ក្រុមតំណាងរាស្ត្រនៃប្រទេសទួគីរ មកពីគណបក្សប្រឆាំង បានប្រើប្រាស់ល្បិចពន្យាពេល ដើម្បីបញ្ជៀសការជជែក ពិភាក្សា ទៅលើច្បាប់«សន្ដិសុខផ្ទៃក្នុង»មួយ ដែលពោរពេញទៅដោយភាពប្រទាំងប្រទើស។ ច្បាប់នោះ នឹងអនុញ្ញាត ឲ្យកងកម្លាំងអាជ្ញាធរ អាចធ្វើការឆែកឆេរ ចាប់ខ្លួន ឬលួចស្ដាប់តាមទូរស័ព្ទ ដោយអាជ្ញាធរគ្រាន់តែ ធ្វើការ«សង្ស័យ»​ប៉ុណ្ណោះ និងមិនចាំបាច់ មានដីការបង្គាប់ពីតុលាការ។

បើតាមគេហទំព័រក្នុងស្រុកមួយ ឈ្មោះ Hurriyet បានឲ្យដឹងថា ការជជែកប៉ះសម្ដីគ្នា ដែលមានរយៈពេលច្រើន​ជាង​៣ម៉ោង បានទៅហួស ពីការជជែកពិភាក្សា លើគម្រោងច្បាប់ ហើយការតឹងសសៃក បានកើតឡើងរវាងក្រុម​ទាំង​សង​ខាង។ រំពេចនោះ តំណាងរាស្ត្របក្សប្រឆាំងមួយរូប ត្រូវបានតំណាងរាស្ត្របក្សកាន់អំណាចជាច្រើននាក់ ឡោម​ព័ទ្ធ​វាយជាច្រើនកណ្ដាប់ដៃ ធ្វើឲ្យតំណាងរាស្ត្ររូបនោះ ដួលធ្លាក់ចូលទៅក្នុងជណ្ដើរមួយ នៅក្បែរនោះ។

តាមពិតទៅគ្រោះថ្នាក់នេះ ជាគ្រោះថ្នាក់លើកទីពីរហើយ ព្រោះកាលពីយប់ថ្ងៃអង្គារ ចូលមកថ្ងៃពុធ ក្នុងសប្ដាហ៍​ដដែល តំណាងរាស្ត្របក្សប្រឆាំងប្រាំនាក់ បានរងរបួសរួចហើយ ពីការវាយតប់គ្នាជាទូទៅមួយ នៅក្នុងអាគារ​ដ្ឋសភា​នេះ។ ក្នុងនោះ តំណាងរាស្ត្រពីរនាក់ ត្រូវបានគេដំក្បាល នឹងញញួរគោះតុរបស់ប្រធានរដ្ឋសភា។

ហើយការវាយតប់គ្នា នៅក្នុងរដ្ឋសភានេះប្រទេសទួគីរ ក៏មិនមែនទើបនឹងកើត ជាលើកទីមួយដែរ។ កាលដើមឆ្នាំមុន ក្រុមតំណាងរាស្ត្រទាំងនេះ ក៏បានធ្វើការគប់ឯកសារ ដបទឹក... និងវាយតប់គ្នាយ៉ាងចាស់ដៃដែរ បន្ទាប់ពីពួកគេ ជជែក​គ្នាមិនត្រូវ នៅក្នុងគម្រោងច្បាប់ ដែលផ្ដល់អំណាច ទៅឲ្យអង្គការនិតិប្រតិបត្តិ ក្នុងការតែងតាំងចៅក្រម និង​រដ្ឋអាជ្ញា។

នៅប្រទេសអ៊ុយក្រែន ក៏មិនខុសគ្នាដែរ។ តំណាងរាស្ត្រនៃប្រទេសនេះ បានវាយតប់គ្នាយ៉ាងខ្លាំងក្លា និងជាច្រើនដង ក្នុងប៉ុន្មាន​ឆ្នាំចុងក្រោយនេះ។ កាលពីសប្ដាហ៍មុន នៅក្នុងអង្គប្រជុំនៃរដ្ឋសភាអ៊ុយក្រែន តំណាងរាស្ត្រពីរនាក់ បាន​ប្រែ​ក្លាយ​ទី​នោះ ទៅជា​ទី​លាន​ប្រដាល់ បន្ទាប់ពីជជែកគ្នាមិនត្រូវ ទាក់ទងនឹងគម្រោងច្បាប់ប្រឆាំងអំពើពុករលួយ៕