ក្រុមហ៊ុនផលិតយន្ដហោះ របស់អ៊ឺរ៉ុប អ៊ែរប៊ូស (Airbus) បានកំណត់បន្ថែមទៀត ពីសុវត្ថិភាពនៃគ្រឿងមាស៊ីន ដែលនឹង ត្រូវបំពាក់អោយអនាគតយន្តហោះ អា៣៥០ (A350) របស់ខ្លួន។ ការកំណត់នេះ បានលប់បំបាត់ចោល នូវអាគុយស្ងួត ដែលធ្លាប់បង្ក អោយមានបញ្ហាសុវត្ថិភាព និងបច្ចេកទេស ទៅលើយន្ដហោះ បេ៧៨៧ (B787) របស់ក្រុមហ៊នផលិត​យន្ដហោះអាមេរិកាំង ប៊ូអ៊ីញ (Boeing) កន្លងមក។

អ្នកនាំពាក្យរបស់អ៊ែរប៊ូស បានពន្យល់ថា «អ៊ែរប៊ូស ទុកចិត្តលើអាគុយស្ងួត របស់ក្រុមហ៊ុនស័ហ្វ (Saft) ថាមានគុណភាព និងច្បាស់លាស់ សម្រាប់យន្ដហោះ អា៣៥០របស់យើង។ ប៉ុន្តែមកទល់នឹងបច្ចុប្បន្ន មូលហេតុដែលធ្វើអោយមាន ឧប្បត្តិហេតុចំនួនពីរកន្លងមក ទាក់ទងនឹងអាគុយស្ងួតនេះ នៅមិនទាន់អាចពន្យល់បាននៅឡើយ។»

«នៅក្នុងលក្ខខ័ណ្ឌដ៏គួរអោយសង្ស័យ និងដើម្បីគោរពកាលវិភាគនៃគម្រោងផលិតផល អ៊ែរប៊ូស បានសម្រេចចិត្តថា នឹង​អនុវត្តន៍នូវដំណោះស្រាយមួយទៀត ដែលនឹងវិលត្រឡប់មកប្រើអាគុយទឹកវិញ។ អាគុយប្រភេទនេះ ត្រូវបានទទួលដឹង​លឺរួច​ហើយពីសុវត្ថិភាពរបស់វា និងដាក់បញ្ចូលក្នុងគម្រោងរបស់ យន្ដហោះអា៣៥០។»

ក្រុមហ៊ុនផ្គត់ផ្គង់អាគុយ ត្រូវបានអ៊ែរប៊ូសបញ្ជាក់ថា នៅតែជាក្រុមហ៊ុន ស័ហ្វ របស់បារាំងដដែល។ សម្រាប់ក្រុមហ៊ុន​ផលិតយន្ដហោះរបស់អ៊ឺរ៉ុបមួយនេះ ការអនុវត្តន៍គម្រោង និងសុវត្ថិភាពរបស់អនាគតយន្ដហោះចេញក្រោយរបស់ខ្លួន វាជារឿងសំខាន់ណាស់។ ក្រុមហ៊ុនបានធានាអះអាងថា ការសម្រេចចិត្តណាក៏ដោយ មិនធ្វើអោយប៉ះពាល់ ដល់ការ​ចេញដាក់អោយដំណើរការ នូវបក្សីស្លាបដែក អា៣៥០នេះ ដែលបានត្រៀមបំរុងសម្រាប់ចុងឆ្នាំ២០១៤នោះទេ។

ឧប្បត្តិហេតុទាំងពីរ បានបង្ខូចអាគុយស្ងួត នៃយន្ដហោះប៊ូអ៊ីញ៧៨៧  ដែលជាជើងហោះហើរឌ្រឹមឡាន័រ​ (Dreamliner) របស់ក្រុមហ៊ុនអាកាសចរណ៍ជប៉ុន។ យន្ដហោះដែលទើបនឹងចេញ ដាក់អោយដំណើរការ របស់ក្រុមហ៊ុន​អាមេរិកាំងនេះ បានបង្ខំចិត្តចុះចតជាបន្ទាន់ នៅទីក្រុងប៊ូស្តុន ថ្ងៃទី០៧ខែមករា និងមួយទៀត នៅផ្នែកខាងត្បូងនៃ​ប្រទេសជប៉ុន ថ្ងៃទី១៨​ខែដដែល។ គ្រោះថ្នាក់ដែលកើតឡើងភ្លាមៗ និងបន្តបន្ទាប់គ្នានេះ បណ្ដាលអោយយន្ដហោះ ប៊ូអីញ៧៨៧ ទាំង៥០គ្រឿង​ផ្សេងទៀតក្នុងពិភពលោក ត្រូវបានហាមឃាត់ លែងអោយហោះ និងនៅជាប់គាំងជាប់ជើងនៅនឹងដី ដរាបណាបញ្ហា​សុវត្ថិភាព នៅមិនទាន់បានបំភ្លឺអោយច្បាស់ទេនោះ។

សូមអានអត្ថបទស្ដីពី ការហាមឃាត់នេះ ដោយចុចនៅទីនេះ។

យន្ដហោះអា៣៥០ និងបេ៧៨៧ ជាបក្សីស្លាបដែកប្រភេទថ្មី និងចុងក្រោយគេ ដែលកើតចេញពីបច្ចេកវិទ្យា​ប្រហាក់​ប្រហែលគ្នា ជាពិសេសត្រូវការជំនួយដូចគ្នា ពីចរន្ដភ្លើងអាគុយ។ ក្រៅពីទុកសម្រាប់បញ្ឆេះម៉ាស៊ីនយន្ដហោះ អាគុយមាន​តួនាទីមួយទៀត សម្រាប់ជួយសង្គ្រោះប្រដាប់បញ្ជាយន្ដហោះ ក្នុងករណីម៉ាស៊ីនទាំងនេះខូចលែងដំណើរការ។ ក្នុងពេល​កន្លងមក ពួកអ្នកផលិតយន្ដហោះ បានងាកទៅប្រើប្រាប់អាគុយលីចូម ឬអាគុយស្ងួតវិញ ដោយហេតុថាវាអាចផ្ទុក​ថាមពលបានច្រើនជាង នៅក្នុងទំហំដូចគ្នា និងអាចអោយមានការសន្សំសំចែ ក្នុងការប្រើប្រាស់ប្រេងឥទ្ធនះ។ អាគុយ​លីចូម មិនអស់ភ្លើងដោយឯកឯង និងមានអាយុបានវែងថែមទៀតផង។

ទោះបីជាអ៊ែរប៊ូស បានប្រកាសពីការផ្លាស់ប្ដូរ មកប្រើអាគុយទឹកវិញនោះក៏ដោយ ក៏ការហោះហើរសាកល្បងលើកទីមួយ របស់យន្ដហោះប្រភេទ អា៣៥០ នឹងត្រូវធ្វើនូវរដូវក្ដៅឆ្នាំនេះ ជាមួយនឹងអាគុយស្ងួតលីចូម។ ការហោះហើរសាកល្បងនេះ នឹងអនុញ្ញាតអោយក្រុមហ៊ុនផលិតយន្ដហោះ វាយតម្លៃពីគុណភាពនៃ ទាំងម៉ាស៊ីន ទាំងអាគុយ ទោះស្ថិតក្នុងប្រភេទណា​ក៏ដោយ៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី១៦ ខែកុម្ភះ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ