិមនុស្ស របស់សមាគមអាដហុក ប្រចាំខេត្តបន្ទាយមានជ័យ បានឲ្យដឹងថា ម្ចាស់​ក្រុមហ៊ុនឯកជនដែលមានជម្លោះ ជាមួយនឹងអ្នកភូមិខាងលើឈ្មោះ ហុង មានតួនាទីជាមេទាហាន នៅក្នុងខេត្ត​បន្ទាយមានជ័យនោះផង។ លោកប្រាប់ថា ចំពោះរឿងនេះ លោកនៅមិនទាន់បានដំណឹងថា តើសាលាខេត្ត នឹង​ដោះ​ស្រាយយ៉ាងណានោះទេ។ តែលោកបានលើកឡើងថា ពលរដ្ឋធ្វើបែបនេះ វាជារឿងត្រិមត្រូវ ព្រោះភាព​អយុត្តិធម៍​មួយ​នេះ មានសភាពធ្ងន់ធ្ងរខ្លាំង សម្រាប់ប្រជាពលរដ្ឋ។ លោក ចាន់គា បានបញ្ជាក់ថា ក្រុមហ៊ុនមួយនេះ មានឯកទេស ខាងជីកភ្នំមួយចំនួន ដោយសំអាងលើអាជ្ញាប័ណ្ណ។ តែមកដល់ពេលនេះ ក្រុមហ៊ុនបានយកអាជ្ញាប័ណ្ណនោះ មកធ្វើការ​ជីក​កកាយ​លើដីអ្នកភូមិទាំងនេះទៅវិញ៕