លទ្ធផលចុងបញ្ចប់ និងបិទផ្លូវតវ៉ា នៃការរាប់សន្លឹកឆ្នោតឡើងវិញ នៅក្នុងការិយាល័យចំនួន៩ ក្នុងឃុំបឹងប្រាំ ស្រុក​បវេល ខេត្តបាត់ដំបង និងនៅក្នុង​ការិយាល័យ​មួយ​ទៀត ក្នុងឃុំក្លែង ស្រុកសណ្តាន់ ខេត្តកំពង់ធំ បាន​ផ្ដល់​ជ័យជំនះ​ទាំង​ពីរឃុំ ទៅឲ្យគណបក្សសង្គ្រោះជាតិ ឈ្នះពីលើគណបក្ស​ប្រជាជន​កម្ពុជា។ ការរាប់​សន្លឹកឆ្នោត​ឡើង​វិញ​​ទាំង​នេះ សុទ្ធតែ​មាន​ការ​ចូលរួម​សង្កេតការណ៍​ដោយផ្ទាល់​ ពី​តំណាង​គណបក្សនយោបាយ និង​អង្គការ​​សង្គម​​ស៊ីវិល​​​មួយចំនួនទៀត។

សម្រាប់ឃុំបឹងប្រាំ គណបក្សសង្គ្រោះជាតិ ទទួលបាន ៧៧៦ សំឡេង ឈ្នះគណបក្សប្រជាជនកម្ពុជា ដែល​ទទួល​បានតិចជាង៦៩សំឡេង (បានតែ ៧០៧សំឡេង)។ រីឯឃុំក្លែង​វិញ គណបក្សសង្គ្រោះជាតិ ទទួល​បាន​សំឡេង ៨៣៧សម្លេង ឈ្នះ២សំឡេង ពីលើគណបក្សប្រជាជនកម្ពុជា ដែលទទួល​សំឡេងឆ្នោត យ៉ាង​ប្រផិត​ប្រផើយ ចំនួន ៨៣៥សំឡេង។

ការប្រកាសលទ្ធផលបឋម ដែលធ្វើឡើង ក្រោយការរាប់សន្លឹកឆ្នោតភ្លាមៗ នៅនឹងកន្លែងក្នុងឃុំបឹងប្រាំ ស្រុក​បវេល ខេត្តបាត់ដំបង បានបង្ហាញថា គណបក្ស​ប្រជាជនកម្ពុជា ទទួលបាន ៦៣១សំឡេង ឈ្នះ​គណបក្ស​ប្រឆាំង ដែលទទួលបាន ៦០៤សំឡេង។ ប៉ុន្តែគណបក្សសង្គ្រោះជាតិ មិនសុខចិត្ត​ចំពោះលទ្ធផលនេះ និង​បាន​ប្ដឹង​ឡើង​ទៅ គណៈកម្មការ​រៀបចំការបោះឆ្នោត ថ្នាក់ខេត្ត ដើម្បីសុំរាប់សន្លឹកឆ្នោតឡើងវិញ។

នៅថ្នាក់ខេត្ត លទ្ធផលនៃការរាប់​សន្លឹកឆ្នោត​ឡើងវិញ ក្នុងឃុំបឹងប្រាំ បានបង្ហាញ​ផ្ទុយ​ពីលទ្ធផល​បឋម ដោយ​គណៈកម្មការរៀបចំការបោះឆ្នោត រក​ឃើញ​ថា​គណបក្ស​សង្គ្រោះជាតិ ឈ្នះសម្លេងដ៏ច្រើនវិញ។ ការ​សម្រេច​របស់​ថ្នាក់​ខេត្ត បានបង្កការមិនសុខចិត្ត ដល់គណបក្សកាន់អំណាច និង​បញ្ជូន​ពាក្យ​បណ្ដឹងសារទុក្ខ ឡើង​ទៅ​ដល់​ថ្នាក់​ជាតិ រហូតដល់ការដោះស្រាយ ឈានដល់លទ្ធផលចុងក្រោយ ចេញផ្សាយ នៅល្ងាចថ្ងៃនេះ។

កាលពីម្សិលម៉ិញ គណៈកម្មាធិការជាតិរៀបចំការបោះឆ្នោត បានប្រកាសបិទការតវ៉ា ឲ្យគណបក្ស​ប្រជាជន​កម្ពុជា ឈ្នះពីរសំឡេង ពីលើគណបក្ស​សង្គ្រោះ​ជាតិ នៅក្នុងឃុំដូង ស្រុករមាសហែក ខេត្តស្វាយរៀង ដែល​ផ្ទុយ​ពី​ការ​លទ្ធផល​បឋម ដែលបង្ហាញថា គណបក្សប្រឆាំងឈ្នះ៣សំឡេង ពីលើគណបក្សកាន់អំណាច៕