តាមលិខិតចុះថ្ងៃទី៧ ខែកក្កដា ឆ្នាំ២០១៥ របស់សាលារាជធានីភ្នំពេញនោះ បានបញ្ជាក់ពី«មោឃភាព»​លើ​ប្លង់​រឹងនោះ ដោយសំអាង លើអំណាចសាលដីកា របស់តុលាការកំពូល (ដែលជាសាលដីកាស្ថាពរ) លេខ ១៣២ង ចុះថ្ងៃទី២៦ ខែមេសា ឆ្នាំ២០១២។

សូមបញ្ជាក់ថា ប្លង់ដីរឹងនេះ ជាកម្មសិទ្ធិ (ទ្រព្យរួម) របស់ឈ្មោះ ឃួន ផង់ និងនាង ស្វាយ នួន ដែលបានចេញ​ដោយលោក ឆាយ ឬទ្ធិសែន តាមបញ្ជារដ្ឋមន្រ្តីក្រសួងដែនដី និងនគរូបនីយកម្ម កាលពីថ្ងៃទី១០ ខែមីនា ឆ្នាំ​២០០៦។ ប្លង់រឹង ឬវិញ្ញាបនប័ត្រ បញ្ជាក់កម្មសិទ្ធិដីខាងលើ ស្ថិតក្នុងភូមិព្រៃល្វា សង្កាត់ចោមចៅ ខណ្ឌដង្កោ (បច្ចុប្បន្នខណ្ឌពោសែនជ័យ) រាជធានីភ្នំពេញ មានលេខសំគាល់ម្ចាស់អចលនវត្ថុ 12050522-0310 ដែល​មាន​សន្លឹកផែនទី លេខ 5932-ll 60 d 1 មានលេខក្បាលដី 310 និងទំហំដី 1360 ម៉ែត្រការ៉េ ជា​ប្រភេទ​កម្មសិទ្ធិ​ឯកជន។

តាមចំណារ ដែលមានបញ្ជាក់ ក្នុងវិញ្ញាបនប័ត្រសំគាល់ម្ចាស់អចលនវត្ថុលេខៈ 12050522-0310 នេះ បាន​បង្ហាញថា ប្លងដីខាងលើ ត្រូវបានផ្ទេរសិទ្ធិគ្រប់គ្រង ពីឈ្មោះ ឃួន ផង់ និងនាង ស្វាយ នួន បន្តទៅឲ្យឈ្មោះ ធុយ ឆីវអួន (មេម៉ាយពីស្វាមី ផ្លុង សាវឿន ដែលបានស្លាប់) កាលពីថ្ងៃទី៣១ ខែមករា ឆ្នាំ២០០៨ ដោយមាន​បោះត្រាបញ្ជាក់ភ្ជាប់ផង។

ប៉ុន្តែវិញ្ញាបនប័ត្រ សំគាល់ម្ចាស់អចលនវត្ថុខាងលើ ត្រូវបានសាលារាជធានីភ្នំពេញ ចេញសេចក្តីជូនដំណឹង អំពី«មោឃភាព» នៃវិញ្ញាបនប័ត្រខាងលើ ដោយចុះហត្ថលេខា ដោយលោក ប៉ា សុជាតិវង្ស អភិបាល​រាជធានី​ភ្នំពេញ កាលពីថ្ងៃទី៧ ខែកក្កដា ឆ្នាំ២០១៥ ដោយប្រាប់ ទៅម្ចាស់វិញ្ញាបនប័ត្រថា វិញ្ញាបនប័ត្រ សំគាល់ម្ចាស់​អចលនវត្ថុនេះ ត្រូវ«អស់សុពលភាព និងប្រសិទ្ធិភាព(មោឃភាព)» ចំពោះមុខច្បាប់ ដោយអំណាច​សាលក្រម ស្ថាពរលេខៈ ១៣២ង ចុះថ្ងៃទី២៦ ខែមេសា ឆ្នាំ២០១២។ តែបើយោងតាមការវិនិច្ឆ័យសេចក្តី របស់តុលាការ​កំពូល ចុះថ្ងៃទី២២ ខែឧសភា ឆ្នាំ២០១២ របស់លោក ឌិត មុន្ទី ប្រធានតុលាការកំពូល សាលដីកានោះ មិន​បាន​បញ្ជាក់ ពីភាពអស់សុពលភាព នៃវិញ្ញាបនប័ត្រនេះទេ ដោយគ្រាន់តែនិយាយ ពីបណ្តឹង​នៃការទិញ-លក់​ប៉ុណ្ណោះ។

ការប្រកាស«មោឃភាព»ប្លង់រឹង ដោយសាលារាជធានីភ្នំពេញនេះ ត្រូវបានមតិជាច្រើន ក្នុងបណ្តាញសង្គម​ធ្វើការរិះគន់ ទៅលើចំណាត់ការ នៃសាលារាជធានីភ្នំពេញ ថាកំពុងអនុវត្ត ហួសពីតួនាទីខ្លួន។

លោក ធុក គឹមថុល ដែលជាប្រជាពលរដ្ឋម្នាក់ បានបង្ហាញការហួសចិត្តថា បើសាលដីកាមិនបញ្ជាក់ ពី​អសុពលភាពនៃប័ណ្ណនេះផង ហេតុអ្វីបានជាសាលារាជធានី ចេញលិខិតមោឃភាព លើប្លង់នោះបាន? លោក​ចោទសួរថា តើសាលារាជធានី មានសិទ្ធដែរឬទេ បើសាដីកានោះ និយាយត្រឹមបណ្តឹង នៃកាលក់-ទិញ​ប៉ុណ្ណោះ​នោះ?

ពលរដ្ឋរូបនេះ បាននិយាយយ៉ាងខ្លីថា តាមនិតិវិធីធ្វើប្លង់ដីនេះ ត្រូវធ្វើឡើងជា៥ជំហាន ប្រសិនបើគ្មានបណ្តឹង​ជំទាស់ នៅដំណាក់កាលទី៣ នៃការបិទផ្សាយទេ។ លោកបន្តថា នោះក៏មានន័យថា ប័ណ្ណនោះត្រឹមត្រូវ​ហើយ។ ដូច្នេះ អ្នកដែលអាចធ្វើមោឃភាព ប័ណ្ណនោះបាន គឺក្រសួង ឬមន្ទីរដែនដីនគរូបនីយកម្ម និងសំណង់ (ដនសស) ជាមួយនឹងការយោង តាមសាលដីការបស់តុលាការ។ លោក គឹមថុល បានណែនាំថា៖ «សូមយកលិខិតនេះ ភ្ជាប់​ជាមួយពាក្យបណ្តឹង ទៅសាលារាជធានីភ្នំពេញ ដើម្បីអោយគាត់បកស្រាយឡើងវិញ ហេតុអីទើបចេញ​លិខិតនេះបាន បើសាដីកាមិននិយាយពីប័ណ្ណផង។ ហើយសាលដីកា គេច្រានពាក្យបណ្តឹងចោលហ្នឹង សូម​មើលសេចក្តីសំរេចចុងក្រោយ របស់តុលាការកំពូល។»

ចំពោះករណីខាងលើ ត្រូវបានលោក ធុយ មូលី (Moly Thuy) ចៅជីដូនមួយ របស់ឈ្មោះ ធុយ ឈីវអួន ជា​ម្ចាស់​កម្មសិទ្ធិ ដែលបានទិញដីនោះ មកគ្រប់គ្រងដល់បច្ចុប្បន្ន លើកឡើងថា នេះជារឿង«មហាហួសចិត្ត និង​មហា​អយុត្តិធម៌មួយ»។ លោកបានរៀបរាប់ថា យាយរបស់ខ្លួន ឈ្មោះ ធុយ ឈីវអួន បានទិញដីខាងលើ ក្នុង​ឆ្នាំ​២០០៨ ហើយបានកាត់ឈ្មោះ នៅលើប្លង់រឹងត្រឹមត្រូវ។ ដីនោះក៏បានចុះទៅមើល និងឲ្យលោកមេភូមិ ធ្វើស្រែ​លើដីនោះរាល់ឆ្នាំ ឯមេភូមិក៏បានអះអាងថា ដីនេះមិនមានរឿងរ៉ាវក្តីក្តាំអ្វីទេ គ្មានអ្នកណាយកបានទេ ព្រោះ​មាន​ប្លង់រឹងហើយ។

លោកបានបន្តថា ដល់ថ្ងៃទី២៧ ខែកក្កដា ឆ្នាំ២០១៥ ស្រាប់តែប្រធានភូមិស្ទឹងមានជ័យ ភូមិដែលជីដូនលោក ស្នាក់នៅសព្វថ្ងៃ យកសេចក្តីជូនដំណឹង របស់សាលារាជធានីភ្នំពេញលេខ ១២ សជណ.រក ចុះថ្ងៃទី០៧ ខែ​កក្កដា ឆ្នាំ២០១៥ មកឲ្យជីដូនលោក។

លោកបន្តថា តាមសេចក្តីជូនដំណឹង របស់សាលារាជធានីភ្នំពេញនេះ លោកយាយរបស់លោក បានបាត់​បង់​សិទ្ធគ្រប់គ្រងដី ដែលមាន«ប្លង់រឹង»នោះហើយ។ សាលារាជធានី នៅបានគម្រាមទៀតថា៖ «វិញ្ញាបនបត្រ​សំគាល់ ម្ចាស់អចលនវត្ថុលេខៈ 12050522-0310 ជាកម្មសិទ្ធិរបស់លោកស្រី​ត្រូវអស់​សុពលភាព និង​ប្រសិទ្ធិភាព (មោឃភាព) ចំពោះមុខច្បាប់ ដោយសារអំណាចសាលដីកាស្ថាពរលេខៈ ១៣២ង ចុះថ្ងៃទី២៦ ខែមេសា ឆ្នាំ២០១២ របស់តុលាការកំពូល ហើយចាប់ពីថ្ងៃជូនដំណឹងនេះតទៅ លោកស្រី មិនអាចយក​វិញ្ញាបនបត្រ សំគាល់ម្ចាស់អចលនវត្ថុនេះ ទៅប្រើប្រាស់បានទៀតទេ ពីព្រោះវាផ្ទុយពីខ្លឹមសារច្បាប់ ហើយ​ប្រសិន បើមានការប្រើប្រាស់នោះ នឹងនាំឲ្យមានការផ្តន្ទាទោស តាមផ្លូវច្បាប់ជាធរមាន។»៕

លោក មូលី បានសរសេរអះអាងទៀតថា៖ «សួរទៅសាលារាជធានី ពីរឿងហ្នឹងវិញ មន្ត្រីសាលារាជធានីប្រាប់​ថា គាត់អត់ដឹងរឿងអីទេ គាត់ធ្វើតាមបញ្ជា របស់ខាងសុរិយាដី គេឲ្យធ្វើទេ។ ចាំល្ងាចនេះ ទៅសាកសួរខាង​សុរិយោ​ដី ឲ្យបានច្បាស់លាស់សិន បើជាការចេញ សេចក្តីជូនដំណឹងច្រលំ (ខុសបច្ចេកទេស!) ត្រូវខាងសាលា​រាជធានី​ភ្នំពេញ ចេញលិខិតនិរាករណ៍ សេចក្តីជូនដំណឹងមុនចោល!»៕

» សូមមើលលិខិតនេះ ដូចខាងក្រោម៖