CNRP ផ្ញើរសាររំលែកមរណទុក្ខបេក្ខនារី ដែលត្រូវម៉ូតូបុកស្លាប់
សកម្មជន និងជាបេក្ខនារីលេខរៀងទី៣ របស់គណបក្សសង្គ្រោះជាតិ អ្នកស្រី ង៉ែត សុភាព អាយុ៣៧ឆ្នាំ បានត្រូវម៉ូតូសង់ ស៊េរីឆ្នាំ២០១៦ មួយគ្រឿង បើកបរនិងជិះដោយយុវជនពីរនាក់ បុកចំពីក្រោយ ពេញមួយល្បឿន បណ្ដាលឲ្យដួលបោកក្បាល រងរបួសយ៉ាងដំណំ នៅព្រឹកថ្ងៃទី២៤ ខែឧសភានេះ។
ជាអកុសល អ្នកស្រី ង៉ែត សុភាព ដែលជាស្ត្រីមេម៉ាយ និងមានកូន៤នាក់ នៅក្នុងបន្ទុក បានទទួលមរណភាព នៅពេលអ្នកស្រីត្រូវបានបញ្ជូន ទៅដល់មន្ទីរពេទ្យបង្អែកសំពៅមាស ខេត្តពោធិ៍សាត់។ នេះ បើតាមប្រភពមួយ ដែលស្និតនឹងក្រុមគ្រួសារ។
នៅចំពោះរឿងរ៉ាវដ៏អាណោចអាធមនេះ លោក កឹម សុខា ប្រធានគណបក្សសង្គ្រោះជាតិ បានចេញលិខិតរំលែកទុក្ខមួយច្បាប់ ជូនទៅដល់គ្រួសារសព។ លិខិតនោះ ដែលទើបនឹងមកដល់ដៃអ្នកសារព័ត៌មាន នៅមុននេះបន្តិច បានសរសេរថា លោក កឹម សុខា សំដែងនូវសមានទុក្ខ និងក្ដីសោកស្ដាយ ឥតឧបមា ចំពោះមរណភាពរបស់សកម្មនារីគណបក្សលោក។
ប្រធានគណបក្សប្រឆាំង បានចាត់ទុកមរណភាព របស់អ្នកស្រី ង៉ែត សុភាព ថាជាការបាត់បង់ដ៏ធំធេង នូវម្ដាយ និងសមាជិកគ្រួសារ ជាទីគោរព និងជាទីស្រឡាញ់ នៃគ្រួសារសព ហើយក៏ជាការបាត់បង់សកម្មនារី ដ៏អង់អាចក្លាហាន និងស្មោះត្រង់ម្នាក់ របស់គណបក្សផងដែរ។
ហេតុការណ៍ដ៏រន្ធត់ខាងលើ បានកើតឡើង នៅខណៈពេលអ្នកស្រី និងសកម្មជនប្រមាណ ១០នាក់ផ្សេងតៀត កំពុងដើរចែកខិតប័ណ្ណឃោសនា នៅតាមផ្ទះពលរដ្ឋ នៅតាមបណ្ដោយផ្លូវលំ ក្រាលកៅស៊ូ ក្នុងភូមិព្រែកត្នោត សង្កាត់រលាប ក្រុងពោធិ៍សាត់។
សម្រាប់យុវជនទាំងពីរនាក់ ដែលជិះនៅលើម៉ូតូបង្ក បានរងរបួសស្រាល និងកំពុងទទួលការព្យាបាល ពីមន្ទីរពេទ្យបង្អែកដូចគ្នា។ យ៉ាងណា ហេតុការណ៍គ្រោះថ្នាក់ចរាចរណ៍ រហូតរងគ្រោះដល់ជីវិតនេះ ត្រូវបានក្រុមមន្ត្រីបក្សប្រឆាំង និងសង្គមស៊ីវិលមួយចំនួន ស្នើអាជ្ញាធរបើកការស៊ើបអង្កេត ឲ្យបានច្បាស់ ដើម្បីធានាថា តើករណីនេះ កើតឡើងដោយចៃដន្យ ឬជាការប៉ុនប៉ង បែបនយោបាណាមួយ៕
» សាររំលែកទុក្ខទាំងស្រុង របស់លោក កឹម សុខា៖
