ខ្សែប្រយុទ្ធសំខាន់របស់ក្រុម អ៊ីនថឺ មីឡាន (Inter Milan) កីឡាករ ឌីកូ មីលីតូ (Diego Milito) ទំនងជាត្រូវសំរាក រហូត​ដល់ចប់រដូវកាល បន្ទាប់ពីរងការឈឺចាប់របួសសរសៃជង្គង់របស់គាត់ ក្នុងពេលការប្រកួតអ៊ឺរ៉ូប៉ាលីក (Europa League) ដោយបានយកឈ្នះក្រុមស៊ីអេហ្វអរ ឃ្លុជ (CFR Cluj) ក្នុងលទ្ធផល ២-០។

កីឡាករ ឌីកូ មីលីតូ ដួលនៅលើស្មៅ នៅក្រោយការប្រកួតបានចាប់ផ្ដើមតែ៦នាទីប៉ុណ្ណោះ។

តារាខ្សែប្រយុទ្ធសញ្ជាតិអាស្សង់ទីនរូបនេះ គឺជាអ្នករកគ្រាប់បាល់បញ្ចូលទីទាំង២គ្រាប់ ក្នុងការ ប្រកួតផ្តាច់ព្រ័ត្រ ពេល​ដែលក្រុមអ៊ីនថឺឈ្នះពានរង្វាន់កំពូលរបស់អ៊ឺរ៉ុបឆែមពានលីក (Champions League) កាលពីឆ្នាំ ២០១០។ គូររំឮកថា កីឡាកររូបនេះ ទើបតែជាសះពីរបួស តែបែជាជួបរឿងសោកសៅ បន្ទាប់ពីការចូលលេងបានតែ ៦នាទីប៉ុណ្ណោះ ក្នុង​កីឡាដ្ឋាន សាន ស៊ីរ៉ូ (San Siro) របស់ក្រុមអ៊ីនថឺ កាលពីថ្ងៃព្រហស្បត្តិ៍ ទី១៤ខែកុម្ភះនេះ។

លោក អេនដ្រេ ស្ត្រាម៉ាកស្ស៊នី (Andrea Stramaccioni) ជំនួយការគ្រូបង្វឹករបស់ក្រុមអ៊ីនថឺ បាន ប្រាប់ដល់អ្នកយក​ពត៌មានថា «វាជាបញ្ហាសរសៃជើងរបស់គាត់ ហើយជាប្រភេទរបួសថ្មីមួយទៀតសំរាប់ឌីកូ យើងមិនដឹងជាត្រូវធ្វើ​យ៉ាងម៉េចទេ ចំពោះបញ្ហានេះ។»

ជំនួយការរូបនេះបន្តទៀតថា «យើងរីករាយ នៅពេលឃើញគាត់មកលេងបានវិញ ដោយគាត់ជាមនុស្សសំខាន់ម្នាក់ ហើយគាត់ជាកីឡាករគំរូដល់កីឡាករទាំងអស់ក្នុងក្រុម។ យើងនឹងរង់ចាំគាត់ នៅពេលណាដែលគាត់អាចមកត្រឡប់ មកសហការជាមួយនឹងក្រុមវិញ។»

កីឡាករ រ៉ូដ្រីកូ ប៉ាឡាស៊ីអូ (Rodrigo Palacio) ជនរួមជាតិរបស់កីឡាករឌីកូ បានធ្វើការជំនួស ដំណែង ហើយបានជួយ​រកគ្រាប់បាល់ទាំង២គ្រាប់ ក្នុងការប្រកួតជើងទី១ វគ្គ៣២ក្រុមនោះ ប៉ុន្តែកីឡាកររូបនេះមានតួនាទី ជាខ្សែបំរើស្លាប។
ក្រុមអ៊ីនថឺមានចំណាត់ថ្នាក់លេខ៤ ក្នុងតារាង ស៊ឺរី អេ (Serie A) លីកបាល់ទាត់កំពូលរបស់ ប្រទេសអ៊ីតាលី ប៉ុន្តែឥឡូវ​ត្រូវប្រឈមមុខ នឹងបញ្ហាអវត្តមានខ្សែប្រយុទ្ធសំខាន់របស់គេ រហូតដល់ចប់រដូវកាល៕

-----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៥ ខែកុម្ភះ ឆ្នាំ២០១៣
ប្រភព៖ រ៉យទ័រ
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ