សាំងហ្គាពួរ ថាខ្លួនមានអ្នកឈឺជំងឺ ហ្សីកា ចំនួន៤១ករណី
- ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី២៨ សីហា ២០១៦
- កែប្រែចុងក្រោយ: August 28, 2016
- ប្រធានបទ: ជំងឺឆ្លង
- អត្ថបទ: មានបញ្ហា?
- មតិ-យោបល់
-
កាលពីថ្ងៃសៅរ៍ម្សិលម៉ិញ ប្រទេសសាំងហ្គាពួរ បានប្រកាសឲ្យដឹង ពីករណីអ្នកជំងឺចំនួន៤១នាក់ ដែលបានឆ្លងជំងឺ ហ្សីកា (Zika)។ ពីក្នុងចំណោមនោះ អ្នកជំងឺភាគច្រើនគឺជាកម្មករបរទេស ដែលធ្វើការនៅក្នុងការដ្ឋានសំណង់។
នេះជាលើកដំបូងបង្អស់ ដែលប្រទេសនេះបានប្រកាសឲ្យដឹង ពីការឆ្លងរាលដាលនៅក្នុងប្រទេស នៃរោគសញ្ញា ហ្សីកា តាមរយៈអ្នកជំងឺជាស្ត្រីម្នាក់ ដែលមានដើមកំណើតម៉ាឡេស៊ី អាយុ៤៧ឆ្នាំ។ រីឯអ្នកជំងឺដទៃទៀត ក៏ត្រូវបានក្រសួងអះអាងដែរថា ពួកគេមិនបានធ្វើដំណើរ ទៅក្រៅប្រទេសនោះទេ។
រោគសញ្ញា ហ្សីកា មុនដំបូងគេ ដែលប្រទេសសាំងហ្គាពួរបានរកឃើញ កាលពីខែឧសភាកន្លងមក បានកើតឡើងទៅលើបុរសម្នាក់ ដែលបានចេញទៅស្នាក់នៅ អស់រយៈពេល១ខែ ក្នុងប្រទេសប្រេស៊ីល ប្រទេសដែលមានការរាតត្បាត ដោយជំងឺនេះខ្លាំងជាងគេ លើពិភពលោក កាលពីប៉ុន្មានខែមុន។
មេរោគ ហ្សីកា ដ៏សហាវ ដែលចម្លងជាទូទៅ តាមរយៈសត្វមូសនោះ បានបង្កគ្រោះធ្ងន់ធ្ងរ ទៅដល់មនុស្សចាស់ក្មេង ជាពិសេសទៅដល់ទារក ឬទារិកាដែលទើបនឹងកើត ដោយអាចបង្កធ្វើឲ្យពិការ ទៅលើការរីករលូតលាស់នៃឆ្អឹងក្បាល និងប្រព័ន្ធប្រសាទ៕
